Modi ki Jizus ta salva-nu?

Respósta di Bíblia

Jizus salva kes algen fiel kantu el sakrifika se vida pa resgata-s. (Mateus 20:28) É pur isu ki Bíblia ta fla ma el é ‘Salvador di mundu.’ (1 João 4:14) Bíblia tanbê ta fla: ‘Ka ten salvason na más ningen, pamodi ka ten otu nómi dibaxu di séu, ki dadu pa ómis, pa nu ser salvu através di el.’ — Atos 4:12.

Jizus ‘sprimenta mórti’ na lugar di tudu kes algen ki ten fé na el. (Hebreus 2:9; João 3:16) Dipôs, ‘Deus resusita-l’ i Jizus torna bira un algen spritual i el bai pa Séu. (Atos 3:15) La na Séu Jizus pode ‘salva konpletamenti kes ki ta txiga na Deus através di el’. — Hebreus 7:25.

Pamodi ki nu debe txiga na Deus através di Jizus?

Pamodi nos é pekador. (Romanos 3:23) Pekadu é sima un barera entri nos ku Deus i el ta pô-nu ta móre. (Romanos 6:23) Má Jizus ta sirbi di ‘adivogadu’ ô el ta difende kes ki ta mostra ses fé na se sakrifisiu di resgati. (1 João 2:1, nóta di rodapé) Es ta pidi Deus pa obi ses orason i pa púrdua ses pekadu através di Jizus ku bazi na sakrifisiu di resgati ki el faze. (Mateus 1:21; Romanos 8:34) Deus ta obi kes orason li pamodi es sta di akordu ku se vontadi. Deus manda Jizus pa Téra ‘pa mundu salvadu através di el.’ — João 3:17.

Kridita na Jizus é tudu ki nu meste pa nu salva?

Nau. É simé ki nu meste kridita na Jizus pa nu ten salvason, má sô kel-li ka ta txiga. (Atos 16:30, 31) Bíblia ta fla: ‘Sima korpu sen spritu sta mortu, asi tanbê fé sen óbras sta mortu.’ (Tiago 2:26) Pa nu ten salvason nu meste:

• Prende sobri Jizus i se Pai, Jeová. — João 17:3.

• Dizenvolve fé na es. — João 12:44; 14:1.

• Obi ku kes lei ki es ta da, asi pa nu mostra nos fé. (Lucas 6:46; 1 João 2:17) Jizus inxina ma é ka tudu kes algen ki ta txoma-l ‘Sinhor’ ki ta ten salvason, má é sô kes ki ‘faze vontadi di se Pai ki sta na Séu.’ — Mateus 7:21.

• Kontinua ta mostra fé sikrê ku difikuldadis. Jizus mostra klaru ma kel-li é inportanti kantu el fla: ‘Ken ki aguenta firmi ti fin ta salva.’ — Mateus 24:13.