AJUDA PA FAMÍLIA
Modi ki bu pode djuda bu fidju midjora se nótas na skóla
Ta parse ma bu fidju ka gosta di skóla, i el ta fuji di studa i di faze trabadju di kaza. Kal ki é rezultadu? Se nóta i se konportamentu sta sô ta piora. Modi ki bu pode djuda-l midjora se nóta?
Kuzê ki bu meste sabe
Preson ta piora prubléma. Si bu faze bu fidju preson na kaza bu sta ta kria-l más un prubléma, pamodi el ta fika preokupadu ku se situason na skóla i ku preson ki bu ta faze-l na kaza. Pamodi kel-li el pode konta mintira, sukundi kes nóta baxu, sina próva na bu lugar ô falta skóla. Prubléma sô ta fika más piór.
Da prezenti pode ka djuda. Un pai ki txoma Andrew fla: “Pa insentiva nos fidju-fémia, nu kumesa ta da-l prezenti óras ki el ta tinha bons nóta. Má kel-li sô ta fazeba el pensa na ganha prezenti. Óras ki el ta tinha nóta baxu, el ta fikaba más xatiadu pamodi el ka resebe prezenti di ki pamodi se nóta”.
Poi kulpa na profesoris é ka midjór soluson. Bu fidju pode fika ta pensa ma el ka meste sforsa pa tra bons nóta. Tanbê el pode prende kulpa otus pamodi se fadjas i spéra ma otus algen ta rezolve se prubléma. El pode perde xansi di dizenvolve un kualidadi txeu inportanti pa se vida óras ki el bira más grandi, ki é seta responsabilidadi pa kuzas ki el ta faze.
Kuzê ki bu pode faze
Kontrola bu kabésa. Si bu sta xatiadu, pâpia ku bu fidju sobri ses nóta dipôs. Un pai ki txoma Brett fla: “Mi ku nha mudjer nu konsigi midjór rezultadus óras ki nu ta staba kalmu i nu ta ntendeba situason di nos fidju.”
Prinsípiu di Bíblia: ‘Tudu algen debe sta prontu pa obi, má ka debe pâpia faxi i nen xâtia faxi’. — Tiago 1:19.
Diskubri kal ki é prubléma. Motivus ki más ta poi alunus ta ten nóta baxu é abuzu di kolégas na skóla, muda di skóla, preokupason ku próvas, prublémas na família, falta di sónu, falta di un bon prugrama di studa ô falta di konsentrason. Ka bu atxa lógu ma bu fidju é prigisozu.
Prinsípiu di Bíblia: ‘Kenha ki ta mostra ntendimentu na un asuntu ta ten bon rezultadu’. — Provérbios 16:20.
Kria un anbienti ki ta djuda-l studa. Faze un prugrama pa bu fidju faze trabadju di kaza i pa el studa. Ranja un lugar undi bu fidju pode faze se trabadju di kaza sen ninhun kuza pa distrai-l (sima tilivizon i telemóvel). Dividi se trabadju di kaza na pártis pikinoti pa djuda-l konsentra. Hector, un pai di Alimanha, fla: “Si sta ta txiga ténpu di faze próva, nu ta studa poku-poku tudu dia envês di dexa pa riba di óra.”
Prinsípiu di Bíblia: ‘Ten un ténpu markadu pa tudu kuza’. — Eclesiastes 3:1.
Djuda-l gosta di studa. Bu fidju ta xinti más vontadi di prende, si désdi gósi el ntende má studa é bon pa el. Pur izénplu, matimátika pode djuda-l sabe modi ki el pode uza dinheru ki bu ta da-l.
Prinsípiu di Bíblia: ‘Ganha sabedoria, ganha ntendimentu. Da-l txeu valor’. — Provérbios 4:5, 8.
Ideia: Djuda bu fidju ku se trabadju di kaza, má ka bu faze-l el. Andrew fla, “Nos fidju-fémia ta speraba sô pa nos envês di tenta atxa soluson el sô.” Inxina bu fidju modi ki el ta faze se trabadju di kaza el sô.