É dinheru ki ta traze tudu prubléma?

Respósta di Bíblia

Nau. Bíblia ka ta fla ma dinheru é mariadu i nen el ka ta fla ma dinheru ki ta traze tudu prubléma. Alguns algen ta uza kel párti di Bíblia ki ta fla ma ‘dinheru é raís di tudu tipu di kuzas mariadu’, má es ka ta fla kel frazi li konplétu. Na verdadi Bíblia ta fla ma ‘amor pa dinheru é raís di tudu tipu di kuzas mariadu’. — 1 Timóteo 6:10.

Kuzê ki Bíblia ta fla sobri dinheru?

Bíblia ta rekonhese ma óras ki nu uza dinheru dretu, el pode ser ‘un proteson’. (Eclesiastes 7:12) Bíblia tanbê ta ilôjia kes ki ta da kuzê ki es ten i kel-li ta inklui ses dinheru. — Provérbios 11:25.

Omésmu ténpu, Bíblia ta txoma-nu atenson pa dinheru ka ser kuza más inportanti na nos vida. Bíblia ta fla: ‘Nhos manera di vive debe sta livri di amor pa dinheru, má nhos fika kontenti ku kes kuza ki nhos ten.’ (Hebreus 13:5) Kel-li krê fla ma nu debe poi dinheru na se lugar i nu ka debe buska rikéza. Envês di kel-li, nu debe sta kontenti si nu ten kes kuza ki nu meste di verdadi sima kumida, ropa i lugar di mora. — 1 Timóteo 6:8.

**Pamodi ki Bíblia ta aviza-nu pa nu toma kuidadu ku amor pa dinheru?**

Kes algen ki é ganansiozu ka ta ganha vida pa tudu ténpu. (Efésios 5:5) Primeru, pamodi ganánsia é un di kes fórma di idolatria ô di adorason falsu. (Colossenses 3:5) I tanbê kes algen ki é ganansiozu txeu bês ta faze kuzas mariadu pa es konsigi kel ki es krê. Má Provérbios 28:20 ta fla ma kes ‘ki krê bira riku faxi ka ta kontinua inosenti.’ Es pode ti faze algun krimi, sima amiasa algen, tra algen dinheru aforsa, furta, rapta algen ô ti mata.

Sikrê kes ki ta ama dinheru ka txiga di faze kes krimi li, amor pa dinheru ta traze maus rezultadu. Bíblia ta fla ma ‘kes ki sta disididu na fika riku ta kai na tentason, na lasu i na txeu dizeju mariadu i ki ta prujudika-s’. — 1 Timóteo 6:9.

Modi ki konsedjus di Bíblia sobri dinheru pode djuda-nu?

Si nu ka dexa dinheru pô-nu ta dizobidese Deus, nu ta xinti dretu ku nos kabésa, Deus ta fika kontenti ku nos i el ta djuda-nu. Deus ta faze kel promésa li pa kes algen ki ta sforsa di korason pa agrada-l: ‘Nunka N ka ta dexa-u i nunka N ka ta bandona-u.’ (Hebreus 13:5, 6) Tanbê el ta garanti ma ‘un ómi fiel ta resebe txeu benson’. — Provérbios 28:20.

Versíklus di Bíblia ki ta pâpia sobri dinheru

Eclesiastes 7:12: ‘Dinheru é un proteson.’

Kuzê ki kel-li krê fla: Dinheru pode djuda-nu óras ki nu ta uza-l dretu, pamodi el ta da-nu algun suguransa.

Lucas 12:15: ‘Mésmu óras ki un algen ten txeu kuza, se vida ka ta ben di kes kuza ki el ten.’

Kuzê ki kel-li krê fla: Dinheru é ka kuza más inportanti na vida i el ka ta ben djuda-nu ganha salvason.

1 Timóteo 6:10: ‘Amor pa dinheru é raís di tudu tipu di kuzas mariadu i alguns na buska es amor, es disvia di fé i es poi ses kabésa na txeu sufrimentu.’

Kuzê ki kel-li krê fla: Dinheru é ka un kuza mariadu. Má kes algen ki ta ama dinheru ô ki pa es dinheru é kel kuza más inportanti, ta ranja prublémas pa ses kabésa, pa ses família i pa ses saúdi pamodi es ta trabadja dimás.

Hebreus 13:5: ‘Nhos manera di vive debe sta livri di amor pa dinheru, má nhos fika kontenti ku kes kuza ki nhos ten.’

Kuzê ki kel-li krê fla: Envês di faze di tudu pa nu bira riku, nu debe sta kontenti si nu ten kel ki nu meste di verdadi.

Mateus 19:24: ‘É más fásil un kamelu entra na braku di un gudja di ki un riku entra na Reinu di Deus.’

Kuzê ki kel-li krê fla: Jizus fla kel-li dipôs ki el konvida un jóven riku pa sigi-l i kel jóven nega pamodi el gostaba txeu di kuzas ki el tinha. Nton Jizus staba ta da un avizu. El staba ta fla ma un algen ki ta poi rikéza na frenti di Deus ta kóre risku di perde vida pa tudu ténpu.