Jeová sénpri ta da-nu un saída

Nha família sénpri ta lenbra ku gratidon di un vizita spesial ki nha tiu ku nha tia faze-nu na anu di 1976. Nha tiu ta studaba Bíblia ku Tistimunhas di Jeová i el konta nha pai ku nha mai un kuza novu ki el prende na se studu di Bíblia. Primeru el fla-s kuzê ki Jizus fla na Mateus kapitlu 23 sobri kes xéfi di relijion di se ténpu. Dipôs, el mostra-s ma kes xéfi di relijion di ténpu di Jizus é sima kes xéfi di relijion di nos ténpu. Nha mai ki éra katólika ferénha ka konsigi kridita ma Jizus kondena kes xéfi di relijion di manera dirétu. Nton, el disidi djobe di el pa el kuzê ki Bíblia ta fla sobri kel-li.

Nu ta moraba na Lituánia ki na kel ténpu ta fazeba párti di antigu Union Suviétika. Dja ki govérnu ka ta daba relijion txeu liberdadi, éra poku algen ki tinha un Bíblia. Nton nha mai inprista un Bíblia na un igreja i el odja ma kuzê ki nha tiu flaba el éra verdadi. Jizus kondenaba kes xéfi di relijion di se ténpu pamodi es éra finjidu. Kel-li poi nha mai ku gana di sabe más. Pur isu, el pidi publikasons na kel irmon ki ta fazeba nha tiu studu.

Poku ténpu dipôs, nha família kumesa ta sisti runion ku Tistimunhas di Jeová. Dja ki nos óbra staba proibidu, es ta fazeba kada runion na un lugar diferenti. Alvês ti es ta fazeba runion na un florésta la pértu. Mi ku nha mai i nha irman jémia ki txoma Danguolė, nu batiza na anu di 1978. Mi ku nha irman nu tinha 15 anu na kel ténpu. Nha pai batiza alguns anu dipôs.

Jeová da-m un saída kantu mi éra jóven

Un mês dipôs ki nu batiza, mi ku Danguolė nu kumesa ta sufri pirsigison na skóla. Duránti un atividadi na skóla alguns profesóra da kónta ma nu ka labanta pa kanta inu nasional di Union Suviétika pamodi nu ka ta mete na asuntus di pulítika. Kes profesóra da diretor nos nómi i el pâpia ku pulísia ki es ta txomaba di KGB. Lógu es vizita nha família pa faze-s pergunta.

Tanbê mi ku Danguolė tinha ki manteba nos fé fórti óras ki nos profesor ta tenta konvenseba nos ma Deus ka ta izisti. Pur izénplu, kantu nu tinha 16 anu nos turma tevi ki skrebe un testu ku téma: “Pamodi ki N ka ta kridita na Deus.” Dja ki N ka ta konkordaba ku kel téma li, N skrebe na un papel: “N ta kridita na Deus”, i N pô-l riba di nha méza. Kantu nha profesóra odja kel papel el fika xatiadu i el grita: “Nton skrebe pamodi ki bu ta kridita na Deus!” N fika filís di skrebe sobri kuzê ki N ta kridita na el i nha irman faze mésmu kuza. Kantu dôs otu minina odja kuzê ki nu staba ta skrebe, es tanbê es skrebe pamodi ki es ta kriditaba na Deus. Kel-li é sô un di kes txeu situason difísil ki N odja ma Jeová ‘ta da un saída’. — 1 Koríntius 10:13.

Duránti un mês, kes irmon ki tinha responsabilidadi na kongregason inprista-nu kel livru Do Paraiso Perdido ao Paraiso Recuperado ki Tistimunhas di Jeová publika. Pa kel ki N sabe, na kel ténpu tinha sô uns kuatu ô sinku livru di kel-li na Lituánia interu. Mi ku Danguolė nu fla kunpanheru: “Ta sérba sábi si nu konsigi ten un livru di kel-li.” Má dja ki nu ka ta konsigiba, nton nu disidi kôpia kel livru ku nos mô. Nu fika ku mô ta due, má nu staba txeu kontenti pamodi nu tinha kel publikason li ki ta ba djudaba nos bira nos fé más fórti.

Na anu di 1982, lógu dipôs ki N faze 19 anu, N dadu dôs anu di kadia pamodi N ka bai trópa. Foi difísil sta na kadia djuntu ku txeu kriminozu. Má mi é gratu pamodi di vês en kuandu N ta inkontraba ku otu Tistimunha di Jeová ki staba prézu na mésmu lugar ki mi. N tirmina di kunpri nha péna na anu di 1984, má kel-li ka foi últimu bês ki N podu prézu.

N abensuadu ku un mudjer ki ta ama Jeová

Dipôs ki N sai di kadia na anu di 1984, N konxe Lidija ki éra un irman bunita i ki ta amaba Jeová txeu i nu kaza. El ta viveba na Ukránia. Dipôs ki nu kaza, Lidija sai di se país i el ben vive djuntu ku mi na Lituánia. El ku se família éra Tistimunhas di Jeová, pur isu el tanbê el pirsigidu txeu na skóla. Duránti kel ténpu kuzê ki inkoraja-l foi izénplu di kes irmon ki staba prézu na kes kanpu di konsentrason nazista ô ki mandadu prézu pa Sibéria.

Na anus di 1980, óbra di Tistimunhas di Jeová inda staba proibidu na Lituánia. Pur isu, txeu bês nu ta pruvetaba kazamentu di irmons pa fazeba un kongrésu sukundidu duránti dôs dia. É kel-li ki kontise na nos kazamentu. Nos konvidadu komemora nos kazamentu má tanbê nu obi txeu diskursu, nu kanta txeu kántiku i ti nu odja kuatu drama ki irmons ku irmans faze ku ropas di ténpu di Bíblia. Pa kel ki N ta lenbra, la tinha 450 algen ta sisti i kel-li ta inklui alguns família ki binha di tudu párti di Union Suviétika i ti pesoas ki nu ka konvida, sima kes pulísia di KGB ki alguns irmon rekonhese.

N volta pa kadia

Si un Tistimunha di Jeová ka konkordaba ku kes ideia di Union Suviétika dipôs ki el sai di kadia, alvês govérnu ta mandaba el pa kadia otu bês. Pur isu ménus di un anu dipôs ki N kaza, N bai pa tribunal otu bês. N pasa kel dia na tribunal timenti Lidija ki staba grávida fika na un ospital la pértu. N ka dexadu ba vizita-l duránti kel julgamentu. Má un konsigi bai ti ospital duránti un intervalu na kel audiénsia i N fika di ladu di fóra di se janéla. El abri janéla i nu tevi un ténpu pa inkoraja kunpanheru. Más tardi na kel dia, es da-m três anu di kadia.

Infilismenti dôs dia dipôs, nos bebe móre déntu bariga. Lidija fla ma kel dór ki el xinti éra sima si es kortaba el na dôs padás. Alén di lida ku kel situason difísil li, Lidija tanbê tevi ki adapta na un novu país i el tevi ki mora djuntu ku nha mai i nha pai ki ka ta falaba kuazi nada di ukranianu ku rusu ki éra kes língua ki Lidija ta papiaba. Má simé Lidija kunfia txeu na Jeová i nha mai ku nha pai kuida di el i es djuda-l duránti kel ténpu difísil.

Jeová kontinua ta da-nu un saída

Kuzê ki N prende duránti kel primeru bês ki N tevi na kadia pripara-m pa kel sugundu bês. Un kuza ki djuda-m aguenta firmi foi prega pa otus algen. Pur izénplu, óras ki es ta lebaba prézus pa kadia, es ta lebaba es na karu i konboiu. Alvês 15 ô 20 ómi ta fikaba pertadu na kunpanheru déntu di un spasu ki ta kebeba sô sinku ô 6 algen. Kantu ki N faze kel viajen li, N pruveta kel oportunidadi pa N pâpia ku kes otu prézu sobri mensajen di Bíblia. N splika-s pamodi ki N ka ta meteba na géra i na pulítika i ma pamodi kel-li N staba prézu. Tanbê N splika-s pamodi ki N ta kriditaba ma Deus ta izisti.

N fika na kadia di Marijampolė.a Pa kel ki N sabe, ami éra úniku Tistimunha di Jeová na meiu di kes 2 mil prézu ki éra prigozu. Enbóra txeu bês es ta amiasaba kes prézu, es ta sotaba es i ti mataba es, ami N sotadu sô un bês. Sikrê ku kel situason difísil li N ta tenta inkorajaba kes algen ki staba dizanimadu i mostra-s konpaxon ki éra un kuza ki es ka ta kustuma odjaba na kadia.

Kes pulísia di KGB tanbê ta tenta poba nos konfuzu i pô-nu ku duvida di kuzê ki éra verdadi. Di algun manera es sabia di kuzê ki nha família ta staba ta pâpia déntu di kaza i dipôs es ta ba kontaba mi kuzê ki es staba ta pâpia. Má kes pulísia ta distorseba kuzê ki nha família ta flaba pa pô-m ta pensa ma es staba ta briga i ma es ka staba unidu ku kunpanheru. Nunka N ka kridita na kuzê ki kes pulísia ta flaba mi, má foi sô kantu ki N sai di kadia ki N konsigi konpara kuzê ki kes pulísia konta-m ku kuzê ki nha família flaba própi. — Mateus 10:16.

Tevi un bês ki un irman pidi se vizinhu ki éra un guarda ki el konxeba dretu pa daba mi un Bíblia pikinoti na rusu sukundidu. Di noti N ta kopiaba alguns versiklu di kuzê ki Jizus fla na kel diskursu na monti na un padasinhu di papel. Otu dia, timenti N ta staba ta trabadja na fábrika di kadia N ta leba kes versiklu txeu bês óras ki ningen ka staba ta odja-m. É di kel manera li ki N dikora kel diskursu ki Jizus faze na monti na rusu ki nen é ka nha língua di korason. Ku ténpu kes guarda diskubri i es toma-m kel Bíblia. Má kantu ki es faze kel-li dja N tinha tudu kes palavra di Jizus na nha menti i na nha korason.

Lidija ta skrebeba mi karta kuazi tudu dia i kel-li ta inkorajaba mi txeu. Má sô N ta pode skrebeba el karta dôs bês pa mês. Má simé el fla-m ma nhas karta djuda-l ten serteza di três kuza inportanti: ma N staba bibu, ma N staba ta kontinua lial pa Jeová i ma inda N ta amaba el txeu.

Jeová sénpri responde nhas orason i el da-m un saída

Un bês un grupu di prézu iziji pa kes autoridadi midjoraba un bokadinhu kes kondison di trabadju na kadia. Duránti kel-li, es nega trabadja. É klaru ki es kastiga kes prézu di manera duru pamodi kel rebelion. Dipôs kes autoridadi fla mi ku kes otu prézu ma nu ta ba fazeba párti di un novu grupu pa fikaba na lugar di kes rebéldi.

Si N nega fazeba párti di kel novu grupu es ta kastigaba mi tanbê. Má si N setaba, kes prézu ta ba atxaba ma N traíba es i es ta ba vingaba di mi. Normalmenti es ta sotaba un algen ki trai-s ô es ta daba el ku faka ti ki el móre. N xinti sima si N staba na un béku sen saída, ku algen ta faze-m preson pa tudu ladu i N ka sabia kuzê ki N ta fazeba. (2 Krónikas 20:12) Nton N inplora pa Jeová djuda-m txeu bês.

Dirapenti un prézu di kel grupu ki N staba antis djunta nos tudu pa ba pâpia ku kel xéfi. Kel prézu ka éra nha amigu, sô nu ta trabadjaba djuntu. Má el iziji pa N kontinuaba na kel grupu ki N staba. El ku kel xéfi es diskuti i es grita ku kunpanheru. Nton kel xéfi ki nunka ka ta mudaba di opinion pô-nu pa fóra di se skritóriu i el fla ma N pode kontinuaba na kel mésmu grupu. N fika aliviadu! (2 Pedru 2:9) Duránti tudu kel ténpu ki N pasa prézu, nunka N ka odja un prézu ta sforsa txeu pa djuda otu prézu. Kel-li inxina-m ma Jeová pode uza kalker algen pa responde nos orason.

Jeová ranja Lidija un saída

Timenti N staba prézu, Lidija tanbê pasa pa txeu dizafiu. El meste atxaba un trabadju. Má pamodi el éra kasadu ku un prézu, txeu algen ka krê daba el trabadju pamodi es tinha medu pa pulísia KGB ka ba kriaba es prubléma. Ku ténpu el atxa un trabadju ki el tinha ki trabadjaba 12 óra pa dia ta kuida di 30 kriansa. El ta fikaba txeu kansadu! Má tudu dia Jeová ta daba el forsa pa el trabadjaba. Alén di kel-li, irmons ku irmans di tudu Lituánia ta konduziba duránti txeu ténpu pa ba lebaba Lidija publikasons na rusu i tanbê pa da-l konsolu i pasa ténpu ku el. Pur isu, Lidija nunka ka xinti el sô.

N sirbi Jeová djuntu ku nha família

Dipôs ki N sai di kadia, N djuda-s organiza di manera sukundidu traduson di nos publikason pa lituanu. Alguns anu dipôs, Union Suviétika dexa di izisti i nos óbra bira legal otu bês na Lituánia. Ku ténpu fazedu un skritóriu ofisial di traduson pa língua lituanu. Enbóra N ta lebaba más di un óra i meia pa txiga na kel skritóriu, simé N ta fikaba filís di pode bai la pa djuda traduzi nos publikason. N faze kel-li tudu simana duránti 5 anu.

Na agostu di 1997, mi ku Lidija nu konvidadu pa sirbi na filial di Tistimunhas di Jeová na Lituánia ki nu ta txoma di Betel. Nu fika txeu kontenti ku kel konviti li. Nu tinha dôs fidju-fémia, un di 9 anu ki txoma Oksana i otu di 5 anu ki txoma Svajūnė. Nu dadu 3 dia pa nu muda pa un apartamentu pértu di Betel i pa nu poi Oksana na un skóla novu.

Modi ki nu konsigi kria nos fidju i trabadja pa Betel omésmu ténpu? Tudu dia di sédu N ta baba pa Betel i dipôs ki minís baba pa skóla Lidija ta baba tanbê. Dipôs Lidija ta voltaba más sédu pa kaza antis di mininas txigaba di skóla asi pa el pode resebeba es i pa el daba es atenson.

Nos família gostaba txeu di sésta-fera di noti. Nu ta kuzinhaba, nu ta linpaba kaza, nu ta fazeba adorason na família i nu ta divirtiba djuntu. Tanbê nu ta organizaba viajen pa montanha, pa praia ô pa otus Betel na Europa. Asi nos fidju-fémia ta pode odjaba kuzas ki Jeová kria i xinti ma es ta faze párti di un família na mundu interu. Mi ku Lidija nu ten txeu orgulhu di es. Es tudu dôs kumesa ta sirbi di pioneru fíksu kantu ki es tinha 15 anu. Oji Oksana ku se maridu Jean-Benoit ta sirbi na skritóriu di traduson pa lituanu i Svajūnė i se maridu Nicolas ta sirbi na Betel di Fransa.

Désdi ki nu kaza mi ku Lidija nu bira “un karni sô” prinsipalmenti pamodi sirvisu pa Jeová sénpri foi kel kuza más inportanti na nos vida. (Efézius 5:31; Eclesiastes 4:12) É verdadi na nu “presionadu” i nu pirsigidu duránti txeu anu, má nunka nu ka fika bandonadu ô “sen pode mexe.” (2 Koríntius 4:8, 9) Txeu bês nu odja Jeová ta ranja-nu un saída i di serteza el ta kontinua ta faze kel-li.