Nos manera di inprimi biradu más sinplis pa djuda “tudu tipu di algen”

Jeová Deus krê “pa tudu tipu di algen ser salvu i pa es ten un konhisimentu izatu di verdadi.” (1 Timótiu 2:3, 4) Má nos irmons ku irmans i kes algen ki nu ta prega pa es ta pâpia senténas di língua. Tudu anu nu ta inprimi kuazi dôs bilhon di publikason na kes língua. Kuzê ki fazedu pa ten kumida spritual na txeu língua timenti nu ta uza kes kontribuison di midjór manera?

Ménus lugar di inprimi ku ekipamentus midjór

Duránti anus di 1980, nu tinha lugaris di inprimi na más di 40 país. Désdi kel ténpu, poku-poku ba ta organizadu di manera ki nu fika ta inprimi sô na 9 país. Omésmu ténpu, nunbru di kes língua ki ta fazedu publikason ku bazi na Bíblia omenta kuazi 6 bês más! Modi ki nu ta konsigi inprimi na más língua ku ménus lugar di inprimi? Un di kes razon é pamodi gósi nu ten ekipamentus midjór.

Ku kes novu inpresora nu ta konsigi inprimi más publikason na ménus ténpu. Ku kes inpresora ki nu tinha antis, ta lebaba txeu ténpu pa muda di un trabadju di inpreson pa kel otu. Gósi, ku kes ekipamentu novu, kel-li ta fazedu kuatu bês más rápidu. Nu ta pode faze más trabadju i mutu más rápidu, ti mésmu inprimi publikasons na kes língua ki é poku algen ki ta pâpia. Má é klaru ki pa faze kada un di kes trabadju li, ta mestedu di novus plaka di inpreson. Ka dura li, duránti 12 mês nu gasta kuazi dôs milhon di dóla sô na plaka di inpreson.a Nton pa kes trabadju más pikinoti, nu ta uza kes inpresora dijital ki ka meste plaka di inpreson. Pur izénplu, pa inprimi kes publikason ki ka meste txeu kuantidadi nu ta uza kes inpresora leizer, ki ta gasta ménus material i ta fika mutu más baratu.

Na kes últimu três anu ki pasa, nu gasta más di 10 milhon di dóla ta midjora nos mákina di inprimi i di poi kapa na mundu interu. Odja modi ki nu sta ta uza alguns di kes mákina li pa faze kópias di Bíblia. Na pasadu, nu tinha ki faze más di 40 kuza pa faze un Bíblia dipôs ki el inprimidu, sima poi kes folha djuntu, korta-s, justa-s i lixa-s. I txeu bês pa faze kada un di kes kuza, nu tinha ki panhaba kes Bíblia ku mô i leba-s pa otu lugar pa ba faze otu kuza na es. Oji nu meste faze sô 10 kuza pamodi txeu di kes prosésu ta konbinadu na kes mákina ki ten gósi i ta uzadu stera ki ta leba kes Bíblia di un trabadju pa kel otu. Gósi nu ten ménus di metadi di trabadju ki nu ta kustuma tinha pa faze un Bíblia. Na filial di Japon es ta kustuma poba 2 mil Bíblia kapa na kada 8 óra di trabadju. Gósi na 8 óra, es ta poi kapa na uns 35 mil Bíblia!

Nu ta popa dinheru pamodi nu ta guarda ménus papel i ménus publikason

Pamodi kes kuza ki dja nu pâpia di es, nu sta konsigi popa kontribuisons. Pur izénplu, gósi ki nu ta pode faze trabadjus más pikinoti i nu ta konsigi troka di un trabadju pa kel otu más rápidu, nu fika ku ménus publikason guardadu na kada lugar di inprimi. Gary, ki ta sirbi na filial di Mérka fla: “Na komésu foi difísil intende modi ki inprimi poku kuantidadi di publikason i más bês, éra un bon ideia. Pode parse más midjór inprimi más kuantidadi di publikasons ménus bês.” Gary tanbê fla: “Na kel primeru anu dipôs ki nu kumesa ta inprimi ménus publikason, más bês, nu gasta 60 mil dóla más txeu na kes xapa di inpreson i na papel. Má na kel mésmu anu, nu popa más di 1,5 milhon di dóla pamodi nu ka tevi ki guarda txeu papel i livru inprimidu.” Kel dinheru ki nu popa uzadu pa otus kuza inportanti, sima faze Salons di Reinu i djuda kes algen ki pasa pa dizastri.

Pamodi gósi nu meste guarda ménus kuza, tanbê nu ten más spasu na alguns di nos filial. Kes filial pode uza kes spasu pa faze otus kuza ki Betel meste. Alén di kel-li, dja ki nu ta inprimi na ménus lugar, txeu bês nu ta konsigi faze filial más pikinoti. Pur izénplu, trabadju di inprimi na filial di Inglatéra kumesa ta fazedu na filial di Europa Sentral i na otus lugar di inprimi na 2018. Pamodi kel-li, nu popa milhons di dóla kantu nu faze kel novu filial na Chelmsford, na Inglatéra.

“Bu lenbra di mi!”

Más inportanti é ki pamodi nu bira ta inprimi di manera más sinplis, más algen sta ta bira más amigu di Jeová. Gósi nu ta pode inprimi na más língua, sikrê óras ki nu meste poku publikason na un língua. Pur izénplu, ten sô 35 mil algen ki ta pâpia ualizianu ki ta vive na Nova Kaledónia i na ilhas di Ualis i Futuna. Má na agustu di 2024 lansadu Bíblia Traduson di Mundu Novu konplétu na ualizianu. Un publikadora ki txoma Selafina ki ta pâpia ualizianu fla: “N ta kustuma leba palavras na Bíblia na fransês ki N ka ta intendeba. Pur isu, kantu nu resebe Bíblia na ualizianu, N kumesa ta txora. N ora: ‘Ó Jeová, bu lenbra di mi! Abo é un Deus ki ta trata tudu algen igual.’”

Enbóra ten ménus di 500 mil algen na Repúblika Dimokrátika di Kongu ki ta pâpia língua sanga, livru Vive filís pa tudu ténpu! sta konplétu na kel língua li. Juzué ki sta na un kongregason di língua sanga fla: “N tinha ki sforsaba txeu pa splika ô pa traduzi alguns palavra ku studantis di Bíblia, má simé alguns studanti ka ta konsigi intendeba kuzê ki livru staba ta fla. É sábi dimás gósi ten kel livru li na língua sanga! Gósi nhas studanti ta konsigi intende kuzê ki livru sta ta inxina-s i N ka meste más da-s txeu splikason.”

Nu sta ta inprimi i ta distribui kumida spritual pa más algen i na más língua di ki antis. Bus kontribuison, ki ta inklui kes kontribuison ki ta fazedu na donate.jw.org, sta ta djuda-nu faze kel-li. Obrigadu pamodi nhos gosta di da!