Kuzê ki alguns algen ta kridita

Indus

Pa indus, sufrimentu é rezultadu di kuzas ki un algen ta faze na kel vida li ô na un otu vida na pasadu. Obijetivu é txiga mokxa (moksha), ki siginifika para di nase otu bês. Pa kel-li un algen ten ki dexa di preokupa ku kuzas di mundu.

Musulmanus

Es ta kridita ma sufrimentu é un kastigu pa pekadu ô un próva di fé. Dotor Sayyid Syeed a fla ma disgrasas ta lenbra-nu “ma sénpri nu ten ki agradese Deus pa tudu kes benson ki nu ten i ta lenbra-nu ma nu debe djuda kes algen ki ten nisisidadi”.

Krénsa di judeus

Es ta fla ma sufrimentu é rezultadu di kuzas ki nu ta faze. Alguns judeu ta kridita ma ta ben ten un resureison i dipôs ta ben fazedu justisa pa kes algen ki ka ten kulpa ki sufri. Má ten otus judeu ki ta inxina ma algen ta móre i dipôs ta nase otu bês na un otu korpu ô ti mésmu na korpu di un animal. Kel-li ta da kel algen txeu oportunidadi di paga pa érus ki el faze.

Budistas

Budistas ta kridita ma un algen ta sufri duránti tudu kel ténpu ki el ta móre i nase otu bês, ti ki el fika livri di kuzas ki el faze, sentimentus i dizejus mariadu. Un algen pode txiga nirvana, ki krê fla fika livri di kalker sufrimentu, si el mostra sabedoria, si el faze kuzas dretu i si el kontrola se pensamentus.

Konfusionistas

Konfusionistas ta kridita ma maior párti di sufrimentu é pamodi fadjas i érus di ómi i ma sufrimentu pode bira más poku óras ki un algen faze kuzas dretu. Es ta kridita tanbê ma txeu sufrimentu ta ben di kriaturas spritual ki ómi ka ta konsigi kontrola. Pur isu, úniku kuza ki un algen pode faze é seta se distinu.

Alguns relijion di Áfrika

Es ta kridita ma algen ta sufri pamodi algun malfetu ki el fazedu. Un fitiseru pode da sórti ô poi un algen ta sufri, i kel algen pode faze alguns serimónia pa bira kel sufrimentu más poku. Pur izénplu, si un algen sta duenti el pode bai na un méstri ô kuranderu pamodi el ta kritika ma el pode kaba ku kel malfetu.

Kristons

Kristons ta kridita ma sufrimentu kumesa pamodi pekadu di primeru ómi ku primeru mudjer, sima livru di Génesis na Bíblia ta fla. Má txeu relijion ki fla ma es ta kridita na Jizus ta inxina ses própi ideia. Pur izénplu, alguns katóliku ta fla ma Deus pode uza sufrimentu di un algen pa da igreja benson ô pa salva otus algen.