5. Sufrimentu ta kaba algun dia?

Pamodi ki é inportanti sabe respósta

Ten speransa ma sufrimentu ta kaba algun dia ta djuda-nu bira amigu di Deus i ten un vida más filís.

Pensa na kel-li

Txeu algen ta krê kaba ku sufrimentu na mundu, má ten poku kuza ki ómi pode faze pa kel-li kontise. Pensa na kes izénplu li:

Nbóra medisina dja midjora txeu. . .

• Duénsas di korason inda sta ta mata mutu más algen di ki otus duénsa.

• Kánser ta mata milhons di algen tudu anu.

• Na un revista sobri medisina,a Dotor David Bloom skrebe: “Mundu sta ta kontinua ta luta kóntra duénsas ki ta pega faxi. Alguns di kes duénsa é novu, otus dja ten txeu ténpu ki izisti i inda otus é duénsas ki dja izistiba i ki torna parse.”

Nbóra txeu país é riku. . .

• Milhons di kriansa ta móre tudu anu, prinsipalmenti na undi ki pobréza é más txeu.

• Bilhons di algen ka ten kaza-banhu na ses kaza.

• Milhons di algen ka ten agu linpu pa bebe.

Nbóra txeu algen ta preokupa ku direitus di ómi. . .

• Na txeu país inda ta trafikadu algen. Di akordu ku un rilatóriu di Organizason di Nasons Unidu, kes país ki ka ta luta kóntra kel krimi li é sima si “es sta ta fitxa odju pa kel prubléma li ô es ka sta priparadu pa lida ku el.”

  SABE MÁS

  Odja vídiu Kuzê ki é Reinu di Deus? na site jw.org.

Kuzê ki Bíblia ta fla

Deus ta preokupa ku nos.

El ta fika tristi óras ki nu ta sufri.

‘[Deus] ka dispreza nen el ka ôdia sufrimentu di algen oprimidu; nen el ka sukundi se róstu di el. Kantu el pidi-l ajuda, el obi.’ — SALMO 22:24.

‘Nhos bota tudu nhos preokupason riba di el, pamodi el ta kuida di nhos.’ — 1 PEDRO 5:7.

Sufrimentu ka ta dura pa tudu ténpu.

Bíblia ta inxina ma vontadi di Deus pa nos ta ben kunpri já já.

‘Deus ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór.’ — APOCALIPSE 21:3, 4.

Deus ta ben kaba ku tudu kuza ki ta pô-nu ta sufri.

El ta ben faze kel-li através di se Reinu, ki Bíblia ta mostra ma é un govérnu ki izisti mê.

‘Deus di Séu ta ben traze un reinu ki ka ta kaba nunka más. I kel reinu li ka ta pasa pa mô di ninhun otu povu. I sô el ta ben fika pa tudu ténpu’. — DANIEL 2:44.