Kuzê ki Bíblia ta fla

Universu sénpri izisti?

Jénezis 1:1 ta fla: “Na komésu Deus kria séu ku téra.”

Antis di 1950, txeu sientista famozu ta kriditaba ma universu sénpri izistiba. Má gósi, ku bazi na kes kuza ki es diskubri ka dura li, maioria di sientistas ta rekonhese ma nos universu tevi un komésu.

Modi ki téra éra na komésu?

Jénezis 1:2, 9 ta fla ma na komésu, téra staba “vaziu i dizértu,” i el staba kubértu di agu.

Sientistas ta konkorda ku kes palavra li. Ten un sientistaa ki fla ma na komésu nos planéta tinha “un atimosféra sen oksijéniu, ki ka ta daba pa respira... I el ta parseba stranhu.” Un revistab di astronomia fla: “Alguns piskiza ki fazedu ka dura li ta fla ma antis, téra éra un mundu di agu ku poku ô ninhun párti di téra ta parse.”

Modi ki nos atimosféra muda ku ténpu?

Jénezis 1:3-5 ta mostra ma kantu lus kumesa ta entra na atimosféra, ka ta daba pa odja sol ku lua di li di téra. Foi sô dipôs ki sol ku lua kumesa ta parse di li di téra. —  Jénezis 1:14-18.

Ten un séntru di piskizac ki fla ma na komésu nos atimosféra ta dexaba poku lus entra na téra. Tanbê el fla: “Na ar tinha gótas pikinoti di un gas ki txoma metanu, ki ta kubriba téra interu sima un névua.” Dipôs “kel névua di metanu dizaparse i séu fika azul.”

Na ki órdi ki vida parse na téra?

Jénezis 1:20-27 ta fla ma primeru kriadu pexis, dipôs pasus, dipôs kes animal ki ta vive na téra i na fin kriadu ómi ku mudjer. Sientistas ta kridita ma kes primeru pexi parse mutu antis di ki kes animal mamíferu i ki pesoas sô ben parse dipôs.

Kuzê ki Bíblia ka ta fla?

Alguns algen ta fla ma kel ki Bíblia ta inxina é diferenti di kel ki sientistas dja diskubri. Má na verdadi, es ta fla kel-li pamodi es ka ta intende dretu kuzê ki Bíblia ta inxina.

Bíblia ka ta fla ma universu ô téra ten sô 6 mil anu. Envês di kel-li, sô el ta fla ma “na komésu” universu ku téra kriadu. (Jénezis 1:1) Bíblia ka ta fla kantu ténpu dja ten ki kel-li kontise.

Bíblia ka ta fla ma tudu vida na téra kriadu na 6 dia di 24 óra. Envês di kel-li, el ta uza palavra “dia” pa pâpia di piriúdus di ténpu. Pur izénplu, el ta fla ma kriason di nos planéta i vida na el, di 6 “dia” di kriason ki Jénezis kapitlu 1 ta pâpia di el, kontise na kel piriúdu di ténpu ki ta txomadu di “kel dia ki Jeovád Deus faze téra ku séu.” (Jénezis 2:4) Deus pripara téra pa ten vida na el i dipôs el kria vida na 6 “dia”. Nton, kada un di kes 6 “dia” di kriason pode ser un piriúdu ki dura txeu ténpu.

Bíblia ka ta fla ma kuzas bibu ka pode pasa pa mudansas ku ténpu. Livru di Jénezis ta fla ma tudu animal kriadu “kada un di se tipu”. (Jénezis 1:24, 25) Na Bíblia palavra “tipu” é ka un palavra sientífiku, má talvês el krê fla un grupu grandi di kuzas bibu. Nton, un úniku “tipu” pode inklui txeu variadadi. Kel-li krê fla ma ku ténpu, déntu di un “tipu” pode ten mudansas na kes variadadi di kriaturas ki ta vive na mésmu grupu.

Kuzê ki bu ta atxa?

Sima dja nu odja, Bíblia ta splika di manera sinplis i izatu modi ki universu kumesa, modi ki téra éra na komésu i modi ki vida parse. Nton, kel-li krê fla ma tanbê Bíblia ta mostra klaru kenha ki kria kes kuza li? Ten un ensiklopédiae ki ta fla: “Kridita ma vida kumesa [através] di un puder ki un algen normal ka ten, é ka txeu diferenti di kel ki sientistas diskubri.”f