Ki ténpu ki Deus kumesa ta faze séu ku Téra?

Respósta di Bíblia

Bíblia ka ta fla ki ténpu ki Deus kumesa ta faze séu ku Téra ô kantu ténpu ki leba pa el faze-s. Sô el ta fla: ‘Na komésu Deus faze séu ku Téra.’ (Génesis 1:1) Bíblia ka ta fla ki ténpu ki foi kel ‘komésu’. Má, kes kuza ki ba ta kontise ki sta na livru di Génesis, ta mostra ma foi antis di kes 6 piriúdu di ténpu ô ‘dias’ di kriason.

Kes dia di kriason éra 6 dia di 24 óra?

Nau. Na Bíblia, palavra ‘dia’ ta uzadu pa pâpia di piriúdus di ténpu diferenti, di akordu ku situason. Pur izénplu, un párti di kel ki sta na Génesis ta pâpia di tudu kes 6 piriúdu di kriason sima si es kontise tudu na un dia. — Génesis 2:4.

Kuzê ki kontise duránti kes 6 dia di kriason?

Deus muda kel Téra ‘vaziu i dizértu’ pa un planéta ki ta daba pa kuzas bibu konsigi vive na el. (Génesis 1:2) Dipôs, el kria vida li na Téra. Bíblia ta splika kuzê ki kontise duránti kes 6 dia ô piriúdu di kriason:

Dia 1: Deus poi lus ta parse na Téra pa sipara dia ku noti. — Génesis 1:3-5.
Dia 2: Deus sipara agu ki staba na Téra di agu ki staba pa riba di Téra i na ses meiu fika un spasu grandi. — Génesis 1:6-8.
Dia 3: Deus poi txon séku ta parse. Tanbê el kria padja, plantas i arvis. — Génesis 1:9-13.
Dia 4: Deus poi sól, lua i stréla fika ta parse li di Téra. — Génesis 1:14-19.
Dia 5: Deus faze kes animal ki ta sta na mar i kes animal ki ta bua. — Génesis 1:20-23.
Dia 6: Deus faze animal ki ta vive na Téra i algen. — Génesis 1:24-31.

Na fin di kes 6 dia, Deus diskansa di kel trabadju li ô el para di kria. — Génesis 2:1, 2.

**Kel ki Génesis ta fla sobri kriason sta di akordu ku siênsia?**

Bíblia ka ta pâpia tintin pa tintin sobri kriason di mundu sima un livru di siênsia. Envês di kel-la, el ta konta modi ki kriason fazedu di un manera ki ti kes algen ki vive na ténpu ki Bíblia skrebedu, ta konsigiba ntende faxi kel órdi ki kuzas kriadu. Kel ki Bíblia ta fla sobri kriason sta di akordu ku kes kuza ki dja sta provadu na siênsia. Un sientista ki ta studa kuzas na séu, sima planétas i stréla, ki txoma Robert Jastrow, skrebe kel-li: “Manera ki siênsia ku Bíblia ta splika sobri modi ki kuzas parse na séu ku Téra ten diferénsas, má es ta konkorda ku kunpanheru na kel kuza más inportanti: Kes kuza ki kontise ti ki ómi ben parse, kontise dirapenti, na un momentu sértu na ténpu.”

Ki ténpu ki sól, lua, i stréla fazedu?

Sól, lua i stréla dja staba ta faze párti di ‘séu’ ki fazedu ‘na komésu’. (Génesis 1:1) Má, ta parse ma ses lus ka ta txigaba na Téra pamodi atimosféra éra mutu grós pa dexa lus pasa. (Génesis 1:2) Nton, nbóra ta daba pa odja lus na kel primeru dia di kriason, inda ka ta daba pa odja di undi ki lus staba ta ben di li di Téra. Na kel kuartu dia, atimosféra fika más klaru. Bíblia ta fla ma dipôs di kel-la sól, lua i stréla kumesa ta ‘límia Téra’, pa mostra modi ki algen pode odjaba lus li di Téra. — Génesis 1:17.

Kantu anu ki Téra ten di akordu ku kel ki Bíblia ta fla?

Bíblia ka ta fla kantu anu ki Téra ten. Génesis 1:1 sô ta fla ma séu ku Téra tevi un komésu. Kel-li ka ta bai kóntra kes prinsípiu di siênsia nen kóntra kel ki sientistas ta fla sobri kantu anu ki Téra ten.