Modi ki nu pode kontinua ku nos amor fórti pa kunpanheru

1-2. (a) Pamodi ki apóstlu Paulu fla ma amor é kel kualidadi “más inportanti”? (b) Ki perguntas nu sta ben odja?

KANTU apóstlu Paulu staba ta pâpia di fé, speransa i amor el fla ma “kel más inportanti di kes três [kualidadi] é amor.” (1 Kor. 13:13) Pamodi ki Paulu fla kel-li? Pamodi na futuru, nu ka ta meste más ten fé na promésas di Deus di un mundu novu dja ki kes kuza li ta sta ta kontise. Má sénpri nu ta meste ten amor pa Jeová i pa pesoas. Na verdadi, nos amor pa es ta ba ta bira más txeu pa tudu ténpu.

² Dja ki sénpri nu meste ten amor, nu ta ben odja três pergunta. Primeru, pamodi ki nu debe ama kunpanheru? Sugundu, modi ki nu ta mostra amor pa kunpanheru? I tirseru, modi ki nu pode kontinua ku nos amor fórti pa kunpanheru?

PAMODI KI NU DEBE AMA KUNPANHERU?

3. Ki motivus nu ten pa nu mostra amor pa kunpanheru?

³ Pamodi ki é inportanti nu ama kunpanheru? Un motivu é pamodi óras ki nu ta mostra amor pa nos irmons nu ta prova ma nos é kristons verdaderu. Jizus fla se apóstlus: “Tudu algen ta fika ta sabe ma nhos é nhas disiplu, si nhos ten amor pa kunpanheru.” (Juan 13:35) Tanbê, ten amor pa kunpanheru ta djuda-nu kontinua unidu. Apóstlu Paulu fla ma amor ta “uni tudu algen di manera konplétu.” (Kol. 3:14) Má ten otu motivu inportanti pa nu ten amor pa kunpanheru. Apóstlu Juan fla se irmons ku irmans: “Kel ki ta ama Deus tanbê debe ama se irmon.” (1 Juan 4:21) Óras ki nu ta mostra amor pa kunpanheru, nu ta prova ma nu ta ama Deus.

4-5. Da un izénplu ki ta mostra modi ki nos amor pa Deus sta ligadu ku nos amor pa kunpanheru.

⁴ Di ki manera ki nos amor pa Deus sta ligadu ku amor ki nu ta mostra pa nos irmons ku irmans? Pur izénplu, pensa na kel ligason ki nos korason ten ku otus párti di korpu. Óras ki un dotor ta palpa nos pulsu pa djobe si el sta fraku ô fórti, el ta konsigi ten alguns informason sobri modi ki nos korason sta. Kuzê ki nu ta prende ku kel izénplu li?

⁵ Óras ki un dotor ta palpa nos pulsu, el pode sabe si nos korason sta fórti ô nau. Di mésmu manera, nu pode sabe si nos amor pa Deus é fórti si nu djobe modi ki nos amor pa kunpanheru sta. Si nu odja ma nos amor pa irmons sta ta bira más fraku, kel-li pode mostra ma nos amor pa Deus sta ta fika más fraku. Má si sénpri nu ta mostra amor pa nos irmon, kel-li é un sinal ma nos amor pa Deus sta fórti.

6. Si nos amor pa nos irmons ku irmans sta fika fraku, pamodi ki kel-li é un prubléma gravi? (1 Juan 4:7-9, 11)

⁶ Si nos amor pa nos irmons ku irmans sta fika fraku, kel-li é un prubléma gravi. Pamodi? Pamodi kel-li krê fla ma nu sta kóre risku di perde nos amizadi ku Jeová. Apóstlu Juan dexa kel-li klaru kantu el fla: “Ken ki ka ta ama se irmon ki el ta odja, ka ta pode ama Deus ki el ka ta odja.” (1 Juan 4:20) Kuzê ki nu ta prende? Nu ta pode agrada Jeová sô si nu “ama kunpanheru”. — Lé 1 Juan 4:7-9, 11.

MODI KI NU TA MOSTRA AMOR PA KUNPANHERU?

7-8. Kal ki é alguns manera ki nu ta mostra nos amor pa nos irmons ku irmans?

⁷ Na Palavra di Deus, txeu bês nu ta atxa kel mandamentu di “ama kunpanheru”. (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11) Má, amor é un sentimentu déntu di nos ki ningen ka ta pode odja. Nton, modi ki otus algen pode sabe ma nu ta ama-s? Através di kuzas ki nu ta fla i ki nu ta faze.

⁸ Ten txeu manera ki nu pode mostra nos amor pa irmons ku irmans. Odja alguns izénplu: ‘Nhos fla kunpanheru verdadi’. (Zac. 8:16) “Nhos mante pas ku kunpanheru.” (Mar. 9:50) “Nhos ser primeru na da ónra pa kunpanheru.” (Rom. 12:10) “Nhos resebe kunpanheru dretu”. (Rom. 15:7) “Nhos kontinua... ta púrdua kunpanheru”. (Kol. 3:13) “Nhos kontinua ta leba karga di kunpanheru”. (Gál. 6:2) “Nhos kontinua ta konsola kunpanheru”. (1 Tes. 4:18) “Nhos kontinua... ta djuda kunpanheru”. (1 Tes. 5:11) “Nhos ora pa kunpanheru”. — Tia. 5:16.

9. Pamodi ki konsola otus algen é un manera inportanti di mostra-s ma nu ta ama-s? (Odja fotus.)

⁹ Nu ben odja un di kes manera ki nu pode mostra amor pa kunpanheru. Paulu fla: “Nhos kontinua ta konsola kunpanheru”. Pamodi ki konsola otus algen é un manera inportanti di mostra nos amor pa es? Un livru ki ta pâpia sobri Bíblia fla ma kel palavra ki Paulu uza pa “konsola” krê fla “fika na ladu di un algen pa da-l koraji óras ki el sta pasa pa un situason difísil.” Nton, óras ki nu ta konsola un irmon ô un irman ki sta ta sufri, nu ta djuda-l kontinua ta sirbi Jeová di manera fiel. I kada bês ki nu ta konsola un irmon ô un irman, nu sta ta mostra-l ma nu ta ama-l. — 2 Kor. 7:6, 7, 13.

10. Di ki manera xinti konpaxon i da otu algen konsolu sta ligadu ku kunpanheru?

¹⁰ Xinti konpaxon i da un algen konsolu sta ligadu ku kunpanheru. Di ki manera? Óras ki un algen ta xinti konpaxon pa algun algen ki sta ta sufri, el ta krê konsola-l i faze algun kuza pa djuda-l. Nton, óras ki nu ta xinti konpaxon, kel-li ta djuda-nu konsola otus algen. Paulu splika ma konpaxon ki Jeová ta xinti pa pesoas ta motiva-l pa el konsola-s. Paulu fla ma Jeová “é Pai xeiu di mizerikórdia i Deus di tudu konsolu”. (2 Kor. 1:3) Li Paulu uza palavras “xeiu di mizerikórdia” pa pâpia di sentimentu di konpaxon pa otus algen. Pur isu, “Deus ta txomadu di Pai ô Fonti xeiu di mizerikórdia pamodi el ta xinti txeu konpaxon pa otus algen.” I kel konpaxon li ta motiva-l pa el “konsola-nu na tudu nos prubléma.” (2 Kor. 1:4) Sima un fonti di agu ta da forsa pa algen ki sta ku sedi, Jeová ta da forsa i konsolu pa kes algen ki sta ta pasa pa prublémas. Modi ki nu pode imita Jeová i xinti konpaxon pa otus i konsola-s? Un manera di faze kel-li é dizenvolve kualidadis na nos korason ki ta djuda-nu xinti konpaxon i konsola otus. Kal ki é alguns di kes kualidadi?

11. Sima sta na Kolosensis 3:12 i na 1 Pedru 3:8, ki kualidadis nu meste dizenvolve pa kontinua ku kel amor ki ta djuda-nu konsola otus?

¹¹ Kuzê ki ta djuda-nu kontinua ta ten kel amor ki nu meste pa nu “kontinua ta konsola kunpanheru” na nos dia-dia? Nu meste dizenvolve kualidadis sima poi na lugar di otus, mostra amor di korason i bondadi. (Lé Kolosensis 3:12; 1 Pedru 3:8.) Modi ki kes kualidadi li ta djuda-nu? Óras ki nu ta xinti konpaxon pa nos irmons i nu ta inporta ku es di korason, nu ta xinti un dizeju fórti di konsola-s óras ki es sta ta sufri. Jizus fla: “Pamodi bóka ta pâpia di kel ki korason sta xeiu. Un ómi ki ten kuzas dretu na se korason, ta pâpia kuzas dretu.” (Mat. 12:34, 35) Konsola nos irmons ku irmans ki sta meste é un manera inportanti di mostra nos amor pa es.

MODI KI NU PODE KONTINUA KU NOS AMOR FÓRTI PA KUNPANHERU?

12. (a) Pamodi ki nu meste toma kuidadu pa nu ka perde nos amor pa nos irmons? (b) Ki pergunta nu sta ben odja?

¹² Nos tudu nu krê “kontinua ta ama kunpanheru”. (1 Juan 4:7) Má é inportanti nu lenbra kel avizu di Jizus ma ‘amor di maioria di algen ta ben friaba.’ (Mat. 24:12) Jizus ka krê flaba ma maioria di se disiplus ta paraba di mostra amor pa kunpanheru. Má, nu meste toma kuidadu pa nu ka dexa atitudi di pesoas di mundu afeta manera ki nu ta trata otus algen. Ku kel-li na menti, nu ben odja kel pergunta inportanti li: Kuzê ki ta djuda-nu sabe si nos amor pa nos irmons é fórti?

13. Kuzê ki ta djuda-nu sabe si nos amor pa nos irmons é fórti?

¹³ Un di kes manera ki nu ta sabe si nos amor pa nos irmons é fórti ô nau, é odja modi ki nu ta reaji na alguns situason na vida. (2 Kor. 8:8) Apóstlu Pedru pâpia di un di kes situason. El fla: “Antis di tudu, nhos ten amor fórti pa kunpanheru, pamodi amor ta kubri un monti pekadu.” (1 Ped. 4:8) Nton, kuzê ki ta djuda-nu sabe si nos amor pa nos irmons é fórti, é óras ki es ta fadja ô óras ki es ta faze algun kuza ki ta magua-nu.

14. Sima sta na 1 Pedru 4:8, ki tipu di amor nu meste ten? Da un izénplu.

¹⁴ Nu pensa ku kuidadu na kes palavra di Pedru. Primeru párti di versíklu 8 ta mostra ki tipu di amor ki nu meste ten pa kunpanheru, ki é “amor fórti”. Palavra ki Pedru uza pa “fórti” krê fla “stika.” Sugundu párti di kel versíklu ta fla kuzê ki amor fórti pode faze. El ta kubri pekadu di nos irmons. Nu pode konpara kel-li ku un panu ki nu ta stika di tal manera ki el ta kubri, ka un nen dôs, má “un monti pekadu.” “Kubri” é un manera di fla púrdua. Sima un padás di panu pode kubri un mantxa, amor pode kubri frakézas i inperfeisons di otus.

15. Si nos amor pa nos irmons ku irmans é fórti, kuzê ki nu ta sta prontu pa faze? (Kolosensis 3:13)

¹⁵ Nos amor pa nos irmons debe ser fórti di tal manera, ki ta da pa nu púrdua ses inperfeison sikrê kel-li é txeu difísil. (Lé Kolosensis 3:13.) Óras ki nu ta púrdua otus algen nu ta mostra ma nos amor é fórti i nu ta dexa Jeová kontenti. Kuzê más ki ta djuda-nu púrdua fadja di otus i ka xatia faxi ku kuzas mariadu ki es ta faze?

16-17. Kuzê más ki ta djuda-nu púrdua pekadus pikinoti di otus algen? Da un izénplu. (Odja fotus.)

¹⁶ Konsentra na kes kuza puzitivu di bus irmon ku irmans, envês di kes kuza negativu. Pensa na kel izénplu li: Imajina ma bu sta na un konvíviu ku un grupu di irmon ku irmans. Nhos sta ta divirti i na fin di konvíviu nhos krê tra un fotu djuntu. Na verdadi, bu ta tra más dôs fotu pa ten serteza ma tudu algen fika dretu. Gósi, bu ten três fotu. Má na un di es bu ta repara ma un irmon ka sai dretu. Kuzê ki bu ta fazeba ku kel fotu? Bu ta paga-l pamodi bu tene kes otu dôs fotu. I na es, tudu algen sta dretu i kel irmon tanbê.

¹⁷ Nu pode konpara kes fotu ki bu tra ku kes lenbransa ki bu ten. Di serteza bu ta lenbra di bons momentu ki bu pasa ku bus irmon ku irmans. Má talvês, na un di kes situason, un irmon ô un irman fla ô faze un kuza ki magua-u. Kuzê ki bu ta fazeba ku kel lenbransa? Pamodi ki bu ka ta tenta paga-l sima bu ta pagaba un di kes fotu ki ka sai dretu? (Pro. 19:11; Efé. 4:32) Nu pode skese di pekadus pikinoti di nos irmons ku irmans pamodi nu ten bons lenbransa di ténpu ki nu pasa djuntu ku es. Kes-li é kes tipu di lenbransa ki nu krê guarda i ki nu ta da valor.

PAMODI KI AMOR É TXEU INPORTANTI OJI

18. Ki kuzas inportanti sobri amor nu odja na kel studu li?

¹⁸ Pamodi ki nu meste kontinua ku nos amor fórti pa kunpanheru? Sima dja nu odja, óras ki nu ta mostra amor pa nos irmons ku irmans, nu ta mostra ma nu ta ama Jeová. Modi ki nu pode mostra amor pa nos irmons? Un manera é óras ki nu ta da-s konsolu. Nu ta konsigi “kontinua ta konsola kunpanheru” si nu mostra konpaxon. Modi ki nu pode kontinua ku nos amor fórti pa kunpanheru? É óras ki nu ta faze tudu kel ki nu ta pode pa púrdua fadjas di otus.

19. Pamodi ki oji é más inportanti inda mostra amor pa kunpanheru?

¹⁹ Pamodi ki oji é más inportanti inda mostra nos amor pa kunpanheru? Repara kuzê ki Pedru fla: “Má fin di tudu kes kuza li sta pértu. Pur isu,... nhos ten amor fórti pa kunpanheru”. (1 Ped. 4:7, 8) Sima fin di kel mundu mau li sta kuazi ta txiga, kuzê ki nu pode spera? Jizus da kel avizu li pa se disiplus: “Tudu nason ta ben ôdia nhos pamodi nha nómi.” (Mat. 24:9) Pa nu aguenta kel ódiu li, nu meste kontinua unidu. Si nu ama nos irmons ku irmans, Satanás nunka ka ta pode dividi-nu pamodi amor ta “uni tudu algen di manera konplétu.” — Kol. 3:14; Fil. 2:1, 2.