Un disizon ki bu debe toma
Manera ki nu ta disidi vive ta afeta nos vida. Jeová Deus sabe di kel-li. É pamodi kel-li ki el krê pa nu vive di akordu ku kel ki el ta atxa ma é dretu ô mariadu.
Jeová krê pa nu ten pas i filisidadi.
‘Ami, Jeová, mi é bu Deus, kel ki ta inxina-u kuzê ki é midjór pa bo, kel ki ta gia-u na kaminhu ki bu debe anda. Éra bon si bu prestaba atenson na nhas mandamentu. Nton, bu pas ta sérba sima un riu, i bu justisa sima óndias di mar.’ — Isaías 48:17, 18.
Dja ki Deus é nos Kriador, el sabe kal ki é midjór manera ki nu debe vive. El krê pa nu sigi se orientasons pamodi kel-li é bon pa nos. Óras ki nu ta faze kel ki Deus ta fla-nu, nu ka meste fika preokupadu ta pergunta si kel disizon ki nu ta toma ta ten bons rezultadu ô nau. Sénpri nu ta toma bons disizon i kel-li ta da-nu pas i filisidadi.
Jeová ka ta pidi-nu pa nu faze kel ki nu ka ta konsigi faze.
‘Kel mandamentu li ki N sta da-u oji, é ka difísil dimás pa bu kunpri, nen el ka sta lonji di bo.’ — Deuteronómio 30:11.
Pa nu vive di akordu ku kes prinsípiu di Deus sobri konportamentu, talvês nu meste muda nos manera di pensa i aji. Má, Jeová ka ta iziji dimás di nos. Dja ki el é nos Kriador, el sabe kuzê ki nu ta konsigi faze. I óras ki nu ta ba ta konxe Jeová, nu ta da kónta ma “se mandamentus é ka pizadu”. — 1 Juan 5:3.
Jeová promete ma el ta djuda kes ki disidi vive di akordu ku se prinsípius.
‘Ami, Jeová, bu Deus, N ta pega bu mô direita; ami é kel ki ta fla-u: “Ka bu ten medu. N ta ba djuda-u.”’ — Isaías 41:13.
Nu pode vive di akordu ku kes lei di Deus sobri konportamentu pamodi el ta djuda-nu faze kel-li. El pode djuda-nu através di Bíblia, ki é se Palavra, ki ta inkoraja-nu i da-nu speransa.
Milhons di algen na mundu interu da kónta ma ses vida midjora kantu es kumesa ta vive di akordu ku kes lei di Deus. Pamodi ki bu ka ta prende más sobri kes bon konsedju ki Bíblia ta da? Bu pode uza bruxura Vive filís pa tudu ténpu! pa bu faze kel-li. El sta disponível na jw.org i bu ka ta paga nada pa tene-l. El ten três lison:
Modi ki Bíblia pode djuda-u?
Bíblia ta da-u speransa
Bu pode kunfia na Bíblia?
Óras ki bu ta studa Bíblia, ki é Palavra di Deus, bu pode da kónta ma el ka sta dizatualizadu i ma el ‘é sénpri di kunfiansa, gósi i pa tudu ténpu’. (Salmo 111:8) Óras ki nu ta sigi kes lei di Deus sobri konportamentu ki nu ta atxa na Bíblia, nu ta vive di midjór manera. Má, Deus ka ta obriga-nu pa nu faze kel-li. (Deuteronómio 30:19, 20; Josué 24:15) Kel-li é un disizon ki kada un di nos meste toma.