Bu sabia?

Modi ki nu sabe ma múzika éra un kuza txeu inportanti na vida di kes israelita?

MÚZIKA éra un kuza txeu inportanti na kultura di kes israelita na ténpu antigu. Txeu bês, Bíblia ta pâpia di pesoas ki ta tokaba i ta kantaba. Na verdadi, txeu párti di Bíblia sima Salmos, Cântico de Salomão, i Lamentações skrebedu pa kanta. Un livrua ki ta pâpia di vida na ténpu ki Bíblia skrebedu ta fla ma Bíblia ta mostra klaru ma kes israelita ta uzaba múzika na txeu atividadi di ses dia-dia.

Múzika na ses dia-dia. Kes israelita ta tokaba i ta kantaba múzikas pa mostraba kuzê ki es staba ta xinti. (Isa. 30:29) Mudjeris ta tokaba panderu, es ta kantaba ku txeu alegria i es ta badjaba duránti kes fésta ki es ta fazeba. Pur izénplu, es ta fazeba kel-li óras ki un algen biraba rei, óras ki kes trópa ganhaba géra i na kes fésta di adorason. (Juí. 11:34; 1 Sam. 18:6, 7; 1 Reis 1:39, 40) Kes israelita tanbê ta kantaba múzikas pa mostra ses tristéza óras ki un algen moreba. (2 Cró. 35:25) Un ensiklopédiab ta fla ma ta fika klaru ma kes israelita gostaba txeu di múzika.

Múzika na palásiu. Kes rei di Israel gostaba di múzika. Rei Saul txoma Davidi pa se palásiu pa ba tokaba arpa pa el. (1 Sam. 16:18, 23) Dipôs ki Davidi bira rei, el faze txeu instrumentu di múzika, el skrebe múzikas bunitu i el organiza pesoas pa kanta na ténplu di Jeová. (2 Cró. 7:6; Amós 6:5) Tanbê rei Salumon tinha ómis ku mudjer ki ta kantaba na se palásiu. — Ecl. 2:8.

Múzika na adorason. Más inportanti inda, kes israelita ta uzaba múzika na adorason pa Jeová. Na verdadi, 4 mil ómi ta tokaba instrumentus na ténplu na Jiruzalen. (1 Cró. 23:5) Es ta tokaba sínbalu, instrumentu di korda, arpa i tronbéta. (2 Cró. 5:12) Má ka éra sô kes ómi li ki éra bon na toka ki ta uzaba múzika pa adora Jeová. Txeu israelita ta kantaba kes Kántiku di Subida óras ki es ta viajaba pa kes fésta ki es ta fazeba tudu anu na Jiruzalen. (Sal. 120-134) Di akordu ku un livru di judeus, israelitas ta kantaba kántikus di Halelc duránti komemorason di Páskua.

Oji, múzika inda é txeu inportanti pa povu di Deus. (Tia. 5:13) Múzika ta faze párti di nos adorason pa Jeová (Efé. 5:19) Múzika ta uni sérvus di Jeová. (Kol. 3:16) I el ta da-nu forsa óras ki nu sta pasa pa prublémas. (Atus 16:25) Múzika é un manera bunitu di mostra nos fé i nos amor pa Jeová.