‘Nhos skodje kenha ki nhos ta sirbi’

1. Kuzê ki nu meste faze pa nu ser filís di verdadi i pamodi? (Isaías 48:17, 18)

NOS Pai na séu ta ama-nu txeu i el krê pa nu ten un vida filís gósi i na futuru. (Ecl. 3:12, 13) El kria-nu ku kualidadis bunitu, má el ka da-nu kapasidadi di governa nos mê ô di disidi di nos pa nos kuzê ki é dretu ô mariadu. (Ecl. 8:9; Jer. 10:23) El sabe ma pa nu ser filís di verdadi, nu meste sirbi-l i obi ku el. — Lé Isaías 48:17, 18.

2. Na kuzê ki Satanás krê pa nu kridita i kuzê ki Jeová faze pa mostra ma kel-li é un mintira?

² Satanás krê pa nu kridita ma nu pode ser filís sen ajuda di Jeová i ma nu pode ten bons rezultadu si nu governa nos mê. (Jén. 3:4, 5) Pa prova ma Satanás é mintirozu, Jeová sta ta dexa pesoas governa es mê pa un ténpu. É fásil nu odja kes mau rezultadu di govérnu di ómi. Má Bíblia ten txeu izénplu di ómi ku mudjer ki tevi un vida filís ta sirbi Jeová. Jizus Kristu foi kel algen ki más xinti filís na faze kel-li. Primeru, nu ta ben odja kes motivu ki pô-l ta skodje sirbi Jeová. Dipôs, nu ta ben odja pamodi ki nos Pai na séu ta merese nos adorason. I na fin, nu ta ben odja alguns motivu ki pô-nu ta skodje sirbi Jeová.

PAMODI KI JIZUS SKODJE SIRBI JEOVÁ?

3. Kuzê ki Satanás oferese Jizus i kuzê ki Jizus skodje faze?

³ Kantu Jizus staba na téra, el tinha ki skodje ken ki el ta sirbiba. Lógu dipôs ki Jizus batiza, Satanás fla ma el ta daba Jizus tudu reinu di mundu si Jizus adoraba el sô un bês. Jizus fla-l: “Sai di li Satanás! Pamodi sta skrebedu: ‘É Jeová, bu Deus, ki bu debe adora i é sô pa el ki bu debe faze sirvisu sagradu.’” (Mat. 4:8-10) Pamodi ki Jizus skodje faze kel-li? Nu ben odja alguns motivu.

4-5. Kal ki é alguns kuza ki poi Jizus ta sirbi Jeová?

⁴ Kuzê ki más poi Jizus ta skodje sirbi Jeová é amor. Jizus ten un amor fórti i ki ka ta kaba pa se Pai. (Juan 14:31) Alén di kel-li, Jizus skodje sirbi Jeová pamodi kel-li é kuzê ki nu debe faze. (Juan 8:28, 29; Apo. 4:11) El sabe ma Jeová é fonti di vida i ma nu pode kunfia na El i El gosta di da. (Sal. 33:4; 36:9; Tia. 1:17) Jeová sénpri fla Jizus verdadi i el da-l tudu kuza ki el tinha. (Juan 1:14) Má Satanás é totalmenti diferenti di Jeová. El ta pô-nu ta móre. El é un mintirozu, ganansiozu i el ta pensa sô na se kabésa. (Juan 8:44) Jizus sabia kes kuza li, pur isu nunka el ka pensa na imita kel manera rebéldi ki Satanás aji kóntra Jeová. — Flp. 2:5-8.

⁵ Un otu kuza ki poi Jizus ta skodje sirbi Jeová é pamodi el sabia ma si el kontinuaba lial pa Jeová ta kontiseba txeu kuza bon. (Ebr. 12:2) El sabia ma si el kontinuaba fiel el ta pode santifikaba nómi di se Pai i kel-li ta kababa ku tudu kes sufrimentu ki Diabu faze.

PAMODI KI JEOVÁ MERESE NOS ADORASON?

6-7. Pamodi ki txeu algen oji ka ta adora Jeová, má pamodi ki el merese nos adorason?

⁶ Txeu algen oji ka ta sirbi Jeová pamodi inda es ka konxe se kualidadis bunitu i kes kuza bon ki dja el faze pa es. Kes algen na Atenas ki apóstlu Paulu prega pa es éra si. — Atus 17:19, 20, 30, 34.

⁷ Paulu splika pa kes algen ki staba ta obi-l, ma é kel Deus verdaderu ki “da tudu algen vida, folgu i tudu kuza.” Tanbê el fla: “Através di el nu ten vida, nu ta mexe i nu ta izisti”. Deus é Kriador, el “faze di un sô ómi tudu nason,” pur isu el merese nos adorason. — Atus 17:25, 26, 28.

8. Kuzê ki nunka Jeová ka ta faze? Splika.

⁸ Dja ki Jeová é Kriador i kel Más Grandi di universu, el podia obrigaba tudu algen sirbi-l. Simé, Jeová nunka ka ta faze kel-li. El ta da-nu próva ma el ta izisti i ma el ta ama kada un di nos txeu. El krê pa tudu algen ser se amigu pa tudu ténpu. (1 Tim. 2:3, 4) Pur isu, Jeová ta trena-nu pa nu inxina otus algen sobri se vontadi i fla-s sobri kes kuza bon ki el ta ben faze pa tudu algen. (Mat. 10:11-13; 28:19, 20) El da-nu kongregason, undi ki nu ta pode adora-l i resebe ajuda di kes ansion ki ta ama-nu. — Atus 20:28.

9. Di ki maneras Jeová ta mostra se amor pa tudu algen?

⁹ Jeová ta mostra se amor óras ki el ta da kuzas bon tanbê pa kes algen ki ka krê kridita ma el ta izisti. Pensa na kel-li: dja ten milharis di anu ki txeu algen ta disidi vive di akordu ku kuzê ki es ta pensa ma é dretu ô mariadu, envês di obi ku Jeová. Má simé, Jeová ku bondadi ta da-s kes kuza ki es meste pa es kontinua ta vive i ten un vida sábi. (Mat. 5:44, 45; Atus 14:16, 17) Pamodi el, es pode ten amigus i família ki ta ama-s, es pode ten fidju, ten trabadju i pruveta vida. (Sal. 127:3; Ecl. 2:24) Kes kuza li ta prova ma nos Pai na séu ta ama tudu algen. (Ézu. 34:6) Gósi, nu ta ben lenbra alguns di kes motivu ki pô-nu ta skodje sirbi Jeová i modi ki el abensua-nu.

PAMODI KI NU SKODJE SIRBI JEOVÁ?

10. (a) Kuzê ki más ta pô-nu ta sirbi Jeová? (Mateus 22:37) (b) Modi ki paxénxa di Jeová dja djuda-u? (Salmo 103:13, 14)

¹⁰ Sima Jizus, kuzê ki más ta pô-nu ta sirbi Jeová é nos amor pa El. (Lé Mateus 22:37.) Nu ta xinti más amigu di Jeová óras ki nu ta prende sobri ses kualidadi. Pur izénplu, pensa na paxénxa ki Jeová ten ku nos. Kantu kes israelita dizobidese Jeová, el pidi-s: ‘Favor nhos sai di nhos mau kaminhu’. (Jer. 18:11) Jeová ta lenbra ma nos é inperfeitu i ma nos é di téra. (Lé Salmo 103:13, 14.) Óras ki bu ta midita na paxénxa i otus kualidadi ki Jeová ten, bu ka ta xinti motivadu na krê sirbi-l pa tudu ténpu?

11. Ki otus kuza pô-nu ta skodje sirbi nos Pai na séu?

¹¹ Nu ta xinti motivadu na sirbi Jeová pamodi kel-li é un kuza dretu ki nu debe faze. (Mat. 4:10) Tanbê, nu sabe ma si nos é lial pa Jeová txeu kuza bon ta kontise. Pur izénplu, nu ta djuda santifika nómi di Jeová, nu ta prova ma Diabu é mintirozu i nu ta poi korason di nos Pai ta fika kontenti. I si nu skodje sirbi Jeová oji, nu ta ten oportunidadi di ben sirbi-l pa tudu ténpu! — Juan 17:3.

12-13. Kuzê ki nu ta prende ku spiriénsia di Juana i Paula?

¹² Timenti nos é jóven nu pode dizenvolve un amor fórti pa Jeová, i nos amor ta fika más fórti sima nu ta ba ta kria. Odja un izénplu di dôs irman di sangi ki txoma Juana i Paula.a Juana tinha 11 anu i Paula tinha 10 anu kantu es kumesa ta studa Bíblia. Enbóra pai ku mai di Juana i Paula ka staba interesadu na studa Bíblia, es dexa-s studa Bíblia ku Tistimunhas di Jeová ma es tinha ki kontinua ta bai pa igreja djuntu ku se família na fin di simana. Juana fla: “Kuzê ki Tistimunhas di Jeová inxina-m na Bíblia djuda-m aguenta preson ki nhas koléga ta faze-m pa N uza dróga i faze konportamentu seksual mariadu.”

¹³ Uns anu dipôs, kes dôs minina bira publikador. Dipôs es bira pionera timenti es ta kuidaba di ses pai ku mai ki dja staba algen grandi. Juana splika modi ki el xinti sobri tudu kuza ki Jeová dja faze pa el. El fla: “N odja na nha vida ma Jeová ta kuida di ses amigu ku lialdadi i ma ‘Jeová konxe kes ki é di Sel’, sima 2 Timótiu 2:19 ta fla.” Nu ka ten dúvida ma Jeová ta kuida di kes algen ki skodje ama-l i sirbi-l!

14. Modi ki kuzas ki nu ta fla i kuzas ki nu ta faze ta djuda na linpa nómi di Jeová? (Odja fotus.)

¹⁴ Nu krê pa otus algen konxe verdadi sobri Jeová. Pensa na kel izénplu li: bu ten un amigu ki ta trata otus ku bondadi, ki gosta di da i ki ta púrdua faxi. Un dia bu ta obi un algen ta fla ma bu amigu é kruel i dizonéstu. Kuzê ki bu ta fazeba? Bu ta difendeba el. Di mésmu manera óras ki Satanás i kes algen ki el ta influensia ta tenta mantxa nómi di Jeová, ta spadja mintira sobri El, nu ta pâpia verdadi sobri Jeová i ku zelu nu ta difende Se nómi. (Sal. 34:1; Isa. 43:10) Nu ta mostra ma nu krê sirbi Jeová di tudu nos alma através di kuzas ki nu ta fla i di kuzas ki nu ta faze.

15. Ki bons rezultadu apóstlu Paulu tevi pamodi el muda se obijetivu? (Filipensis 3:7, 8)

¹⁵ Nu sta prontu pa muda nos obijetivu na vida pa nu pode sirbi Jeová di manera ki el ta krê ô pa nu faze más na se sirvisu. Pur izénplu, apóstlu Paulu tinha un puzison inportanti na relijion di judeus, má el dexa kel relijion pa el pode biraba un disiplu di Jizus i sirbi Jeová. (Gál. 1:14) Pamodi kel-li el tevi spiriénsias txeu sábi na se vida i el resebe xansi di ba governa ku Jizus na séu. Nunka el ka rapende di se disizon di sirbi Jeová i nos tanbê nu ka ta ben rapende di kel-li. — Lé Filipensis 3:7, 8.

16. Kuzê ki nu ta prende ku izénplu di Júlia? (Odja fotus.)

¹⁶ Si sirbi Jeová é kel kuza más inportanti na nos vida, el ta abensua-nu gósi i na futuru. Odja izénplu di un irman ki txoma Júlia. Antis di konxe verdadi, Júlia ta kantaba na un igreja kantu el éra pikinoti. Un algen ki é profisional di ópera rekonhese se taléntu i el kumesa ta trena-l. Lógu Júlia bira famoza i el kumesa ta kanta na lugaris famozu. Timenti el staba na un skóla famozu di múzika un koléga kumesa ta pâpia ku el sobri Deus i ta mostra-l ma Deus ten un nómi, ki é Jeová. Lógu dipôs di kel-li Júlia kumesa ta studa Bíblia dôs bês pa simana. Ku ténpu el disidi gasta se ténpu i forsa ta sirbi Jeová envês di bira un kantora di ópera. Kel disizon ka foi fásil. El fla: “Txeu algen fla-m ma N ka staba ta uza kel don ki N tinha, má N krê uza nha vida di manera konplétu pa sirbi Jeová.” Modi ki el ta xinti oji sobri kuzê ki el skodje faze dja ten más di 30 anu? El fla: “Mi é filís pamodi N skodje sirbi Jeová i N sabe ma na futuru Jeová ta ben satisfaze tudu kes kuza ki nha korason gosta.” — Sal. 145:16.

KONTINUA TA SIRBI JEOVÁ!

17. Modi ki sabe ma nu sta vive kada bês más pértu di fin di es mundu ta afeta kes algen ki dja skodje sirbi Deus i kes ki inda ka skodje faze kel-li?

¹⁷ Nu sta ta vive kada bês más pértu di fin di es mundu. Apóstlu Paulu fla: “Pamodi ‘más un bokadinhu’, i ‘kel ki ta ben ta txiga, i el ka ta dimora.’” (Eb. 10:37) Modi ki kel-li ta afeta-nu? Kel ténpu ki falta pa pesoas skodje sirbi Jeová é poku. (1 Kor. 7:29) I si dja nu skodje sirbi Jeová, nu pode ten serteza ma kes difikuldadi ki nu ta pasa pa el, é sô pa “más un bokadinhu” di ténpu.

18. Kuzê ki Jeová i Jizus krê pa nu faze?

¹⁸ Jizus inkoraja ses disiplu ka sô pa kumesa ta sigi-l, má tanbê pa es kontinua ta sigi-l. (Mat. 16:24) Si dja nu ten txeu anu ta sirbi Jeová, nu meste sta disididu na kontinua ta sirbi-l. Nu ten ki sforsa txeu pa nu mante nos disizon di sirbi-l. Pode ka ser fásil, má nu pode ten txeu benson i filisidadi mésmu gósi! — Sal. 35:27.

19. Kuzê ki nu ta prende ku spiriénsia di Juzé?

¹⁹ Alguns algen ta xinti ma pa es sirbi Jeová es ten ki faze txeu sakrifisiu. Si bo é jóven, bu ta xinti ma si bu sirbi Jeová, bu pode perde algun kuza? Un irmon jóven, ki txoma Juzé, fla: “N ta xintiba ma N ka pode pasaba sábi pamodi mi éra Tistimunha di Jeová. Ta parseba ma txeu di kes mininu ki nu kria djuntu ta fazeba kuzas sábi, sima bai pa fésta, namora, djuga jogus violéntu timenti ami, N staba ta uza nha ténpu na runion i pregason.” Modi ki kel manera di pensa li afeta Juzé? Juzé fla: “N kumesa ta leba un vida finjidu i pa un ténpu N staba ta xinti sábi. Má kel-li ka traze-m filisidadi di verdadi. N kumesa ta pensa na kes bons rezultadu ki nu ta ten óras ki nu ta obi ku kes verdadi di Bíblia, i N disidi sirbi Jeová di tudu korason. Désdi kel ténpu ta parse ma Jeová responde tudu nhas orason.”

20. Kuzê ki nu debe sta disididu na faze?

²⁰ Un salmista kanta pa Jeová: ‘Filís é kel algen ki bu ta skodje i ki bu ta traze pa djuntu di bo, pa mora na entrada di bu kaza.’ (Sal. 65:4) Nu krê mante kel mésmu disizon di Juzué: ‘Ami, ku tudu algen di nha kaza, nu ta sirbi Jeová.’ — Jos. 24:15.