Jeová ta djuda-nu ten txeu alegria

1-2. (a) Modi ki txeu algen sta ta xinti oji? (b) Kuzê ki nu sta ben odja na kel studu li?

OJI txeu algen ta faze tudu kel ki es ta pode pa es ser filís. Má simé, es é ka filís di verdadi. Txeu algen sta xinti tristi dimás pamodi es ta atxa ma kuzas ka ta ben midjora. Sérvus di Jeová pode xinti si tanbê. Dja ki nu sta ta vive na “ténpu di fin”, nu pode spera ma nu ta pasa pa situasons i nu ta ten sentimentus ki é difísil lida ku es. — 2 Tim. 3:1.

² Na kel studu li, nu sta ben odja kuzê ki pode tra-nu nos alegria i modi ki nu pode rekupera nos alegria otu bês. Má primeru, nu ben odja ken ki é Fonti di alegria di verdadi.

KEL FONTI DI ALEGRIA DI VERDADI

3. Kuzê ki kriason ta inxina-nu sobri Jeová? (Odja imajen.)

³ Jeová sénpri foi filís i el krê pa nu ser filís tanbê. Pur isu, el faze txeu kuza ki ta pô-nu ta fika kontenti. Pur izénplu, nu ta fika kontenti óras ki nu ta odja nos planéta bunitu, txeu flor ki ten na nos vólta, animal ta brinka i txeu kumida sábi. Deus ta ama-nu di verdadi i el krê pa nu ten alegria na vida!

Elifanti pikinoti: Image © Romi Gamit/Shutterstock; pinguins: Vladimir Seliverstov/500px via Getty Images; kabritu: Rita Kochmarjova/stock.adobe.com; dôs golfinhu: georgeclerk/E+ via Getty Images

4. (a) Pamodi ki Jeová ta kontinua filís, sikrê el sta ta odja txeu sufrimentu ta kontise? (b) Ki prezenti Jeová da-nu? (Salmo 16:11)

⁴ Enbóra Jeová é un “Deus filís”, el sabe ma ten txeu dór i sufrimentu na mundu. (1 Tim. 1:11) Má el ka ta dexa kes kuza li tra-l se alegria. El sabe ma kes kuza li ta ben kabadu ku el i é el mê ki ta ben faze kel-li. El sta ta kontinua ta aguenta ku paxénxa ti ki el ben kaba ku tudu dór i sufrimentu pa tudu ténpu. Timenti kel-li ka kontise, Jeová sabe kuzê ki nu ta pasa pa el i el krê djuda-nu. Kuzê ki el ta faze pa djuda-nu? Un di kes kuza ki el ta faze é da-nu alegria i kel-li é un grandi prezenti. (Lé Salmo 16:11.) Nu ben odja modi ki Jeová da Jizus kel prezenti li.

5-6. Pamodi ki Jizus é filís?

⁵ Di tudu kriason di Jeová, Jizus é kel más filís. Un di kes motivu é pamodi “el é imajen di kel Deus invizível” i el ta imita kes kualidadi di se Pai di manera perfeitu. (Kol. 1:15) Alén di kel-li, Jizus pasa txeu ténpu ku se Pai, ki é Fonti di alegria.

⁶ Jizus é filís pamodi sénpri el ta faze kuzê ki se Pai ta manda-l. (Pro. 8:30, 31; Juan 8:29) É pamodi kel-li ki Jeová ta ama-l txeu. — Mat. 3:17.

7. Kuzê ki ta pô-nu ta ser filís?

⁷ Nos tanbê nu pode ser filís óras ki nu ta bira más amigu di Jeová, ki é Fonti di alegria. Kantu más ténpu nu ta pasa ta prende sobri Jeová i nu ta imita-l, más filís nu ta ser. Tanbê, nu ta ser filís óras ki nu ta faze kes kuza ki Jeová ta pidi-nu pa nu faze i óras ki nu sabe ma nu sta ta agrada-l.a (Sal. 33:12) Má alvês nu pode xinti tristi duránti alguns dia ô duránti txeu ténpu. Kel-li krê fla ma Deus ka sta kontenti ku nos? Klaru ki nau! Nos é inperfeitu i alvês nu ta sufri pamodi dór, tristéza i depreson. Jeová ta intende kel-li. (Sal. 103:14) Nu ben odja ki kuzas pode tra-nu nos alegria i modi ki nu pode rekupera nos alegria otu bês.

KA BU DEXA NADA TRA-U BU ALEGRIA

8. Modi ki prublémas ki nu ta pasa pa el pode afeta-nu?

⁸ Prublémas na vida. Bu sta ta lida ku pirsigison, dizastri na naturéza, pobréza, duénsa ô bedjisa? Óras ki nu ta pasa pa prubléma sima kes-li é fásil nu perde nos alegria, prinsipalmenti si nu ka ta pode faze nada pa muda nos situason. Bíblia ta fla ma ‘korason tristi ta poi spritu dizanimadu’. (Pro. 15:13) Un ansion, ki se irmon i se pai ku se mai móre déntu di 4 anu, fla: “N ta xintiba mi sô i sen ningen pa ajuda-m. Alvês N ta xintiba kasábi pamodi N tinha txeu kuza pa faze i N pasa poku ténpu ku nha pai ku nha mai i nha irmon antis di es móre.” Di mésmu manera, alvês nos prubléma pode ser difísil dimás ki nu pode xinti kansadu i dizanimadu.

9. Kuzê ki pode djuda-nu rekupera nos alegria? (Jeremias 29:4-7, 10)

⁹ Kuzê ki pode djuda-nu rekupera nos alegria? Nu pode ser filís óras ki nu ta para di preokupa ku kuzas ki nu ka ta pode muda i nu ta mostra gratidon pa kes kuza ki nu ten. Mundu ta pô-nu ta pensa ma pa nu ser filís tudu kuza ten ki sta perfeitu. Má kel-li é ka verdadi. Pur izénplu, Jeová flaba kes israelita ki lebadu prézu pa Babilónia, pa es fazeba ses midjór pa es viveba filís la. (Lé Jeremias 29:4-7, 10.) Kuzê ki nu ta prende ku kel-li? Tenta seta bu situason i mostra gratidon pa kes kuza bon ki bu ten na vida. Lenbra ma Jeová ka ta bandona-u. (Sal. 63:7; 146:5) Effie, ki panha un asidenti ki dexa-l paralizadu, fla: “N resebe txeu ajuda di Jeová, di nha família i di kongregason. N ta xinti ma N ka ta sérba gratu si N dizistiba. N krê mostra nha gratidon pa Jeová i pa nhas amigu pa tudu ajuda ki es da-m.”

10. Pamodi ki nu pode ser filís, sikrê nu sta ta pasa pa prublémas?

¹⁰ Mésmu ki nos situason ka sta sima nu ta gostaba, ô óras ki kontise un kuza mariadu ku nos ô ku nos família, simé nu pode ten alegria.b (Sal. 126:5) Pamodi? Pamodi nos alegria ka ta dipende di nos situason. Un pionera ki txoma Maria fla: “Sta kontenti óras ki bu sta ta pasa pa prubléma, ka krê fla ma bu sta ta iginora bus sentimentu. Na verdadi, kel-li krê fla ma bu ka skese di kes promésa di Jeová. Nos Pai ta ben djuda-u kontinua filís ka ta inporta kuzê ki kontise.” Ka ta inporta ki prubléma difísil bu sta ta pasa pa el gósi, es ta ben dizaparse sima marka di pé na areia. Já-já es ta ben kaba pa tudu ténpu i ka ta ben fika ninhun marka di es.

11. Modi ki izénplu di apóstlu Paulu ta djuda-nu?

¹¹ Alvês nu pode kumesa ta pensa ma nu sta ta pasa pa prubléma pamodi Jeová ka sta kontenti ku nos. Si nu sta ta xinti di kel manera li, nu pode pensa na otus sérvu fiel di Jeová ki pasa pa txeu situason difísil. Odja izénplu di apóstlu Paulu. Jizus skodje-l pa el prega notísias sábi “pa nasons i tanbê pa reis i fidjus di Israel.” (Atus 9:15) Kel-li foi un grandi priviléjiu! Má simé, Paulu pasa pa txeu prubléma. (2 Kor. 11:23-27) Enbóra vida di Paulu ka éra fásil ta fika klaru ma Jeová staba kontenti ku el. Na verdadi, Paulu konsigi aguenta kes prubléma pamodi Jeová staba ta djuda-l. (Rom. 5:3-5) Gósi, pensa na bu situason. Bu sta ta aguenta firmi sikrê ku tudu kes prubléma ki bu sta ta pasa pa el? Nton bu pode ten serteza ma Jeová sta kontenti ku bo.

12. Kuzê ki pode kontise si nu ka konsigi faze kel ki nu ta gostaba na nos sirvisu pa Jeová?

¹² Óras ki nu ka ta konsigi faze kel ki nu ta gostaba. (Pro. 13:12) Nos amor i gratidon pa Jeová ta motiva-nu pa nu poi métas na nos sirvisu pa el. Má si pamodi nos situason nu ka sta konsigi alkansa un méta, nu pode fika dizanimadu. (Pro. 17:22) Un pionera ki txoma Holly fla: “N krê baba Skóla pa Pregadoris di Reinu pa N ba sirbiba na otu lugar ô trabadja na konstruson na Ramapo. Má nha situason muda i N ka ta konsigi alkansa nha méta más. N fika diziludidu. Bu ta fika kasábi óras ki bu ta krê faze alguns kuza, má bu ka ta pode.” Txeu algen sta ta xinti di mésmu manera.

13. Si nos situason ka ta dexa-nu faze kel ki nu ta krê fazeba, ki métas ki nu pode poi?

¹³ Kuzê ki pode djuda-nu rekupera nos alegria? Lenbra ma Jeová ka ta iziji dimás di nos. El ka ta spera pa nu faze más di ki kel ki nu ta pode. Jeová ta da-nu valor, sikrê nu ka ta pode faze kel ki otus algen ta faze. Jeová krê pa nu seta nos limitason i pa nu ser fiel. (Miq. 6:8; 1 Kor. 4:2) Jeová ta preokupa más ku kel tipu di algen ki nos é di ki kel ki nu ta konsigi faze. Nu debe spera más di nos kabésa di ki kel ki Jeová ta spera di nos?c É klaru ki nau! Si bu ka ta konsigi faze kel ki bu ta gostaba na bu sirvisu pa Jeová, tenta konsentra na kel ki bu ta pode faze. Bu ta pode djuda trena kes jóven ô inkoraja kes irmon di idadi? Bu ta pode poi méta di txoma un algen ô manda-l un mensajen pa inkoraja-l? Jeová ta fika kontenti óras ki bu ta faze kes kuza ki bu ta pode faze i el ta djuda-u ten txeu alegria na se sirvisu. Tanbê lenbra ma na mundu novu nu ta ben sirbi Jeová di txeu manera ki nen nu ka ta konsigi imajina. Holly ki dja nu papiaba di el antis, fla: “Si N kumesa ta xinti dizanimadu, N ta para i N ta lenbra ma N ta ben vive pa tudu ténpu. Ku ajuda di Jeová N ta ben alkansa alguns di nhas méta na mundu novu.”

14. Kuzê más ki pode tra-nu nos alegria?

¹⁴ Kunfia ma dinheru ô otus kuza ta pô-nu ta ser filís. Alguns algen ta poi kuzas na internet pa poi algen ta pensa ma pa nu ser filís di verdadi nu ten ki agrada nos kabésa. Nu pode kumesa ta kridita ma si nu faze kes kuza ki nu gosta, nu kunpra kuzê ki nu krê i nu viaja pa lugaris diferenti nu ta ser filís di verdadi. É ka mariadu faze kuzas ki nu gosta. Jeová faze-nu pa nu gosta di kes kuza bunitu ki el kria. Má txeu algen da kónta ma kes kuza ki es ta pensaba ma ta daba es alegria, na verdadi tra-s ses alegria. Un pionera ki txoma Eva fla: “Si bu pensa sô na agrada bu kabésa, nada ka ta txiga-u.” Si nu pensa sô na agrada nos kabésa nu ta fika tristi i dizanimadu.

15. Kuzê ki nu pode prende ku izénplu di Salumon?

¹⁵ Nu pode prende ku kuzê ki kontise ku rei Salumon. El faze di tudu pa el agrada se kabésa, má el ka tevi bons rezultadu. Pur izénplu, el tenta kume bons kumida, obi múzika sábi i kunpra tudu kuza ki es ta bendeba na kel ténpu. Má kes kuza li ka da-l alegria. El fla: ‘Odju ka ta farta di odja, nen obidu ka ta farta di obi.’ (Ecl. 1:8; 2:1-11) Alguns algen ta atxa ma si es ten txeu dinheru i es faze kuzê ki es krê, es ta ser filís. Má kel-li é mintira. Kes kuza li nunka ka ta pô-nu ta ser filís di verdadi.

16. Modi ki djuda otus algen ta djuda-nu rekupera nos alegria? (Odja imajen.)

¹⁶ Kuzê ki pode djuda-nu rekupera nos alegria? Jizus inxina-nu ma “nu ta ser más filís óras ki nu ta da di ki óras ki nu ta resebe.” (Atus 20:35) Un ansion ki txoma Alekos fla: “N ta konsentra na faze kuzas sinplis pa otus algen. N ta tenta faze kuzas pikinoti pa djuda-s. Kantu más N ta da, más N ta para di konsentra na mi, pur isu ami é filís.” Kuzê ki bu ta pode faze pa otus algen? Pur izénplu, si bu repara ma un algen sta tristi, tenta fla-l algun kuza pa inkoraja-l. Bu pode ka konsigi rezolve se prubléma, má bu pode konsola-l, obi-l ku atenson, mostra-l konpaxon i lenbra-l di modi ki Jeová ta xinti pamodi El ta preokupa ku el. (Sal. 55:22; 68:19) Tanbê, bu pode lenbra-l ma Jeová ka bandona-l. (Sal. 37:28; Isa. 59:1) Bu pode faze algun kuza sinplis pa djuda-l, sima faze-l kumida ô da un paseiu ku el. Konvida-l pa nhos sai na pregason, kel-li pode pô-l ta xinti más filís. Ser un feraménta na mô di Jeová. Konsentra na otus algen envês di na nos kabésa ta da-nu alegria di verdadi! — Pro. 11:25.

17. Si nu krê ser filís di verdadi, kuzê ki nu meste faze? (Salmo 43:4)

¹⁷ Nu pode ser filís di verdadi si nu kontinua ta bira más amigu di nos Pai na séu. Bíblia ta da-nu serteza ma Jeová é nos ‘grandi alegria.’ (Lé Salmo 43:4.) Nton, ka ta inporta ki prubléma ki nu pasa pa el, nu pode xinti suguru. Pur isu, nu kontinua konsentradu na Jeová, ki é Fonti di nos alegria! — Sal. 144:15.