Amor di Deus ta dura pa tudu ténpu

1-2. Ki prubléma txeu sérvu di Jeová ta pasa pa el?

IMAJINA un barku na meiu di un tenpistadi fórti. Óndias grandi sta ta da-l di un ladu pa kel otu. Kel barku ta bai pa undi ki óndia leba-l si un algen ka bota ánkura. Un ánkura ta djuda un barku kontinua firmi i el ta ivita pa el ka afasta duránti kel tenpistadi.

² Óras ki bu ta pasa pa prublémas difísil, bu pode xinti sima kel barku. Bus sentimentu pode muda faxi. Un dia bu ta xinti kunfiansa ma Jeová ta ama-u i ma el ta djuda-u. Má na kel otu dia bu ta fika ku dúvida si Jeová sta ta odja kuzê ki bu sta ta pasa pa el. (Sal. 10:1; 13:1) Talvês un amigu ta fla-u kuzas pa konsola-u i bu ta xinti midjór pa un ténpu. (Pro. 17:17; 25:11) Má dipôs, kes dúvida ta volta. Bu pode ti pergunta si Jeová ta ama-u. Kuzê ki pode ser sima un ánkura pa bo i djuda-u mante firmi na kel situason li? Ô modi ki bu pode ten serteza ma Jeová ta ama-u i el ta djuda-u i kuzê ki pode djuda-u kontinua ta ten kel serteza li?

3. (a) Kuzê ki siginifika kes palavra ‘amor lial’, ki sta na Salmo 31:7 i 136:1? (b) Pamodi ki nu pode fla ma Jeová é kel maior izénplu na mostra amor lial? (Odja imajen.)

³ Un kuza ki pode djuda-nu kontinua firmi óras ki nu ta pasa pa prubléma é lenbra di amor lial di Jeová. (Lé Salmo 31:7; 136:1.) Kel palavra ki traduzidu pa ‘amor lial’ ta da ideia di un amor fórti i lial ki un algen ten pa otu algen. Jeová é kel maior izénplu na mostra amor lial. Na verdadi, Bíblia ta fla ma el sta “xeiu di amor lial”. (Ézu. 34:6, 7) Tanbê, Bíblia ta fla kel-li sobri Jeová: ‘Amor lial ki bu ten pa tudu kes ki ta invoka-u é grandi.’ (Sal. 86:5) Pensa na kuzê ki kel-li krê fla: Jeová nunka ka ta bandona ses sérvu lial! Lenbra ma Jeová é lial pode ser sima un ánkura ki ta djuda-u mante firmi óras ki bu ta pasa pa prublémas. — Sal. 23:4.

LENBRA MA AMOR DI JEOVÁ É UN ENSINU PRINSIPAL DI BÍBLIA

4. Da izénplu di alguns ensinu prinsipal di Bíblia i splika pamodi ki é difísil dexa di kridita na es.

⁴ Un otu manera ki bu pode aguenta firmi duránti prubléma, é lenbra ma amor di Jeová é un ensinu prinsipal di Bíblia. Kuzê ki kel frazi “ensinu prinsipal di Bíblia” ta siginifika pa bo? Talvês bu ta pensa na kes kuza ki bu prende na Palavra di Deus. Pur izénplu, bu prende ma nómi di Deus é Jeová, ma Jizus é úniku Fidju di Deus, ma mortus ka sabe di nada, ma ta ben ten un paraízu na téra i ma pesoas ta ben vive na el pa tudu ténpu. (Sal. 83:18; Ecl. 9:5; Juan 3:16; Apo. 21:3, 4) Dipôs di seta kes verdadi li, é difísil bu dexa di kridita na es. Pamodi? É pamodi bu da kónta ma es ten bazi na próvas. Nu ben odja modi ki lenbra ma amor di Jeová é un ensinu prinsipal di Bíblia pode djuda-u para di ten dúvida ma Jeová ta odja i el ta preokupa ku kel situason difísil ki bu sta pasa pa el.

5. Splika modi ki un algen ta konsigi bandona ensinus falsu.

⁵ Kantu bu kumesa ta studa Bíblia, kuzê ki djuda-u nega kes ensinu falsu? Talvês bu faze kel-li, kantu bu konpara kuzê ki bu prende na bu relijion ku kuzê ki Bíblia ta inxina. Odja un izénplu: imajina ma antis bu ta kriditaba ma Jizus éra kel Deus Tudu-Poderozu. Má sima bu ba ta studa bu faze kel pergunta li: ‘É kel-li própi ki Bíblia ta inxina?’ Dipôs di studa kuzê ki Bíblia ta inxina sobri kel asuntu li, bu fika ta sabe ma Jizus é ka Deus. Nton bu dexa di kridita na kel ensinu falsu li i bu pasa ta kridita na kuzê ki Bíblia ta fla: Jizus é “kel primeru di tudu kriason,” i “kel úniku Fidju di Deus.” (Kol. 1:15; Juan 3:18) É klaru ki ensinus falsu pode ser sima un “fortaléza” i es é difísil di ronba. (2 Kor. 10:4, 5) Má dipôs ki bu prende verdadi, bu ka torna kumesa ta kridita na kes ensinu falsu. — Flp. 3:13.

6. Pamodi ki bu pode ten serteza ma ‘amor lial di Jeová ta dura pa tudu ténpu’?

⁶ Bu pode faze mésmu kuza ku kuzê ki Bíblia ta inxina sobri amor di Jeová. Óras ki bu ta pasa pa un prubléma, si bu kumesa ta ten dúvida ma Jeová ta ama-u, faze kel pergunta li: ‘N sta ta pensa dretu?’ Konpara kes dúvida ki bu ten ku kuzê ki sta na Salmo 136:1, ki é testu ki tradu téma di es studu. Pamodi ki Jeová fla ma se amor é ‘lial’? Pamodi ki el ripiti 26 bês na Salmo 136 ma ‘se amor lial ta dura pa tudu ténpu’? Sima dja nu odjaba antis, amor lial di Jeová pa se povu é un ensinu prinsipal di Bíblia, sima kes otu ensinu di Palavra di Deus ki nu seta lógu. Kel ideia ma Jeová ka ta da-u valor i ma el ka ta ama-u é mintira. Nega kel mintira li, sima bu nega tudu kes otu ensinu falsu!

7. Da izénplu di alguns testu di Bíblia ki ta da-nu serteza ma Jeová ta ama-nu.

⁷ Bíblia ten txeu otus próva ma Jeová ta ama-nu. Pur izénplu, Jizus fla ses sigidor: “Nhos bale más di ki txeu pardal.” (Mat. 10:31) É Jeová própi ki fla se povu: ‘N ta da-u forsa, sin, N ta djuda-u. N ta pega-u riju ku nha mô direita di justisa.’ (Isa. 41:10) Kel frazi li é klaru. Jizus ka fla: ‘Talvês nhos bale más di ki txeu pardal’. I Jeová ka fla: ‘N pode djuda nhos.’ Envês di kel-li, es fla: “Nhos bale más di ki txeu pardal” i ‘N ta djuda-u.’ Si algun bês bu xinti duvida si Jeová ta ama-u óras ki bu pasa pa un prubléma, kes testu li ka sô ta pô-u ta xinti ma Jeová ta ama-u, má tanbê es ta da-u serteza ma el ta ama-u. Es ten bazi na próva. Si bu ora i bu midita na kel-li, bu ta pode fla kuzê ki sta na 1 Juan 4:16: “Nu konxe amor ki Deus ten pa nos i nu ta kridita na es amor.”a

8. Kuzê ki bu pode faze si di vês en kuandu inda bu tene dúvida ma Jeová ta ama-u?

⁸ Má kuzê ki bu pode faze si di vês en kuandu inda bu ten dúvida ma Jeová ta ama-u? Konpara kuzê ki bu ta xinti ku kuzê ki bu sabe. Nen sénpri nu ka pode kunfia na nos sentimentu, má nu pode kridita na próvas. I Bíblia ta inxina ma amor di Jeová é un próva. Si nu ka ta kridita ma Jeová ta ama-nu, nton nu sta ta iginora se kualidadi más inportanti, ki é amor. — 1 Juan 4:8.

PENSA NA AMOR KI JEOVÁ TEN PA BO

9-10. Kuzê ki Jizus staba ta pâpia sobri el kantu ki el fla kes palavra ki sta na Juan 16:26, 27, ki ta fla: “Nha Pai ta ama nhos”? (Odja imajen.)

⁹ Nu pode prende más sobri amor di Jeová, óras ki nu ta pensa na kuzê ki Jizus fla ses sigidor: “Nha Pai ta ama nhos.” (Lé Juan 16:26, 27.) Jizus ka fla kes palavra li sô pa poi ses disiplu ta xinti sábi. Na verdadi, óras ki nu ta lé kes versiklu antis nu ta odja ma Jizus ka staba ta pâpia ku ses disiplu sobri ses sentimentu. Envês di kel-li, el staba ta pâpia ku es sobri un asuntu diferenti ki éra orason.

¹⁰ Jizus staba ta fla ses disiplu ma es debe fazeba orason na se nómi, má es ka debe oraba pa el. (Juan 16:23, 24) Éra inportanti pa es sabeba di kel-li. Dipôs di se resureison, ses disiplu talvês xinti tentadu na faze orason pa Jizus pamodi Jizus éra ses amigu. Talvês es pensa ma dja ki Jizus ta amaba es txeu, el ta obiba ses orason i el ta pidiba se Pai pa djuda-s. Má Jizus fla-s ma es ka devia pensaba si. Pamodi? Pamodi el fla-s: “Nha Pai ta ama nhos”. Jeová ta ama-nu tantu txeu ki é própi el ki ta obi nos orason. Kel próva li ta faze párti di un verdadi prinsipal di Bíblia sobri orason. Kuzê ki kel-li siginifika pa bo? Na bu studu di Bíblia, bu prende sobri Jizus i bu pasa ta ama-l. (Juan 14:21) Má sima kes primeru disiplu, bu pode faze orason pa Deus ku kunfiansa ma ‘el ta ama-u’. Tudu bês ki bu ta faze orason pa Jeová bu ta mostra ma bu ta kridita na kes palavra li. — 1 Juan 5:14.

INTENDE KUZÊ KI TA PÔ-U TA TEN DÚVIDA

11. Pamodi ki Satanás ta fikaba kontenti si nu xintiba dúvida ma Jeová ta ama-nu?

¹¹ Kuzê ki ta pô-nu ta ten dúvida ma Jeová ta ama-nu? Talvês bu pode fla ma é Satanás ki ta pô-nu ta ten dúvida i kel-li é verdadi. Diabu sta ta ‘djobe-nu pa el divora-nu’ i el ta fikaba kontenti si el pô-nu ku dúvida ma Jeová ta ama-nu. (1 Ped. 5:8) É amor ki poi Jeová ta da-nu resgati, ki é un kuza ki Satanás krê pa nu xinti ma nu ka merese. (Ebr. 2:9) Má kenha ki ta fikaba kontenti si nu xintiba dúvida ma Jeová ta ama-nu? É klaru ki é Satanás. I kenha ki ta fikaba kontenti si nu fikaba dizanimadu i nu para di sirbi Jeová? É própi Satanás. Satanás krê pa nu pensa ma Jeová ka ta ama-nu i ma el ka ta aprova-nu. Má na verdadi, é Satanás ki Jeová ka ta ama. Kel-li é un “armadilha” ki el ta uza. (Efé. 6:11) Óras ki nu da kónta di kuzê ki nos inimigu sta tenta pô-nu ta faze, nu ta konsigi sta más disididu na fika ‘kóntra el’. — Tia. 4:7.

12-13. Modi ki inperfeison ki nu erda ta pô-nu ta ten dúvida ma Jeová ta ama-nu?

¹² Ten otu kuza ki ta pô-nu ta ten dúvida ma Jeová ta ama-nu. É kuzê? É pekadu ki nu erda. (Sal. 51:5; Rom. 5:12) Pekadu sipara-nu di nos Kriador. Tanbê el prujudika nos menti, nhos korason i nos korpu.

¹³ Pekadu ta prujudika nos sentimentus. El ta pô-nu ta xinti kulpadu, preokupadu dimás, sen suguransa i ku vergónha. Nu pode xinti kes kuza li óras ki nu faze un pekadu. Má tanbê nu ta xinti si pamodi sénpri nu ta lenbra ma nos é pekador i Jeová ka kria-nu pa nu ser si. (Rom. 8:20, 21) Sima un karu ki tene pinéu fradu ka ta konsigi anda dretu, nos tanbê pamodi inperfeison, nu ka ta konsigi faze tudu kuza dretu sima Jeová kria-nu pa nu faze. Nu ka ta fika dimiradu si alvês nu ten dúvida ma Jeová ta ama-nu. Si kel-li kontise, nu debe lenbra ma Jeová é “kel Deus grandi i ki ta poi algen ta xinti grandi ruspetu. Kel... ki ta mostra amor lial pa kes ki ta ama-l i ki ta obi ku se mandamentus.” — Nee. 1:5.

14. Modi ki pensa na resgati ta djuda-nu ten serteza ma Jeová ta ama-nu? (Romanus 5:8) (Odja kuadru “Proteje kóntra ‘puder di pekadu ki ta ingana.’”)

¹⁴ Alvês nu pode xinti ma nu ka merese amor di Jeová. Na verdadi, nu ka merese pa el ama-nu i é kel-li própi ki ta poi kel amor ki el ten pa nos ta ser más spesial. É ka pamodi nu faze algun kuza ki nu merese pa Jeová ama-nu. Má simé, Jeová da-nu resgati pamodi el ta ama-nu, asi pa el pode púrdua nos pekadu. (1 Juan 4:10) Tanbê, lenbra ma Jizus ka ben pa salva kes algen perfeitu, má kes algen ki é pekador. (Lé Romanus 5:8.) Ninhun di nos ka ta konsigi faze kuzas di manera perfeitu i Jeová ka ta spera kel-li di nos. Óras ki nu intende ma inperfeison ki nu erda ta pô-nu ta ten dúvida ma Jeová ta ama-nu, nu pode fika más disididu na luta kóntra nos manera di pensa. — Rom. 7:24, 25.

SKODJE KONTINUA LIAL

15-16. Si nu kontinua lial pa Jeová, di kuzê ki nu pode ten serteza i modi ki nu sabe di kel-li? (2 Samuel 22:26)

¹⁵ Jeová krê pa nu skodje faze kel ki é dretu, ki é “kontinua lial pa el.” (Deut. 30:19, 20) Si nu faze si, nu pode ten serteza ma el ta kontinua lial pa nos. (Lé 2 Samuel 22:26.) Si nu kontinua lial pa Jeová, nu pode ten serteza ma el ta djuda-nu aguenta firmi na kalker situason na nos vida.

¹⁶ Sima dja nu odjaba antis, nu ten txeu razon pa nu mante firmi óras ki nu ta pasa pa prublémas, sima un barku ki tene se ánkura ben firmi. Nu sabe ma Jeová ta ama-nu i el ta djuda-nu. É kel-li ki Bíblia ta inxina. Si algun bês nu xinti dúvida ma Jeová ta ama-nu, nu pode pensa na kuzê ki nu sabe ma é verdadi envês di na kuzê ki nu ta xinti. Nu krê kontinua ku serteza ma amor lial di Jeová ta dura pa tudu ténpu, sima Bíblia ta fla.