Seta ma Jeová ta ama-u

1. Pamodi ki bu da bu vida pa Jeová? (Odja imajen.)

BU TA lenbra kantu bu da bu vida pa Jeová? Bu toma kel disizon li pamodi bu konxe-l i bu ta ama-l. Bu promete ma bu ta pô-l na primeru lugar na bu vida i ma bu ta kontinua ta ama-l di tudu bu korason, alma, menti i forsa. (Mar. 12:30) Désdi kel ténpu, bu amor pa el ba ta bira kada bês más fórti. Nton, modi ki bu ta respondeba si un algen pergunta-u: “Bu ten serteza ma bu ta ama Jeová?” Sen pensa dôs bês bu ta flaba: “N ta ama-l más di ki kalker otu algen ô kalker otu kuza!”

2-3. Di kuzê ki Jeová krê pa nu ten serteza i kuzê ki nu sta ta ben odja na kel studu li? (Jeremias 31:3)

² Má, modi ki bu ta respondeba si un algen pergunta-u: “Bu ten serteza ma Jeová ta ama-u?” Bu ta fikaba ku dúvida pamodi bu ta atxa ma bu ka merese amor di Jeová? Un irman ki es ka mostra-l amor kantu el éra mininu fla: “N sabe ma N ta ama Jeová. N ka ten dúvida di kel-li. Má txeu bês N ten dúvida si Jeová ta ama-m.” Nton kuzê ki pode djuda-u ten serteza ma Jeová ta ama-u di verdadi?

³ Jeová krê pa bu ten serteza ma el ta ama-u. (Lé Jeremias 31:3.) Na verdadi é Jeová ki atrai-u pa el. I kantu bu da bu vida pa el i bu batiza, bu resebe un prezenti ki ten txeu valor, ki é se amor lial. Kel-li krê fla ma el ta ama-u txeu i ma nunka el ka ta bandona-u. Dja ki Jeová ten amor lial pa ses sérvu fiel, el ta odja tudu es sima un ‘propriadadi spesial.’ Pur isu, bo tanbê bu ten txeu valor pa el. (Mal. 3:17) Jeová krê pa bu ten serteza ma el ta ama-u sima apóstlu Paulu tinha serteza ma Jeová ta amaba el. Paulu tinha tantu serteza di kel-li ki el skrebe: “N ten serteza ma nen mórti, nen vida, nen anjus, nen govérnus, nen kuzas di gósi, nen kuzas ki sta pa ben, nen puder, nen altura, nen fundura, nen kalker otu kriason ka ta konsigi sipara-nu di amor di Deus”. (Rom. 8:38, 39) Na kel studu li nu sta ben odja pamodi ki nu meste ten serteza ma Jeová ta ama-nu i kuzê ki pode djuda-nu ten kel serteza li.

PAMODI KI É IMPORTANTI KRIDITA MA JEOVÁ TA AMA-NU?

4. Ki mintira Satanás krê pa nu kridita na el i modi ki nu pode fika kóntra Satanás?

⁴ Si nu ten serteza ma Jeová ta ama-nu, nu ta konsigi luta kóntra un di “kes armadilha” di Satanás. (Efé. 6:11) Satanás krê pa nu para di sirbi Jeová. El ta faze di tudu pa el konsigi faze kel-li. Un di kes kuza ki el ta uza é pô-nu ta pensa ma Jeová ka ta ama-nu. Má kel-li é un grandi mintira. Bíblia ta konpara Satanás ku un lion. (1 Ped. 5:8, 9) Lion gosta di ataka kes animal ki sta fraku i ki ka ta konsigi difende. Di mésmu manera, txeu bês Satanás ta ataka-nu óras ki nu sta fraku, kansadu ô óras ki nu sta xinti tristi pamodi algun kuza mariadu ki nu faze na pasadu ô algun prubléma ki nu tene gósi ô medu di kuzê ki pode kontise na futuru. (Pro. 24:10) Satanás ta spera ma el ta pô-nu fika fraku, asi pa nu pode dizisti di sirbi Jeová. Má nu pode fika kóntra Diabu i “kes armadilha” ki el ta uza, óras ki nu ta faze tudu kel ki nu pode pa nu ten serteza ma Jeová ta ama-nu. — Tia. 4:7.

5. Pamodi ki nu meste xinti ma Jeová ta ama-nu i ma el ta da-nu txeu valor?

⁵ Si nu ten serteza ma Jeová ta ama-nu, nos amizadi ku el ta fika más fórti. Odja pamodi ki nu pode fla kel-li. Jeová kria-nu ku nisisidadi di ama i di ser amadu. Óras ki algen ta ama-nu, nu ta xinti vontadi di ama-l tanbê. Pur isu, kantu más nu ta xinti ma Jeová ta ama-nu i ma el ta da-nu txeu valor, más nu ta krê mostra nos amor pa el. (1 Juan 4:19) I sima nos amor pa el ta ba ta fika kada bês más fórti, el tanbê el ta fika ta ama-nu más txeu. Bíblia ta mostra kel-li klaru óras ki el ta fla: “Nhos txiga pértu di Deus, i el ta txiga pértu di nhos.” (Tia. 4:8) Modi ki nu pode ten serteza ma Jeová ta ama-nu?

KUZÊ KI PODE DJUDA-NU TEN SERTEZA MA JEOVÁ TA AMA-NU?

6. Si bu ka ten serteza ma Jeová ta ama-u, kuzê ki bu pode faze?

⁶ Kontinua ta ora pa Jeová djuda-u intende pamodi ki el ta ama-u. (Luk. 18:1; Rom. 12:12) Si meste, pidi Jeová tudu dia i txeu bês pa el djuda-u sabe kuzê ki el ta xinti pa bo. É verdadi ki si bu korason ta kondena-u pode ser difísil ten serteza ma Jeová ta ama-u. Má lenbra ma Jeová é más grandi di ki bu korason. (1 Juan 3:19, 20) El konxe-u midjór di ki bu konxe bo mê i el ta odja kel ki bu ka ta konsigi odja. (1 Sam. 16:7; 2 Kró. 6:30) Nton ka bu xinti medu di ‘konta-l tudu kel ki sta na bu korason’ i pidi-l pa el djuda-u ten serteza ma el ta ama-u. (Sal. 62:8) Dipôs ki bu faze orason é inportanti faze kes kuza ki nu sta ta ben odja.

7-8. Modi ki livru di Salmos ta da-nu serteza ma Jeová ta ama-nu?

⁷ Kridita na kel ki Jeová ta fla. El gia kes ómi ki skrebe Bíblia pa fla modi ki el é di verdadi. Pur izénplu, na un di kes salmu ki Davidi skrebe el uza palavras bunitu pa splika modi ki Jeová ta kuida di nos. El skrebe: ‘Jeová sta pértu di kes ki tene korason maguadu, el ta salva kes ki tene spritu dizanimadu.’ (Sal. 34:18) Óras ki bu sta dizanimadu, bu pode xinti ma bu sta bo sô. Má Jeová promete ma na kes óra la, el ta sta pértu di bo pamodi el ta odja ma bu meste se ajuda más di ki nunka. Na un otu salmu, Davidi skrebe: ‘Bu ta djunta nhas lágua na bu barkinu.’ (Sal. 56:8) Jeová ta odja bus luta. El ta preokupa ku bo i ku kuzê ki bu sta pasa pa el. Sima kada góta di agu na un barkinu ten txeu valor pa un algen ki sta anda na dizértu, bus lágua ten txeu valor pa Jeová i el ta lenbra di tudu bês ki bu ta xinti tristi i bu ta txora. Davidi fla Jeová: ‘Abo Jeová bu konxe dretu tudu nhas kaminhu.’ (Sal. 139:3) Jeová ta odja tudu kuza ki bu ta faze, má el ta presta atenson na kes kuza dretu ki bu ta faze. (Ebr. 6:10) Pamodi? Pamodi el ta da txeu valor pa tudu sforsu ki bu ta faze pa dexa-l kontenti.a

⁸ Na Bíblia, Jeová dexa alguns palavra pa konsola-nu. Na kes versiklu é sima ki Jeová sta ta fla-u: “N krê pa bu sabe ma N ta ama-u txeu i ma N ta preokupa ku bo.” Má sima dja nu odja, Satanás krê pa bu pensa ma Jeová ka ta ama-u. Pur isu, si alvês bu ten dúvida ma Jeová ta ama-u, para i pergunta: ‘Na kenha ki N debe kridita? Na “pai di mintira” ô na “kel Deus di verdadi”?’ — Juan 8:44; Sal. 31:5.

9. Kuzê ki Jeová promete pa kes algen ki ta ama-l? (Ézudu 20:5, 6)

⁹ Pensa na kuzê ki Jeová ta xinti pa kes algen ki ta ama-l. Odja kuzê ki Jeová fla Muizés i kes israelita. (Lé Ézudu 20:5, 6.) Jeová promete ma el ta kontinua ta mostra amor lial pa kes algen ki ta ama-l. Kes palavra li ta da-nu serteza ma nos Deus lial nunka ka ta nega ama kes algen ki ta ama-l. (Nee. 1:5) Nton si alvês bu meste ten serteza ma Jeová ta ama-u, para i pergunta: ‘N ta ama Jeová?’ Nton, si bu ta ama Jeová i bu sta faze bu midjór pa agrada-l, bu pode ten serteza ma el ta ama-u txeu. (Dan. 9:4; 1 Kor. 8:3) Kel-li krê fla ma si bu ten serteza ma bu ta ama Jeová, bu ka debe ten dúvida ma el ta ama-u. Bu pode ten tudu serteza ma sénpri el ta ben ama-u i ma nunka el ka ta dexa-u.

10-11. Modi ki Jeová krê pa bu inkara resgati? (Gálatas 2:20)

¹⁰ Pensa na resgati. Sakrifisiu di resgati di Jizus Kristu é kel prezenti más grandi ki Jeová da pa umanus. (Juan 3:16) Má Jeová manda se Fidju pa móre pa bo própi? Sin! Odja izénplu di apóstlu Paulu. Lenbra ma el fazeba alguns pekadu gravi antis di el bira kriston i el meste kontinuaba ta luta kóntra se própi inperfeison. (Rom. 7:24, 25; 1 Tim. 1:12-14) Má pa el, resgati éra un prezenti ki Jeová da-l. (Lé Gálatas 2:20.) Lenbra ma é Jeová ki poi Paulu ta skrebe kes palavra li. I tudu kuza ki sta na Bíblia skrebedu pa inxina-nu. (Rom. 15:4) Palavras di Paulu ta mostra ma Jeová krê pa bu kridita ma sakrifisiu di Jizus é un prezenti ki el da-u. Óras ki bu ta inkara resgati di kel manera li, bu ta fika ku más serteza ma Jeová ta ama-u.

¹¹ Nos é gratu pamodi Jeová manda Jizus pa téra pa ben móre pa nos. Má otu razon ki poi Jizus ta ben pa téra, éra pa inxina otus algen verdadi sobri Deus. (Juan 18:37) Kel-li ta inklui inxina otus algen ma Jeová ten txeu amor pa ses fidju.

MODI KI JIZUS PODE DJUDA-U TEN SERTEZA MA JEOVÁ TA AMA-U?

12. Pamodi ki N pode kridita ma kel ki Jizus fla sobri Jeová é verdadi?

¹² Kantu Jizus staba na téra el ta flaba pesoas ki tipu di algen Jeová é. (Luk. 10:22) Nu pode kridita na kel ki Jizus fla sobri Jeová. Pamodi? Pamodi Jizus vive bilhons di anu djuntu ku Jeová antis di el ben pa téra. (Kol. 1:15) Jizus sabia ma Jeová ta ama-l txeu i tanbê el odja modi ki se Pai mostra amor pa kes anju fiel i pa tudu Ses fidju na téra. Modi ki Jizus djuda-nu ten serteza ma Jeová ta ama-nu?

13. Kuzê ki Jizus krê pa nu intende sobri Jeová?

¹³ Jizus krê pa nu sabe ma Jeová ta ama-nu. Na kes Ivanjélhu, Jizus ta txoma Jeová di “Pai” más di 160 bês. Óras ki el ta papiaba ku ses sigidor, el ta uzaba palavras sima “nhos Pai” ô “nhos Pai ki sta na séu”. (Mat. 5:16; 6:26) Nóta na Bíblia di studu na Mateus 5:16, na purtugês, ta fla: “Kes sérvu di Jeová ki vive txeu ténpu antis di Jizus ben pa téra, uza txeu titlu inportanti pa fla modi ki Jeová é i pa pâpia ku el, sima ‘Tudu-Poderozu’, ‘kel Más grandi’ i ‘Grandiozu Kriador.’ Má txeu bês Jizus ta uzaba palavra ‘Pai’ pamodi el éra más sinplis i pesoas ta uzaba el más txeu. Di kel manera li, Jizus mostra ma Deus krê pa ses sérvu xinti más se amigu. Kel-li ta mostra ma Jizus krê pa nu odja Jeová sima un Pai ki ta ama-nu i ki krê ses fidju txeu. Nu ben odja dôs situason ki Jizus uza palavra “Pai.”

14. Modi ki Jizus mostra ma kada un di nos ten txeu valor pa nos Pai, Jeová? (Mateus 10:29-31) (Odja imajen.)

¹⁴ Primeru, repara kuzê ki Jizus fla na Mateus 10:29-31. (Lé.) Pardal é pasus pikinoti ki nunka ka ta pode ama ô adora Jeová. Má simé, nos Pai ta da valor pa un pardal di tal manera, ki el sabe ki óra ki el ta kai na txon. El ta da inda más valor i el ta preokupa ku kada un di ses sérvu ki ta sirbi-l ku amor. Tanbê Jizus fla ma nos Pai sabe kantu fiu di kabelu ki kada un di nos ten na kabésa. Dja ki Jeová sabe ti mésmu kuzas pikinoti sobri nos, nu pode ten serteza ma el ta preokupa txeu ku kada un di nos. Kel-li ta mostra klaru ma Jizus krê pa nu ten serteza ma nu ten txeu valor pa nos Pai, Jeová.

15. Kuzê ki kes palavra ki Jizus fla na Juan 6:44 ta mostra sobri Jeová?

¹⁵ Repara un sugundu izénplu ki Jizus uza palavra “Pai.” (Lé Juan 6:44.) Bu Pai na séu atrai-u pa verdadi. Pamodi ki el atrai-u? Pamodi el odja bons kualidadi na bu korason. (Atus 13:48) Kantu Jizus fla kel ki sta na Juan 6:44, talvês el staba ta pâpia di kes palavra di Jeová ki sta na Jeremias 31:3 i ki tradu téma di kel studu li. Na kel testu, Jeová fla se povu: ‘N atrai-u pa mi ku amor lial.’ (Jer. 31:3; konpara ku Oseias 11:4.) Pensa na kuzê ki kel-li krê fla. Nos Pai na séu ta kontinua ta odja kes kuza bon ki bu ten na bo ki bu ka ta konsigi odja.

16. (a) Kuzê ki Jizus inxina-nu i pamodi ki nu debe kridita na el? (b) Kuzê ki pode djuda-nu ten serteza ma Jeová é kel midjór Pai ki ten? (Odja kuadru “Kel Pai ki nos tudu meste”.)

¹⁶ Kantu Jizus txoma Jeová di nos Pai, é sima si el staba ta fla-nu: “Jeová é ka sô nha Pai, má bu Pai tanbê. N ta garanti-u ma el ta ama-u i el ta preokupa txeu ku bo.” Si alvês bu ka ten serteza ma Jeová ta ama-u, para i faze kel pergunta li: ‘N ka debe kunfia na Jizus ki konxe nos Pai midjór di ki nos i ki sénpri ta pâpia verdadi?’ — 1 Ped. 2:22.

KONTINUA KU SERTEZA MA JEOVÁ TA AMA-U

17. Pamodi ki nu debe kontinua ta ten serteza ma Jeová ta ama-nu?

¹⁷ Nu meste faze tudu kel ki nu ta pode pa nu kontinua ta ten serteza ma Jeová ta ama-nu. Sima nu odja na komésu, Satanás ki é nos inimigu, ta faze di tudu pa pô-nu para di sirbi Jeová. El krê pô-nu ta fika fraku. El ta kontinua ta tenta pô-nu ta kridita ma Jeová ka ta ama-nu. Nu ka krê dexa Satanás vense! — Jó 27:5.

18. Kuzê ki bu pode faze pa bu kontinua ta ten serteza ma Jeová ta ama-u?

¹⁸ Pa bu ten más serteza ma Jeová ta ama-u, kontinua ta ora pa el djuda-u odja kes bons kualidadi ki bu ten. Midita na kes versiklu di Bíblia ki ta mostra ma Jeová ta kuida di kes algen ki ta ama-l. Lenbra ma Jeová sénpri ta ama kes algen ki ta ama-l. Nunka ka bu skese ma Jeová da-u se Fidju di prezenti. I sima Jizus fla, ten serteza ma Jeová é bu Pai ki sta na séu. Nton si algun algen pergunta-u: “Bu ten serteza ma Jeová ta ama-u?”, bu ta responde ku serteza: “Sin, el ta ama-m! I tudu dia N ta faze nha midjór pa N mostra ma N ta ama-l!”