Nu pode vive djuntu antis di nu kaza?

Txeu kazal ta vive djuntu antis di es kaza. Alguns kazal ta faze kel-li pamodi es krê odja si es ta da dretu ku kunpanheru i es ta pensa ma es ta ten más xansi di ten un kazamentu filís. Vive djuntu antis di kaza é un bon ideia?

Na kel artigu li

• Kuzê ki Bíblia ta fla?

• Vive djuntu ta djuda-u pripara pa kazamentu?

• Vive djuntu ta djuda-u popa dinheru?

• Vive djuntu ta djuda-u ivita kaza ku un algen ki é ka bon pa bo?

• Ten un soluson midjór?

Kuzê ki Bíblia ta fla?

• Bíblia ta kondena séksu fóra di kazamentu. Pur izénplu, el ta fla: “Ka [nhos] ten konportamentu seksual mariadu.” (1 Tesalonisensis 4:3; 1 Koríntius 6:18) Kel-li ta inklui séksu entri un kazal ki ta vive djuntu, sikrê es ta pensa na kaza más tardi.a Kes prinsípiu di Bíblia ta djuda un kazal ivita ten fidju antis di es sta kazadu i di otus rezultadu mariadu ki pode ben óras ki dôs algen ta vive djuntu antis di kaza.

• É Deus ki faze kazamentu. El faze kel-li kantu el fla: ‘Un ómi ta dexa se pai ku se mai i el ta djunta ku se mudjer, i es ta bira sô un karni.’ (Génesis 2:24) Kazamentu é un konpromisu ki ta djuda família xinti suguru i ten amor pa kunpanheru.

Vive djuntu ta djuda-u pripara pa kazamentu?

Alguns algen ta fla ma kel-li é verdadi. Es ta atxa ma un kazal ta ganha spiriénsia óras ki es ta faze trabadju di kaza djuntu i es ta odja modi ki kel otu algen ta konporta na situasons diferenti. Má un kuza txeu inportanti pa djuda kazamentu ser filís é konpromisu.

Nton, modi ki un kazal pode prende kontinua unidu na óra sábi i na óra ka sábi? Vive djuntu pa faze un testi é ka midjór manera di faze kel-li, pamodi kel kazal pode atxa ma es pode sipara kalker óra. Má pa es ser filís, un ómi ku un mudjer meste ten un konpromisu sériu ku kunpanheru i sforsa djuntu pa es vense kes prubléma ki es pode pasa pa el.

Konkluzon: Envês di sta ta pripara pa kazamentu, un kazal ki ta disidi vive djuntu antis di kaza na verdadi sta ta pripara pa siparason.

Konsedju di Bíblia: “Kel ki un algen símia, é kel ki el ta kodje tanbê.” — Gálatas 6:7.

Vive djuntu ta djuda-u popa dinheru?

Alguns algen ta fla ma kel-li é verdadi. Un piskizab ta mostra ma na Mérka, na kada 10 algen ki kumesa ta vive djuntu antis di kaza, uns kuatu di es faze kel-li pa es pode popa dinheru. Má dipôs di vive djuntu pa algun ténpu, txeu di kes algen ki partisipa na kel piskiza fla ma inda es ka staba prontu pa kaza, pamodi prublémas di dinheru.

Tanbê, vive djuntu antis di kaza pode traze otus prubléma, prinsipalmenti pa mudjer. Pur izénplu, si un kazal sipara, txeu bês é mudjer ki ta fika ku responsabilidadi di kria kes fidju ki es tevi djuntu.

Konkluzon: Kes mau rezultadu di vive djuntu antis di kaza pode ser mutu más txeu di kes bon rezultadu ki bu pode ten.

Konsedju di Bíblia: ‘Ami, Jeová, mi é bu Deus, kel ki ta inxina-u kuzê ki é midjór pa bo’. — Isaías 48:17.

Vive djuntu ta djuda-u ivita kaza ku un algen ki é ka bon pa bo?

Alguns algen ta fla ma kel-li é verdadi. Má un livru sobri kazamentuc ta fla: “Pesoas ki ta vive djuntu antis di kaza, txeu bês ka ta da konta ma vive djuntu ta bira más difísil pa es sipara di kunpanheru.” Pamodi? Piskizas ta mostra ma ti mésmu pesoas ki diskubri ma es ka ta da dretu ku kunpanheru ta kontinua ta vive djuntu. Es ta faze kel-li pamodi kes kuza ki es ten djuntu sima un animal, dívidas ô un fidju ki es ka staba ta spera.d Kel livru ki dja nu papiaba di el antis, ta splika: “Alguns algen ki na otu situason ta siparaba, ta kaba pa kaza sô pamodi é más fásil kontinua djuntu.”

Konkluzon: Envês di djuda-u toma un bon disizon, vive djuntu pode bira más difísil pa nhos sipara, sikrê nhos ka ta da dretu ku kunpanheru.

Konsedju di Bíblia: ‘Algen prudenti ta odja prigu i el ta sukundi, má kes ki ka ten spiriénsia ta kontinua ta bai i es ta kai na prublémas.’ — Provérbios 22:3.

Ten un soluson midjór?

Bu pode ivita kes prubléma ki ta ben óras ki dôs algen ta vive djuntu antis di kaza i omésmu ténpu ten más xansi di ten un kazamentu filís. Modi ki bu pode faze kel-li? Si bu sigi tudu kes konsedju ki Bíblia ta da sobri kazamentu. Tra ténpu pa bu konxe dretu kel algen ki bu krê kaza ku el antis di nhos kaza i ba vive djuntu. É midjór skodje un maridu ô un mudjer ki ten kes mésmu prinsípiu i krénsas ki bu ten, envês di skodje un algen sô pamodi bu ta xinti vontadi di faze séksu ku el.

Bíblia ten bons konsedju ki pode djuda-u ten un kazamentu filís i ki ta dura.e Pur izénplu, Bíblia ten konsedjus ki pode djuda-u...

• ivita ser infiel

• bira un algen ki ta ser un bon maridu ô mudjer

• odja kes sinal ki ta mostra ma kel algen é ka bon pa bo timenti nhos ta konxe kunpanheru

Pa prende más sobri kes asuntu li, odja párti “Kazamentu i Família” na jw.org.

Konsedju di Bíblia: “Tudu ki sta na Skritura ben di Deus, i el ta sirbi pa inxina”. — 2 Timótiu 3:16.