Kuzê ki Bíblia ta fla sobri mora djuntu sen sta kazadu?

Respósta di Bíblia

Bíblia ta fla ma Deus krê pa pesoas ‘ivita ten konportamentu seksual mariadu.’ (1 Tessalonicenses 4:3) Na Bíblia, ‘konportamentu seksual mariadu’ ta inklui adultériu, séksu ómi ku ómi ô mudjer ku mudjer i séksu entri ómi ku mudjer ki ka é kazadu.

• Pamodi ki é inportanti pa Deus si un ómi ku un mudjer sta kazadu ô nau?

• Un ómi ku un mudjer ten ki mora djuntu antis di kazamentu pa odja si es ta da dretu ô nau?

• Modi ki un ómi ku un mudjer pode ten un kazamentu filís?

Pamodi ki é inportanti pa Deus si un ómi ku un mudjer sta kazadu ô nau?

• É Deus ki kria kazamentu. El kria kazamentu kantu el kaza primeru ómi ku primeru mudjer. (Génesis 2:22-24) El ka kreba pa un ómi ku un mudjer mora djuntu sen sta kazadu.

• Deus sabe kuzê ki é midjór pa nos. El kria kazamentu pa ómi ku mudjer fika djuntu pa tudu ténpu i el krê pa kel union li djuda i proteje tudu algen na un família. Pensa na es konparason sinplis: sima kes instruson ki ta ben di fábrika ta mostra modi ki ta armadu kes pésa di un mobília, kes instruson di Deus ta mostra-nu modi ki nu ta ten un família filís. Ken ki ta obi ku kes mandamentu di Deus sénpri ta ten bons rezultadu. — Isaías 48:17, 18.

  

• Séksu fóra di kazamentu ta traze txeu prubléma gravi. Pur izénplu, un algen pode fika grávida sen el krê, pode panha duénsas ki ta pega através di séksu i otus prubléma.a

• Deus da ómi ku mudjer kapasidadi di ten fidju através di séksu. Pa Deus, vida é sagradu. Pur isu, kapasidadi di ten fidju é un prezenti di txeu valor. Deus krê pa nu da es prezenti valor i pa nu uza-l sô ku kel algen ki nos é kazadu. Asi nu ta mostra ruspetu pa kazamentu. — Hebreus 13:4.

Un ómi ku un mudjer ten ki mora djuntu antis di kazamentu pa odja si es ta da dretu ô nau?

Pa es ten un kazamentu filís, un kazal ka meste pasa pa un “ténpu di próva”, undi ki es ta vive djuntu i kada un di es pode sipara óra ki es krê. Má pa es ser filís, un maridu ku un mudjer meste ten un konpromisu sériu i sforsa djuntu pa es vense kes prublémas ki ta kontise.b I é kazamentu ki ta djuda un konpromisu ser más fórti. — Mateus 19:6.

Modi ki un ómi ku un mudjer pode ten un kazamentu filís?

Ka ta izisti kazamentu perfetu. Má un maridu ku un mudjer pode ten un kazamentu filís óras ki es ta sigi konsedjus di Bíblia. Odja alguns izénplu:

• Poi interesis di bu maridu ô di bu mudjer frenti di di bo. — 1 Coríntios 7:3-5; Filipenses 2:3, 4.

• Nhos mostra amor i ruspetu pa kunpanheru. — Efésios 5:25, 33.

• Prende pensa antis di bu pâpia. — Provérbios 12:18.

• Ten paxénxa i púrdua faxi. — Colossenses 3:13, 14.