PERGUNTAS KI JÓVENS TA FAZE
N debe larga skóla?
“N ka gosta nada di skóla!” Si bu ta xinti si, talvês ta da-u gana di larga skóla. Kel artigu li ta ben djuda-u pensa na otus soluson.
Pamodi ki alguns jóven ta larga skóla
Kes-li é alguns motivu ki kes algen ki ta ntende di kel asuntu li ta da:
Nóta baxu. ‘Nhas nóta sta ta fika kada bês más piór.’
Falta di interesi. ‘Kel ki N ta prende na skóla ka ta sirbi pa nada.’
Prublémas di dinheru. ‘N ten ki trabadja pa djuda nha família sustenta.’
Pensa na kes rezultadu di larga skóla
Bíblia ta fla: ‘Ken ki é prudenti ta pensa antis di el da kada pasu.’ (Provérbios 14:15) Kuzê ki nu ta prende? Si bu sta ta pensa na larga skóla, pensa dretu na rezultadu di faze kel-li.
Pergunta bu kabésa:
‘Si N larga skóla, N ta konsigi atxa un bon trabadju na futuru?’
“Pensa na óra ki bu ten ki ranja un trabadju i ki talvês bu ten ki sustenta un família. Modi ki bu ta konsigi faze kel-la si maioria di patron ta pidi pa bu ten peloménus désimu sugundu anu?” — Julia.
‘Si N larga skóla, N ta konsigi lida dretu ku otus difikuldadi ki ta ben na futuru?’
“Skóla ta pripara-u pa vida. Na futuru, kes algen ki bu ta ba konxe, kes tentason ki bu ta ba nfrenta, i trabadju ki bu ta ba faze, ta ser kuazi igual ku kes ki bu tevi na skóla.” — Daniel.
‘Si N larga skóla, N ta dizenvolve kes kapasidadi ki N ta meste óras ki N da ómi ô mudjer?’
“Pode parse ma kel ki bu ta prende na skóla ka ta sirbi pa nada, má óras ki bu bira más grandi, ki bu ten ki da kónta di bu bolsu, bu ta ba pensa: ‘Inda ben ki N presta atenson na kes aula di matimátika.’” — Anna.
Kuzê ki é midjór
Pidi ajuda. Bíblia ta fla: ‘Ku txeu algen ki ta da konsedju ta ten bons rezultadu.’ (Provérbios 11:14) Si bus nóta sta baxu, pidi ajuda na bu mai ku bu pai, na un profesor ô na otu algen más grandi ki pode da-u bons ideia sobri manera ki bu ta midjora.
“Si ka sta fásil, pâpia ku bu profesor. Alvês bu pode pensa ma prubléma sta na profesor, má sô pidi-l ajuda pode midjora bu situason.” — Edward.
Pensa na futuru. Bíblia ta fla: ‘Fin di un asuntu é midjór di ki se komésu.’ (Eclesiastes 7:8) Óras ki bu tirmina skóla, bu ka ta ten sô konhisimentu di kes disiplina, má dja bu ta ten kualidadis i kes kapasidadi ki ta djuda-u na vida.
“Talvês óras ki bu bira grandi, bu ka ta ba faze testi ô otus trabadju ki bu ta fazeba na skóla, má si bu prende lida dretu ku modi ki trabadju di skóla ta stresa algen, ta ser más fásil bu lida ku preokupasons di vida.” — Vera.
Larga skóla é sima salta di un barku antis di el txiga na kais. Dipôs bu ta rapende!
Pensa na otus soluson. Bíblia ta fla: ‘Tudu kes ki ta faze kuzas sen pensa, ta kaba na pobréza.’ (Provérbios 21:5) Ka bu pensa lógu ma úniku soluson ki bu ten é larga skóla. Talvês bu pode studa na un óra diferenti di kel ki bu ten ki djuda bu família sustenta, asi pa bu konsigi tirmina skóla.
“Skóla ta inxina-u trabadja duru, rezolve prublémas i trabadja ku otus algen. Kes kuza li ta kontinua ta djuda-u pa txeu ténpu. Ta bale péna bu sforsa pa tirmina skóla.” — Benjamin.
Konkluzon: Si bu tirmina skóla, bu ta fika más priparadu pa responsabilidadis di vida óras ki bu bira grandi.