Kuzê ki N ta faze si N ka gosta di skóla?

Profesoris izijenti. Preson di kolégas. Próvas difísil i trabadju di kaza un tras di kel otu. Si bu ka gosta di skóla, talvês bu pode ten un bon razon. Un jóven ki txoma Rakela fla:

“N ta prifiri sta na kalker otu lugar di ki sta na skóla. N ta prifiri bai mar, sta ku nhas amigu ô ti djuda nha mai ku nha pai kuzinha ô faze linpéza!”

Si bu ta xinti di mésmu manera ki Rakel, kes anu ki bu ta pasa na skóla pode parse sima si bu sta na un kadia ki bu ten ki fika la ti dia ki bu libertadu, na bu finalista. Má ten un manera midjór di bu odja kel ténpu ki bu ta pasa na skóla?

Bu sabia? Óras ki bu ta sforsa pa odja skóla di un manera más puzitivu, bu ta kumesa ta kontrola situason i bu ta para di odja skóla sima un kuza difísil. Kel-li krê fla ma pa bo skóla ta bira un kuza ki ta djuda-u ser un algen midjór óras ki bu bira un adultu.

Pa djuda-u midjora bu manera di odja skóla, tenta konsentra na kes kuza li:

Bu idukason. Kantu más bu ta prende, más bu ta fika priparadu pa rezolve kes prubléma ki bu ta ben pasa pa el na trabadju i na otus ária di bu vida, envês di bu fika sénpri ta dipende di otus algen. Pensa na kel-li: ‘Sikrê ten alguns kuza sobri skóla ki N ka gosta, modi ki kes kuza ki N sta ta prende pode djuda-m?’

Konsedju di Bíblia: ‘Proteje sabedoria i bu kapasidadi di rasusina’. — Provérbios 3:21.

Bus ábitu. Bai pa skóla ta inxina-u modi ki bu ta organiza bu ténpu, modi ki bu ta kontrola bu kabésa i modi ki bu ta ser un bon trabadjador. Kes-li é kualidadis ki bu ta meste óras ki bu bira un adultu. Pensa na kel-li: ‘Di ki manera ki bai pa skóla sta djuda-m kontrola nha kabésa i ser un bon trabadjador? Modi ki N pode midjora na kes ária li?’

Konsedju di Bíblia: ‘Ten vantajen na tudu tipu di trabadju duru’. — Provérbios 14:23.

Lida ku otus algen. Manera ki bu ta lida ku bus koléga di skóla pode djuda-u prende poi na lugar di otus algen i ruspeta-s. Un jóven ki txoma Jozué fla: “Prende pâpia ku otus algen é inportanti sima prende disiplina di stória i di siênsia. Kel-li é un kualidadi ki bu ta meste na bu vida interu.” Pensa na kel-li: ‘Kuzê ki dja N prende na skóla sobri modi ki N pode da dretu ku otus algen, sikrê es é di un otu rasa ô es ten un otu krénsa?’

Konsedju di Bíblia: “Nhos inpenha pa pas ku tudu algen”. — Ebreus 12:14.

Bu futuru. Skóla pode djuda-u sabe kuzê ki abo é bon na el i poi métas ku bazi na kel-la. Un minina ki txoma Brooke fla: “Talvês bu pode prende un profison, sima N faze. Asi óras ki bu sai di skóla, bu pode sta priparadu pa ranja un trabadju.” Pensa na kel-li: ‘Dipôs ki N sai di skóla, modi ki N ta sustenta nha kabésa? Modi ki N pode ten serteza ma N sta ta prende kes kuza ki N meste pa kel profison ki N krê?’

Konsedju di Bíblia: ‘Poi kaminhu di bus pé ta fika planu’. — Provérbios 4:26.