Fin di mundu sta kuazi ta txiga? Bíblia ta fla ma mundu ta ben kaba?
Bu ta atxa ma un dia Téra ta ser distruídu? Talvês bu ta pensa ma ta ben kontise un dizastri uma grandi, ki ta ben kaba ku vida na Téra. Alguns algen ta kridita ma ka ta dura ta ben kontise un dizastri sima kel-li, prinsipalmenti óras ki es ta odja notísias sima kes-li:
“Un géra nukliar é un kuza ki pode kontise kalker óra. Es pode pô-l ta kontise di propózitu ô el pode kontise através di un asidenti ô un fadja na kumunikason.” — Boletim dos Cientistas Atômicos.
“Na kes 10 anu ki pasa, kontise txeu dizastri na mundu interu sima tenpistadis, lumi na florésta, séka, koral di mar ki bira tudu branku, kalor dimás i txeia.” — National Geographic.
“Praga di kafanhotu bira más txeu na kes últimu anu.” — The Associated Press.
Ta ben kontise un dizastri ki ta ben kaba ku Téra? Kuzê ki Bíblia ta fla?
Planéta Téra ta ben ser distruídu?
Nau. Palavra di Deus, ki é Bíblia, ta da-nu sertéza ma Téra ta ben kontinua ta izisti pa tudu ténpu. (Eclesiastes 1:4) Envês di Deus distrui Téra, ki el faze, el ta ben ‘distrui kes ki sta distrui Téra.’ — Apocalipse 11:18.
Mundu ta ben kaba?
Sima Bíblia ta mostra, kel ‘mundu’ ki ta ben kaba é kes algen na Téra ki ka ta obi ku Deus i ki ta faze kuzas ta pensa sô na ses kabésa. Sima kontise na ténpu di Nué, Deus ta ben kaba ku ‘mundu di gentis mau.’ — 2 Pedro 2:5; 3:7.
Sima 1 João 2:17 ta fla, ‘mundu sta ta pasa, i se dizeju tanbê’. Kel versíklu li ta mostra ma Deus ka ta ben kaba ku planéta Téra, má ku tudu kes algen ki ta faze kuzas mariadu.
Ki ténpu ki fin ta ben?
Bíblia ka ta fla kel dia sértu ki fin ta ben. (Mateus 24:36) Má el ta mostra ma el sta kuazi ta txiga. Bíblia ta fla ma ta ben kontiseba kes kuza li:
Géra, falta di kumida, duénsas ki ta spadja i grandis tremor di téra ‘na un lugar tras di kel otu.’ — Mateus 24:3, 7, 14; Lucas 21:10, 11; Apocalipse 6:1-8.
Maioria di algen ta pensaba sô na ses kabésa. Pur izénplu, es ta ben ‘amaba dinheru’, es ta sérba ‘ingratu’ i ‘diskontroladu’. — 2 Timóteo 3:1-5.
Txeu algen ta konkorda ma désdi di 1914, situason na mundu sta sima kel ki Bíblia ta fla ma ta sérba na ténpu di fin i ma fin sta kuazi ta txiga. Odja más informason na artigus “Ki ténpu ki Reinu di Deus kumesa ta governa? (Párti 1)” i “Kal ki é sinal di ‘ténpu di fin’?”
Kuzê ki “apocalipse” siginifika na Bíblia?
Kel palavra gregu ki traduzidu pa “apocalipse” na Bíblia siginifika “diskubri” ô “revelason”. Txeu bês kel palavra li ta pâpia di algun kuza ki staba sukundidu, má ki mostradu klaru. Bíblia tanbê ta pâpia di ‘ténpu ki Sinhor Jizus ta ben parse [ô apocalipse]’. Kel-li ta ben kontise óras ki Jizus parse ku puder di kaba ku tudu maldadi na Téra i pa rekonpensa kes ki ta adora Deus. — 2 Tessalonicenses 1:6, 7; 1 Pedro 1:7, 13.
Kel últimu livru di Bíblia txoma Apocalipse ô Revelação, pamodi el ta mostra kuzê ki ta ben kontise na futuru. (Apocalipse 1:1) Kel livru li ta traze notísias sábi i un mensaji di speransa. (Apocalipse 1:3) El ta mostra ma Deus ta ben kaba ku tudu injustisa i bira Téra un paraízu. Óras ki kel-li kontise, algen na Téra ka ta sufri más, ka ta xinti dór i nen es ka ta móre. — Apocalipse 21:3, 4.
Bu ta gostaba di sabe más sobri kes promésa di Bíblia li, ki é rei di sábi? Tistimunhas di Jeová pode studa Bíblia ku bo di grasa pa djuda-u. Bu pode pâpia ku es oji mê.