Prublémas di dinheru ta ben dexa di izisti?

Na txeu país diferenti, pesoas ta sai na rua ta faze manifestason pamodi kes prubléma di dinheru ki es ta pasa pa el. Ku COVID-19 situason fika más difísil inda. Pamodi COVID-19 pesoas tevi ki fika na kaza i kel-li pô-s ta xinti falta di txeu kuzas i ti ku difikuldadi na konsigi kuida di ses saúdi. Kes prubléma li poi kel diferénsa entri kes algen riku i kes algen póbri ta bira más txeu i pur isu pesoas kumesa ta faze revólta.

Algun dia nu ta ben vive na un mundu sen prublémas di dinheru? Sin. Bíblia ta mostra modi ki Deus sta ta ben kaba ku kes prublémas ki nu ta pasa pa es.

Prublémas di dinheru ki Deus ta ben rezolve

Prubléma: Ómis ka ta konsigi ranja un manera pa tudu algen ten kel dinheru ki es ta meste.

Soluson: Deus ta ben troka kes govérnu di ómis pa se própi govérnu, Reinu di Deus. El ta ben governa Téra interu la di Séu. — Daniel 2:44; Mateus 6:10.

Rezultadu: Dja ki el ta ben governa Téra interu, Reinu di Deus ta ben kuida di kes asuntu di Téra di manera perfeitu. Ningen ka ta ben sufri más pamodi pobréza ô pamodi medu di ka ten kel ki es meste pa vive. (Salmo 9:7-9, 18) Má, tudu algen ta ben goza di rezultadu di trabadju di ses mô i es ta ben ten un vida sábi djuntu ku ses família. Bíblia ta promete: ‘Es ta ben faze kazas i mora na es; Es ta ben planta lugaris xeiu di pé di uva i kume di ses fruta. Es ka ta faze kazas pa otus algen mora, es ka ta planta pa otus algen ba kume.’ — Isaías 65:21, 22.

Prubléma: Pesoas ka ta konsigi ivita situasons ki ta faze-s sufri i pobréza.

Soluson: Através di se Reinu, Deus ta ben kaba ku tudu kes kuza ki ta poi algen ka ta xinti suguru i ku medu.

Rezultadu: Dibaxu di Reinu di Deus, ningen ka ta ben xinti más falta di kes kuza ki es meste pa es vive. Pur izénplu, géras, falta di kumida i duénsas ki ta spadja faxi ka ta ben ten más. (Salmo 46:9; 72:16; Isaías 33:24) Deus ta fla: ‘Nha povu ta ben mora na un lugar ki ten pas, na kazas suguru i na lugaris di diskansu trankilu.’ — Isaías 32:18.

Prubléma: Kes algen ki é ganansiozu i ki ta pensa sô na ses kabésa, txeu bês ta splora i ta maltrata otus algen.

Soluson: Kes algen ki ta seta pa Reinu di Deus governa-s, ta ben prende mostra ma es ta ama otus algen más di ki ses kabésa. — Mateus 22:37-39.

Rezultadu: Dibaxu di Reinu di Deus, tudu algen ta ben imita amor di Deus ki ‘ka ta djobe sô ses interesi’. (1 Coríntios 13:4, 5) Bíblia ta fla: ‘Ka ta fazedu ninhun stragu nen distruison na nha monti santu, pamodi Téra ta intxi di konhisimentu di Jeováa sima agu ta kubri mar.’ — Isaías 11:9.

Bíblia ta mostra ma nu sta ta vive na fin di ténpu di kel mundu li i ma ka ta dura Deus ta ben kunpri se promésa di kaba ku tudu pobréza.b (Salmo 12:5) Má désdi gósi, kes prinsípiu di Bíblia pode djuda-u lida ku kes prubléma di dinheru ki bu sta pasa pa el. Pur izénplu, odja kes artigu li, “Modi ki nu pode vive ku ménus dinheru?” i “Um conceito equilibrado sobre o dinheiro”.

Stórias inventadu sobri Bíblia i dinheru

Stória inventadu: Pobréza nunka ka ta kaba pamodi Jizus fla: ‘Sénpri nhos ta tene kes póbri ku nhos’. — Mateus 26:11.

Verdadi: Jizus staba sô ta fla ma timenti kel mundu injustu li izisti, ta kontinua ta ten pesoas póbri. Má, Jizus pâpia di notísias sábi pa kes algen póbri i di kel promésa ma Reinu di Deus ta ben kaba ku pobréza pa tudu ténpu. — Lucas 4:18, 43.

Stória inventadu: Kes algen ki krê agrada Deus, ten ki ser póbri pamodi Jizus fla: ‘Ba bende kes kuza ki bu ten, i da póbris kel dinheru’. — Mateus 19:21.

Verdadi: Ku kes palavra li, Jizus ka staba ta kria un régra pa se sigidoris vive di akordu ku el. Má, el staba ta da un orientason klaru pa un jóven ki staba ta dexa se rikéza distrai-l. Ku kel orientason li, Jizus staba ta nkoraja-l pa el leba un vida sinplis i pa el seta kel konviti pa bira un di se sigidoris.

Stória inventadu: Deus ta abensua algen ku rikéza pamodi Bíblia ta fla: ‘É benson di Jeová ki ta poi algen riku’. — Provérbios 10:22.

Verdadi: Na Bíblia kes palavra ‘benson di Jeová’, normalmenti sta ta pâpia di rikéza spritual sima un vida filís, un bon amizadi ku Deus i un speransa sábi pa futuru. (Salmo 25:14; João 17:3) Nbóra Deus abensua txeu di se sérvus ku rikéza, maioria di kes ki bira sérvu di Deus ka éra riku. (Génesis 24:34, 35; Tiago 2:5) I nen Jizus ka tinha txeu kuzas. — Mateus 8:20.

Stória inventadu: Bíblia ta inxina algen ser kumunista, pamodi el ta fla ma sérvus di Deus na pasadu ‘ta dividiba tudu kuza ku kunpanheru; es ta bendeba ses kuza di valor i ses propriadadi’.— Atos 2:44, 45.

Verdadi: Kes versíklu li ta mostra kuzê ki fazedu pa kuida di nisisidadi di alguns ki ka dura ki batizaba. Kes irmons li, bai pa Jiruzalen pa Pentikósti ki éra un fésta di Judeus. (Atos 2:5) Má, kantu es batiza, es kaba pa fika na Jiruzalen pa más ténpu ki kel ki es tinha na planu. Es faze kel-li pa es pode prendeba más sobri kes krénsa novu. Pamodi kel-li, kes otus sérvu di Deus da di livri vontadi kel ki es tinha pa es pode djuda ranja kumida i lugar di es fika. — Atos 2:41, 42, 46, 47.

a Sima Bíblia ta mostra Jeová é nómi di Deus. — Salmo 83:18.

b Pa sabe más sobri pamodi ki bu pode kunfia na Bíblia, odja artigu, “Bíblia é un livru di kunfiansa i ki ta pâpia verdadi.”