Présu di tudu kuza sta ta subi — Kuzê ki Bíblia ta fla?

“Ikonomia di mundu interu sta na prigu otu bês,” é kel-li ki prizidenti di Grupu di Banku Mundial fla na un rilatóriu na junhu di 2022. Tanbê el fla: “Nu sta ta vive na un ténpu ki présu di tudu kuza sta ta subi i pesoas tene poku dinheru pa kunpra.”

“Présu di konbustível i di kumida sta ta subi tudu dia i algen di kes país más póbri sta ta fika más prujudikadu.” — International Monetary Fund.

Bíblia ta djuda-nu ntende pamodi ki nu sta ta pasa pa es situason txeu difísil na mundu, modi ki nu pode lida ku el i si algun dia el ta kaba.

Kuzas ta fikaba más karu na ‘ténpu di fin’

• Bíblia ta txoma ténpu ki nu sta vive na el di ‘ténpu di fin’. — 2 Timóteo 3:1.

• Jizus fla ma na ténpu di fin pesoas ta ben odjaba ‘kuzas ki ta pô-s medu’. (Lucas 21:11) Óras ki pesoas ta odja présu di kuzas ta subi, es ta fika ku medu. Es ta fika preokupadu ku ses futuru i si es ta konsigi sustenta ses família.

• Livru di Apocalipse dja flaba ma présu di kumida ta subiba na ténpu di fin. ‘N obi un kuza sima un vós ta fla: “Un litru di trigu pa un dináriu i três litru di sevada pa un dináriu.”’ — Apocalipse 6:6, Easy-to-Read Version.

Pa sabe más sobri ‘ténpu di fin’ i kes profesia ki sta na livru di Apocalipse, odja vídiu Mundu muda désdi 1914 i lé artigu “Quem são os cavaleiros do Apocalipse?”

Bíblia ta fla kal ki é soluson

• ‘Es ta ben faze kazas i mora na es, es ta ben planta lugaris xeiu di pé di uva i kume di ses fruta. Es ka ta faze kazas pa otus algen mora, es ka ta planta pa otus algen ba kume.’ — Isaías 65:21, 22.

• ‘Ta ben ten kumida avontádi na Téra, i riba monti ta ben ten un monti kumida.’ — Salmo 72:16.

• ‘“Pamodi frónta di kes ki sta sufri, pamodi kes ki é póbri sta ta jeme, N ta ben labanta i N ta ben aji,” é Jeová ki fla.’ — Salmo 12:5.a

Ka ta dura Deus ta ben kaba ku prublémas di dinheru, ka sô na un país ma na mundu interu. Pa bu sabe modi ki el ta ben faze kel-li, lé artigu “Prublémas di dinheru ta ben dexa di izisti?”

Má mésmu gósi, Bíblia pode djuda-nu lida ku situason óras ki présu di kuzas ta subi. Modi? El ten bons konsedju sobri modi ki nu pode uza nos dinheru dretu. (Provérbios 23:4, 5; Eclesiastes 7:12) Pa bu sabe más, lé kes artigu “Uza bu dinheru dretu” i “Modi ki nu pode vive ku ménus dinheru”.