Kuzê ki Bíblia ta fla sobri mudansas di klima, futuru di téra i di tudu algen na mundu?

“Mudansa di klima sta ta bira un dizastri. Sta ta bira inposível vive na téra.” — Jornal The Guardian.

Mundu sta ta pasa pa un krizi ki é própi algen ki provoka. Maioria di sientista ta konkorda ma é ómi ki é responsável pa kes mudansa di klima na mundu interu. Pamodi tenperatura fika más altu, klima di téra muda i kel-li traze txeu rezultadu mariadu, sima kes-li:

• Nu sta xinti kada bês más kalor, nu sta odja más séka i tenpistadis. Kel-li sta ta traze más txeia i ta poi floréstas ta pega lumi.

• Jélus di Ártiku i di otus lugar sta ta derete.

• Mar sta ta subi.

Mudansas di klima sta ta afeta tudu párti di téra. Dipôs di analiza situason di 193 país, Jornal New York Times fla: “Planéta sta ta pidi ajuda.” Pamodi mudansa di klima sta ta traze txeu mórti i sufrimentu, Organizason Mundial di Saúdi fla ma kel-li é kel “amiasa di saúdi más grandi ki ómi sta ta infrenta.”

Má, nu ten bons motivu pa nu odja pa futuru ku speransa. Bíblia dja flaba ma kes kuza ki nu sta ta odja oji ta binha kontise. Tanbê, el ta fla-nu pamodi ki nu debe kridita ma Deus ta ben aji i kuzê ki el ta ben faze pa proteje nos futuru.

Mudansas di klima sta ta kunpri profesias di Bíblia?

Sin. Pamodi mundu sta ta bira más kenti nu sta ten prublémas na klima. É kel-li ki Bíblia dja flaba ma ta binha kontise na nos ténpu.

Profesia: ‘Na ténpu di fin, kuzas ta fika konplikadu, difísil di aguenta. Pamodi ómis ta ba ama sô ses kabésa, ta ama dinheru, ta ser deslial, ka ta krê djobe pas ku kunpanheru, ta ser traidoris, temozus.’ — 2 Timóteo 3:1-4.

Bíblia dja flaba ma alguns manera di ser i konportamentu di ómi, ta binha poi klima ta muda. Govérnus i kes algen di nogósiu ta preokupa más ku dinheru di ki ku futuru di pesoas. I mésmu óras ki es ta trabadja djuntu pa es rezolve prubléma di klima, es ka ta konsigi.

Kel profesia li ta mostra ma nu ka debe spéra ma pesoas ta ben muda kes kuza ki es ta faze i proteje téra. Má, Bíblia ta fla ma pesoas ki ta pensa sô na ses kabésa ‘ta ben bira kada bês más piór’. — 2 Timóteo 3:13.

Pamodi ki nu pode ten sertéza ma Deus ta ben aji?

Bíblia ta mostra ma nos kriador, Jeováa Deus, ta preokupa txeu ku nos planéta i ku kes algen ki ta mora na el. Odja sô três versíklu di Bíblia ki ta mostra ma Deus ta ben aji.

1. 1. Deus ‘ka kria [téra] pa nada, má el faze-l pa moradu na el’. — Isaías 45:18.

   Deus ta ben kunpri kel obijetivu ki el tinha pa téra. (Isaías 55:11) El ka ta dexa pa téra ser distruídu nen pa el bira un lugar ki ningen ka ta pode mora na el.

2. 2. ‘Kes algen mansu ta ben toma kónta di téra i es ta ben ten txeu alegria ku txeu pas. Téra ta ben ser di kes algen justu i es ta ben vive na el pa tudu ténpu.’ — Salmo 37:11, 29.

   Deus ta promete ma pesoas ta ben vive na téra pa tudu ténpu na pas.

3. 3. ‘Má kes algen mau, ta ben tradu di téra’. — Provérbios 2:22.

   Deus ta promete ma el ta ben kaba ku kes algen ki sta faze kuzas mariadu, i kel-li ta inklui kes algen ki sta ta straga téra.

Kuzê ki Deus ta ben faze pa nos futuru?

Modi ki Deus ta ben kunpri se promésa pa téra? El ta ben uza un govérnu ki txoma Reinu di Deus. (Mateus 6:10) Kel Reinu li ta ben governa téra la di séu. El ka ta ben faze ninhun akordu ku govérnus di ómi sobri asuntus ki ten aver ku téra i anbienti. Envês di kel-li, Reinu di Deus ta ben fika na lugar di govérnus di ómi. — Daniel 2:44.

Reinu di Deus ta ben faze kuzas bon pa tudu algen i pa anbienti. (Salmo 96:10-13) Odja kuzê ki Jeová ta ben faze através di se Reinu.

• Konpo anbienti

  Kuzê ki Bíblia ta fla: ‘Dizértu i téra séku ta ben fika kontenti, kes lugar planu na dizértu ta ben grita ku txeu alegria i es ta ben da flor sima asafron.’ — Isaías 35:1.

  Kuzê ki kel-li krê fla sobri nos futuru: Jeová ta ben konpo nos planéta i ti kes lugar ki sta txeu stragadu pamodi kuzas ki ómi ta faze.

• El ta kontrola klima

  Kuzê ki Bíblia ta fla: ‘[Jeová] ta kalma tenporal di béntu; i óndias di mar ta fika kalmu.’ — Salmo 107:29.

  Kuzê ki kel-li krê fla sobri nos futuru: Jeová ten puder di kontrola klima. Pesoas ka ta ben sufri más pamodi mudansas di klima.

• El ta ben inxina pesoas kuida dretu di téra

  Kuzê ki Bíblia ta fla: ‘N ta da-u sabedoria i N ta inxina-u na ki kaminhu ki bu debe anda.’ — Salmo 32:8.

  Kuzê ki kel-li krê fla sobri nos futuru: Jeová da pesoas responsabilidadi di kuida dretu di téra. (Génesis 1:28; 2:15) El ta ben inxina-nu kuida dretu di kes kuza ki el kria i vive di un manera ki ka ta straga anbienti.