Kalor dimás ki sta na mundu na veron di 2023 — Kuzê ki Bíblia ta fla?

Pesoas na mundu interu sta ta pasa pa txeu kalor ki nunka ka kontiseba antis i dizastris pamodi klima. Odja alguns izénplu:

“Dja ten 174 anu ki kumesa ta mididu tenperatura na mundu interu, i kel-li é mês di junhu más kenti ki dja nu pasa pa el.” — Agência Nacional Oceânica e Atmosférica, Departamento de Comércio dos E.U.A, 13 di julhu di 2023.
“Itália, Spanha, Fransa, Alimanha i Pulónia sta ta pasa pa kalor dimás i es sta spera ma tenperatura ta kontinua ta subi ti 48°C [118°F] na ilhas di Sisília i di Sardenha. Si kel-li kontise, talvês ta ben ser kel tenperatura más altu ki nu sabe ma tevi na Europa.” — Agência Espacial Europeia, 13 di julhu di 2023.
“Sima téra ta ba ta fika más kenti, nu ta spera ma ta ben ten txuba kada bês más txeu i más fórti, ku txeia ki ta ben faze txeu stragu.” — Stefan Uhlenbrook, diretor di idrolojia, agu i kriosféra na Organização Meteorológica Mundial, 17 di julhu di 2023.

Bu sta preokupadu ku kes notísia sobri dizastris pamodi klima? Odja kuzê ki Bíblia ta fla sobri kel asuntu inportanti li.

Dizastris pamodi klima sta ta kunpri profesias di Bíblia?

Sin. Kalor dimás i otus dizastri pamodi klima ki sta kontise na mundu interu sta ta kunpri kuzê ki Bíblia dja flaba ma ta kontiseba na nos ténpu. Pur izénplu, Jizus dja flaba ma nu ta ben odjaba “kuzas ki ta da [algen] medu”. (Lukas 21:11) Kalor ki sta txeu dimás tene txeu algen ku medu ma ómis ta ben kaba ku téra.

Ka ta da pa nu vive na téra más?

Ta da sin. Deus faze téra pa ser nos kaza pa tudu ténpu. El ka ta dexa ómis distrui-l. (Salmo 115:16; Eclesiastes 1:4) Na verdadi, Deus promete ma el ta ben “kaba ku kes ki sta ta kaba ku téra.” — Apokalipse 11:18.

Bíblia ta mostra ma Deus ten puder di proteje téra di kes dizastri na naturéza i ma el ta ben faze kel-li.

‘Deus ta kalma tenporal di béntu; i óndias di mar ta fika kalmu.’ (Salmo 107:29) Deus ten puder di kontrola forsas di naturéza. El ta konsigi rezolve kes prubléma na naturéza ki ta poi kes dizastri pamodi klima ta kontise i ki tene algen ta sufri oji.
‘Bu ta kuida di téra, bu ta pô-l ta da kumida txeu dimás i ku txeu rikéza.’ (Salmo 65:9) Deus ta ben abênsua téra i el ta ben bira-l un paraízu.

Pa bu sabe más sobri promésa di Bíblia di konpo téra, odja artigu “Kenha ki ta ben salva Téra?”.