NU MANTE SIENTI!

Txeu rafujiadu — Milhons di algen sta ta fuji di Ukránia

Rúsia kumesa ta invadi Ukránia na dia 24 di febreru di 2022. Kel-li poi milhons di algen na prigu i ta tenta fuji faxi di país.a

“Tinha bonbas i spluzon. É un kuza ki da-nu tantu medu ki é difísil atxa palavras pa splika. Kantu nu fika ta sabe ma tinha konboiu pa tra algen di la, nu disidi bai. Nu tevi ki dexa tudu kuza pa tras, pamodi kada algen podia sô lebaba un muxila pikinoti. Nu podia sô lebaba dukumentus, ramedi, agu i algun kuza pa kume. Nu dexa tudu kes otu kuza pa tras i nu bai pa lugar di panha konboiu, timenti bonbas staba ta spludi na nos vólta.” — Nataliia, di sidadi di Kharkiv na Ukránia.

“Ti kel últimu momentu, nu ka ta kriditaba ma ta tinha géra. N obi spluzon na alguns párti di sidadi i janélas staba ta treme. N disidi sai di la, i N leba sô kes kuza ki N ta mesteba. N sai di kaza 8 óra di palmanhan i N panha un konboiu pa Levivi. Dipôs N panha un otokaru pa Pulónia.” — Nadija, di sidadi di Kharkiv na Ukránia.

Na kel artigu li

Pamodi ki sta ta ten txeu rafujiadu?

Trópas di Rúsia invadi Ukránia, pur isu kumesa ta ten txeu rafujiadu. Má Bíblia ta mostra otus motivu di pamodi ki sta ta ten tudu kes rafujiadu la:

Govérnus di ómi na mundu interu ka sta konsigi da pesoas kes kuza ki es meste. Kes ki sta na puder txeu bês ta uza ses autoridadi pa es kontrola i maltrata pesoas. — Eclesiastes 4:1; 8:9.
Satanás, ki é Diabu, ‘kel governanti di mundu’, sta ta influensia pesoas pa faze kuzas mariadu di tal manera ki Bíblia ta fla: ‘Mundu interu sta na puder di Malvadu.’ — João 14:30; 1 João 5:19.
Alén di kes prubléma ki pesoas sta pasa pa el dja ten senténas di anu, nu sta ta vive gósi na un ténpu ki Bíblia dja papiaba di el: ‘Na ténpu di fin kuzas ta fika konplikadu, difísil di aguenta.’ (2 Timóteo 3:1) Tanbê na ténpu di fin ta kontiseba géras, dizastris na naturéza, falta di kumida i duénsa. Kes kuza li ta poba pesoas ta fuji di ses kaza. — Lucas 21:10, 11.

Undi ki rafujiadus pode atxa speransa?

Bíblia ta mostra ma nos Kriador, Jeová,b é un Deus ki ten konpaxon pa kes rafujiadu i pa kes algen ki ten ki dexa ses kaza. (Deuteronómio 10:18) El promete rezolve prublémas di kes rafujiadu através di se govérnu na séu, ki ta txomadu Reinu di Deus, ki ta ben fika na lugar di kes govérnu di ómi. (Daniel 2:44; Mateus 6:10) Jeová ta ben uza se Reinu pa kaba ku Satanás. (Romanos 16:20) Kel Reinu li ta ben governa Téra interu i el ta ben kaba ku kes divizon ki ta kontise pamodi fronteras di kada país. Tudu algen ta ben bira un família unidu na mundu interu. Ningen ka ta ben meste fuji más di se kaza, pamodi Bíblia ta promete: ‘I kada un di es ta ben xinta baxu di se pé di uva i baxu di se pé di figu, i ka ta ten ningen pa pô-s ta xinti medu, pamodi é bóka di Jeová di izérsitu ki fla.’ — Miqueias 4:4.

É sô Reinu di Deus ki ta pode rezolve prublémas di kes txeu rafujiadu pa tudu ténpu. Jeová ta ben uza se Reinu pa kaba ku kes prubléma ki ta obriga pesoas bira rafujiadu. Odja alguns izénplu:

Géra. ‘[Jeová] ta kaba ku géra.’ (Salmo 46:9) Pa bu sabe modi ki Deus ta ben kaba ku géra, lé artigu “Como é que existirá paz na Terra?”
Abuzu i violénsia. ‘[Jeová] ta libra-s di abuzu i di violénsia’. (Salmo 72:14) Pa bu ntende modi ki pesoas pode muda ses atitudi negativu ki es ten dja ten txeu ténpu, lé kes artigu ki sta na un revista ku téma: “Nu pode vense ódiu”.
Pobréza. ‘[Jeová] ta ben salva kes algen póbri ki ta sta ta txora ta pidi ajuda’. (Salmo 72:12) Pa bu sabe modi ki Deus ta ben kaba ku kes kuza ki ta traze pobréza, lé artigu “Prublémas di dinheru ta ben dexa di izisti?”
Falta di kumida. ‘Ta ben ten kumida avontádi na Téra’. (Salmo 72:16) Pa bu sabe modi ki Deus ta ben garanti ma ningen ka ta pasa fómi, lé artigu “Um mundo sem fome”.

Bíblia pode djuda rafujiadus oji?

Sin. Alén di da rafujiadus un speransa suguru pa futuru, Bíblia pode djuda-s lida ku kes prubléma ki es sta pasa pa el gósi.

Prinsípiu di Bíblia: ‘Algen nosenti ta kridita na tudu palavra, má ken ki é prudenti ta pensa antis di el da kada pasu.’ — Provérbios 14:15.

Kuzê ki kel-li krê fla: Pensa na kes prigu ki pode kontise i kuzê ki bu pode faze pa proteje. Toma kuidadu ku kes algen ki ta tenta pruveta di kes rafujiadu na kel novu lugar ki es sta, pamodi es sabe ma kes rafujiadu pode ka xinti suguru i es ka ten spiriénsia.

Prinsípiu di Bíblia: ‘Si nu tene algun kuza di kume i pa bisti, nu ta fika kontenti ku kes kuza.’ — 1 Timóteo 6:8.

Kuzê ki kel-li krê fla: Ka bu konsentra bu menti na kuzas material. Óras ki bu sta kontenti ku kes kuza ki bu meste bu ta ser más filís.

Prinsípiu di Bíblia: ‘Nton, tudu kuza ki nhos krê pa ómis faze nhos, nhos faze-s tanbê.’ — Mateus 7:12.

Kuzê ki kel-li krê fla: Ten paxénxa i mostra bondadi. Si bu ten kes kualidadi li ta fika más fásil pesoas na kel novu lugar ki bu sta ruspeta-u i seta-u.

Prinsípiu di Bíblia: ‘Ka nhos paga ningen mal ku mal.’ — Romanos 12:17.

Kuzê ki kel-li krê fla: Ka bu dexa raiba pô-u ta vinga óras ki bu maltratadu. Kel-li sô ta poi kuzas ta piora.

Prinsípiu di Bíblia: ‘Pa tudu kuza N ten forsa pamodi kel ki ta da-m puder.’ — Filipenses 4:13.

Kuzê ki kel-li krê fla: Poi Deus ta ten un lugar inportanti na bu vida i faze orason pa el. El pode da-u kel forsa ki bu meste pa lida ku kel situason.

Prinsípiu di Bíblia: ‘Ka nhos fika preokupadu dimás ku ninhun kuza, má na tudu kuza, nhos faze orason ku súplika, djuntu ku agradesimentu, pa nhos dexa Deus sabe kuzê ki nhos krê; i pas di Deus, ki ningen ka ta konsigi ntende, ta guarda nhos korason i nhos pensamentu’. — Filipenses 4:6, 7.

Kuzê ki kel-li krê fla: Pidi Deus pa da-u kel pas na menti i na korason ka ta nporta ki situason bu sta pasa pa el. Djobe artigu “Filipenses 4:6, 7: ‘Não andem ansiosos por coisa alguma’”.

a Kel otu dia dipôs ki es invadi Ukránia, Alto Comissariado das Nações Unidas para Refugiados (ACNUR) fla ma kel situason li podu na kel nível más altu di imerjénsia. Sô na 12 dia, más di 2 milhon di rafujiadu fuji di Ukránia pa kes país ki ta fikaba pértu di la, timenti otu 1 milhon di algen tevi ki dexa ses kaza i fuji pa otus párti di Ukránia.

b Jeová é nómi di Deus. (Salmo 83:18) Djobe artigu “Ken ki é Jeová?”