Ajuda ki dadu na ténpu di “géra i di notísias di géra”

Nu sta ta vive na ténpu di fin, pur isu nu ta spera ma nu ta “obi ta papiadu di géra i di notísias di géra.” (Mateus 24:6) Má, óras ki nos irmons sta ta pasa pa prublémas pamodi géra, es ta resebe kel ajuda ki es meste. Rilatóriu di Grupu Enkaregadu di Óbra di 2022 — Nunbru 3 da-nu informasons ki ta konsola-nu sobri ajuda ki sta ta dadu na lésti di Europa pa kes irmon ki sta ta sufri pamodi géra na Ukránia. Modi ki nos irmons sta ta konsigi faze kel-li mésmu na meiu di géra? Modi ki ses sforsu sta ta djuda irmons na Ukránia?

Di kuzê ki nos irmons meste? Modi ki lebadu kes ajuda?

Kantu géra kumesa na Ukránia, na dia 24 di febreru di 2022, Kumison di Kordenadoris aprova pa uza kel dinheru ki meste pa djuda nos irmons na Ukránia. Filial di Ukránia kumesa lógu ta kunpra kes kuza ki es mesteba la mê, i es uza kes 27 Kumison di Ajuda ki skodjedu pa manda kes kuza pa irmons.

Alén di kel-li, irmons na Sédi Mundial di Tistimunhas di Jeová kumesa lógu ta pensa na kuzê más ki es podia faze pa djuda Filial di Ukránia. Kumison di Kordenadoris i Kumison Editora di Grupu Enkaregadu di Óbra pidi Dipartamentu di Kónpra pa Mundu Interu pa trabadja djuntu ku reprizentantis di Filial di Ukránia i di Pulónia pa djobe kuzê ki irmons mesteba i faze planus pa djuda-s. Irmons di Dipartamentu di Kónpra, di kel dipartamentu ki ta manda kuzas i di Dipartamentu di Leis di kada filial, djuntu ku un irmon di Kumison di Filial di Ukránia i irmons di Dipartamentu di Kónpra pa Mundu Interu, ta fazeba un runion tudu dia pa organiza ses trabadju.

Irmon Jay Swinney, ki ta faze párti di Dipartamentu di Kónpra pa Mundu Interu, fla: “Primeru, nu tinha ki djobe kuzê ki irmons mesteba. Nu kria mandaba kumida i otus kuza ki irmons staba kustumadu ku el. Má, sabe kuzê ki irmons mesteba éra sô un párti di prubléma. Tanbê, nu tinha ki odjaba modi ki nu ta mandaba kes kuza pa Ukránia duránti kel ténpu di géra, di un manera más suguru i rápidu posível.”

Ti dia 9 di marsu di 2022, irmons dja sabia ki kuzas ki nos irmons na Ukránia staba ta meste. Mandadu kaxótis ki tinha kuzas sima lata di karni, lata di pexi, arôs, fijon, djuntu ku otus kuza ki es ta mesteba, sima saboneti i papel ijiéniku. Fazedu kónta i nu odja ma kes kuza ki kada algen ta mesteba pa un mês ta daba uns 65 dóla di Mérka (uns 6.500 skudu di Kabu Verdi). Dja ki txeu irmon ta mesteba di kes kuza, Kumison di Kordenadoris aprova pa uzadu txeu dinheru pa djuda irmons. Má modi ki nos irmons ta konsigi lebaba kes kuza pa Ukránia di un manera suguru?

Na dia 13 di marsu, dôs irmon di Pulónia sprimenta leba kes kuza di Filial di Pulónia ti un armazén ki ta fika pértu di Lviv, na Ukránia. Alguns dia antis di kes dôs irmon faze kel viajen, txeu irmon di Filial di Pulónia i di Ukránia djuda-s pripara pa kel viajen. Filial ranja tudu kes dukumentu ki irmons ta mesteba pa es pasa frontera pa leba ajuda. Tanbê es poi alguns sinal na karu, pa mostraba klaru ma nos irmons staba ta leba ajuda i es pâpia ku irmons na Ukránia pa djuda-s atxa kel kaminhu más pértu óras ki es pasaba frontera. Pamodi kel bon priparason i benson di Jeová kes irmon konsigi intrega kes ajuda na Lviv i dipôs es volta pa Pulónia ku suguransa. Sô na un dia tudu kes Kumison di Ajuda resebe kes kuza.

Enbóra kel primeru viajen kóre dretu, irmons konsigi intrega ménus di un tonelada di kuzas. Inda es meste lebaba uns 200 tonelada di kuzas! Má, modi ki es ta konsigi lebaba i intregaba tudu kes kuza más rápidu posível?

‘Bu povu ta oferese ses kabésa di livri vontadi’

Dipôs ki podu notísia na jw.org sobri modi ki nos irmons na Ukránia staba ta sufri pamodi géra, pesoas di mundu interu oferese pa djuda. Txeu algen ki ta mora lonji faze kontribuisons na jw.org pamodi es tinha serteza ma kel dinheru ta ba uzadu di midjór manera. Otus ki ta mora na kes país más pértu uza ses ténpu, ses forsa i kes kuza ki es ten pa djuda. Odja alguns izénplu.

Na Pulónia, irmons ki staba ta djuda pripara un monti kaxóti ku kuzas ki irmons na Ukránia ta mesteba, i tanbê alguns kriansa faze kartons pa manda. Irmon Bartosz Kościelniak, ki ta faze párti di Dipartamentu di Kónpra na Filial di Pulónia, fla: “Dja N lé kel testu ki sta na Salmo 110:3 txeu bês, ki ta fla ma ‘povu di Jeová ta oferese ses kabésa di livri vontadi’. Má gósi dja N odja ku nha odju kel apoiu ki irmons ten stadu ta da. Txeu di kes irmon li oferese faxi pa ben djuda na tudu kel ki meste. Kel-li ta mostra ma kes palavra di Salmo 110:3 sta ta kunpri.”

Un irmon ki ten un inpréza ki ta leba kuzas pa txeu país, inprista irmons kamions i el oferese konbustível ki es ta mesteba pa kes kamion. Kel irmon fla: “Kel-li foi un oportunidadi pa N mostra nha amor pa irmons i pa Jeová. N sta txeu filís pamodi N oferese pa djuda.” Irmons dja resebe más di 7.700 litru di konbustível. Tanbê, irmons dja uza ses ténpu i forsa pa konduzi kuazi 48 mil kilómetru pa intrega kes kuza!

Irmons oferese di livri vontadi i ku amor. Pamodi kel-li, na dia 28 di marsu, sô 15 dia dipôs ki es faze kel primeru viajen, 100 tonelada di kumida, kuzas di ijiéne, ramedi i otus kuza pa kuida di saúdi intregadu na Ukránia! Dja ki irmons i alguns inpréza oferese txeu kuza, nu popa txeu dinheru na manda irmons kes kaxóti ku kes kuza ki es mesteba. Ti gósi, Tistimunhas di Jeová dja manda más di 190 tonelada di kuzas pa djuda na Ukránia. Modi ki kes kuza ki mandadu sta ta djuda irmons?

“Es tinha nhos amor tanbê!”

Dipôs ki kes kaxóti txiga na Lviv, kes Kumison di Ajuda na Ukránia, manda kes ajuda pa kes irmon ki mesteba. Kes kaxóti intregadu na txeu sidadi i alguns di es intregadu más di 1.300 kilómetru lonji di Lviv. Enbóra kel trabadju li fazedu di un manera organizadu, simé el gasta txeu ténpu.a

Irmon Markus Reinhardt, ki ta faze párti di Kumison di Filial di Ukránia, fla: “Duránti kel momentu difísil li, txeu irmon sta ta xinti amor di Jeová. Es sta ta odja pamodi ki é inportanti sigi orientason di organizason, mésmu antis di kontise un dizastri. Pur izénplu, nos tudu nu ta insentivadu pa nu guarda agu i kumida ki ta dura pa alguns simana. Un ansion ki txoma Anton, ki ta sirbi na un kongregason na Kiev, fla kel-li sobri es orientason: ‘Nu sta txeu kontenti pamodi organizason di Jeová ta pripara-nu pa situasons difísil. Nu konsigi salva nos vida pamodi alén di un rádiu, nu guarda kumida i agu.’ Nu sta kontenti di odja ma irmons leba asériu kes orientason li, pamodi asi filial konsigi ténpu pa organiza kes ajuda.”

Modi ki irmons xinti dipôs ki es resebe kel ajuda? Mykola i Zinaida, ki ta vive na Kharkiv, fla: “Preokupason di irmons toka nos korason. Obrigadu pa kumida i ramedi. Di serteza, nu ta xinti ma Jeová sta ta kuida di nos.” Valentyna, ki ta mora na mésmu zóna, fla: “Désdi ki géra kumesa, pesoas ten ki spera txeu ténpu na un fila pa es pode kunpra kes kuza ki es ta meste. Nen sénpri nu ka ta konsigi kunpra kuzê ki nu ta meste. Má Jeová staba ta odja kuzê ki nu staba ta pasa pa el. Pur isu, el uza nos irmons pa leba-nu alguns kuza na nos kaza i kes kaxóti tinha kes kuza ki nu staba ta meste! Na un situason difísil ki ta parse ma ka ten saída, nu ta xinti ma Jeová i se organizason ta kuida di nos di un manera spesial. . . É rei di sábi xinti ma Jeová ta apoia-nu i ta djuda-nu óras ki más nu meste.”

Yevhen i Iryna, ki fuji di Mariupol, fla: “Nu ta agradese pa karinhu i apoiu ki nhos da nos família. Nhos pode ten serteza ma el txiga déntu di óra. Na komésu, nu atxa ma kes kaxóti tinha sô kes kuza ki nu mesteba, má kantu nu abri-s, nu odja ma es tinha nhos amor tanbê!”

Di serteza nu ta konsigi odja ma Jeová uza se spritu santu pa orienta se povu, i pamodi kel-li es konsigi djuda duránti ténpu di “géra i di notísias di géra”. Kes kontribuison ki nhos ta faze pa apoia trabadju na mundu interu, ki txeu bês ta fazedu na donate.jw.org, foi txeu inportanti pa da tudu kes ajuda li. Nu ta agradese nhos txeu pa kes kontribuison ki nhos ta faze di korason!

Ta da ajuda di manera más suguru i rápidu posível

1. 

   24 di febreru di 2022: Kumison di Kordenadoris aprova pa uza kel dinheru ki ta mestedu pa kumesa ta djuda nos irmons na Ukránia.

2. 

   24 di febreru ti 8 di marsu di 2022: Filial di Ukránia kumesa lógu ta kunpra kes kuza ki es mesteba la mê i es uza kes Kumison di Ajuda na Ténpu di Dizastri pa intrega-s pa irmons. Filial tanbê pripara pa resebe i distribui kes ajuda ki ben di Pulónia.

3. 

   9 di marsu di 2022: Kumison di Kordenadoris aprova pa manda kes ajuda pa Ukránia.

4. 

   10 ti 12 di marsu di 2022: Irmons kumesa ta organiza pa faze kel primeru viajen pa manda kes ajuda di Pulónia pa Lviv, na Ukránia.

5. 

   13 di marsu di 2022: Fazedu kel primeru viajen pa leba kes ajuda di Pulónia pa Lviv, na Ukránia.

6. 

   14 ti 16 di marsu di 2022: Na un Salon di Asenbleia pértu di Poznan, na Pulónia, irmons di Dipartamentu di Dizenhu i Konstruson, oferese pa djuda pripara kaxótis ku kumida i kuzas di ijiéne.

7. 

   17 di marsu di 2022: Kuatu dia dipôs ki kes irmon faze kel primeru viajen pa intrega kes kuza, irmons kumesa ta leba 13 tonelada di kaxótis di kuzas pa djuda ti frontera di Ukránia.

8. 

   21 ti 27 di marsu di 2022: Irmons sigi kel mésmu planu i es pripara kes kaxóti ki staba ta falta i es manda-s di Pulónia pa Ukránia. Dipôs, sô na un dia, es konsigi distribui tudu kes ajuda na kes lugar ki mesteba.

9. 

   28 di marsu di 2022: Na ménus di 20 dia, dipôs ki irmons resebe aprovason, 100 tonelada di kumida, kuzas di ijiéne, ramedi i otus kuza pa kuida di saúdi mandadu pa Ukránia.

Ti gósi, Tistimunhas di Jeová dja manda más di 190 tonelada di kumida i otus kuza pa Ukránia.