NU MANTE SIENTI!

Kuzê ki Bíblia ta fla sobri kuzas ki relijions sta faze duránti géra na Ukránia?

Nu ben odja alguns kuza sobri xéfis di relijion inportanti i géra na Ukránia:

“Xéfi di Igreja Ortodoksu di Rúsia, ki ta txomadu Patriarka Kiril, ka fla nada sobri ataki ki Rúsia faze. . . . Un di kes diskulpa ki Putin uza pa kel géra li é kel kanpanha ki Igreja Ortodoksu staba ta faze sénpri sobri Ukránia.” — Jornal EUobserver, 7 di marsu di 2022.
“Patriarka Kiril. . . mostra klaru ma el apoia se país ki invadi Ukránia, kantu el fla ma kel géra li ta faze párti di un luta kóntra pekadu.” — Notísia na AP News, 8 di marsu di 2022.
“Na sugunda-fera xéfi di Igreja Ortodoksu, ki ta txomadu Metropolitano Epifánio I, di Kiev, abênsua se povu pa ‘luta kóntra trópas di Rúsia’. . . Tanbê [el] fla ma mata trópas di Rúsia é ka pekadu.” — Jornal Jerusalem Post, 16 di marsu di 2022.
“Anos di [Organizason di igrejas i relijion di Ukránia (UCCRO)] nu ta apoia trópas di Ukránia i tudu kes algen ki sta difende-nu. Nu ta abensua-s óras ki es ta difende Ukránia di kes algen ki sta ataka-nu i nu ta faze orason pa es.” — Diklarason di UCCRO,a 24 di febreru di 2022.

Kuzê ki bu ta atxa? Kes relijion ki ta fla ma es ta sigi Jizus Kristu debe fla kes algen di ses relijion pa bai géra? Kuzê ki Bíblia ta fla?

Stória di relijion na géra

Stória ta mostra ma relijion txeu bês seta, da diskulpa i ti apoia géra timenti es finji ma es staba ta npenha pa pas. Pa txeu anu, Tistimunhas di Jeová mostra klaru ma kes relijion staba ta finji. Odja alguns izénplu ki dja ben na nos publikasons.

Artigu “As Cruzadas: Uma ‘Trágica Ilusão’”, mostra modi ki Igreja Katólika tinha kulpa pa kes matansa ki fazedu na nómi di Deus i di Kristu.
Artigu “A igreja católica na África” da un izénplu di modi ki relijion falsu fadja na inpidi géra entri tribus i ti matansa.
Kes artigu “A culpa é da religião?”, “O papel da Religião nas guerras humanas” i “A religião toma partido”, splika modi ki kes xéfi di kes relijion katólika, ortodoksu i protestanti apoia kes dôs ladu na txeu géra.

Kes relijion ki ta fla ma es ta sigi Jizus debe apoia géra?

Kuzê ki Jizus inxina: ‘Ama bu prósimu sima bu ta ama ku kabésa.’ (Mateus 22:39) ‘Nhos kontinua ta ama nhos inimigus’. — Mateus 5:44-47.

Pensa na kel-li: Un relijion pode fla ma el ta sigi órdi di Jizus sobri ama kunpanheru i omésmu ténpu el ta fla kes algen ki ta sigi-l pa mata kunpanheru na géra? Pa atxa respósta, djobe kes artigu li: “Os cristãos verdadeiros e a guerra” i “É possível amar os inimigos?”

Kuzê ki Jizus fla: ‘Nha Reinu ka ta faze párti di es mundu. Si nha Reinu ta fazeba párti di es mundu, nhas ajudanti ta brigaba pa es ka ntregaba mi’. (João 18:36) ‘Tudu kes ki uza spada, é spada ki ta mata-s.’ — Mateus 26:47-52.

Pensa na kel-li: Si kes algen ki ta sirbi Deus ka briga nen pa proteje Jizus es debe uza arma pa kalker otu motivu? Lé artigu “A guerra é compatível com o cristianismo?” pa odja modi ki kes kriston di ténpu di apóstlus sigi izénplu di Jizus di manera fiel i kes kuza ki el inxina.

Kuzê ki ta ben kontise ku kes relijion ki ta apoia géra?

Bíblia ta inxina ma Deus ka ta seta kes relijion ki ta fla ma es ta reprizenta Jizus, má ki ka ta sigi kes kuza ki el inxina. — Mateus 7:21-23; Tito 1:16.

Livru di Apocalipse ta mostra ma pa Deus, kes relijion li é kulpadu pa mórti ‘di tudu kes ki matadu na Téra’. (Apocalipse 18:21, 24) Pa sabe pamodi, lé artigu “Kuzê ki é Babilónia Grandi?”.
Jizus mostra ma tudu kes relijion ki Deus ka ta seta ta ben distruídu pamodi kes kuza mariadu ki es ta faze, sima un arvi podri ki ta da fruta podri ‘ta kortadu i ta botadu déntu lumi.’ (Mateus 7:15-20) Pa sabe modi ki kel-li ta ben kontise, lé artigu “O Fim da Religião Falsa Está Próximo!”.

Tistimunhas di Jeová é diferenti

Na Rúsia i na Ukránia, sima na kes otu párti di mundu, Tistimunhas di Jeová ta obi ku órdi di Jizus di ka mete na pulítika i ka partisipa na géra. Pamodi kel-li, nu ka ta partisipa nen nu ka ta apoia kel géra li nen kalker otu géra. Pamodi nos disizon di sigi kel ki Bíblia ta inxina, alguns Tistimunha di Jeová sta ta pirsigidu. (João 15:19, 20; 2 Timóteo 3:12) Pur izénplu, govérnu di Rúsia dja poi txeu Tistimunha di Jeová na kadia i ti es tortura alguns di es. Tanbê es toma nos lugar di adorason. Pa sabe más, entra na www.jw-russia.org.

Odja vídiu Testemunhas de Jeová em Irkutsk Permanecem Fiéis Apesar de Buscas Violentas, di kuatu minutu, pa odja modi ki Tistimunhas di Jeová na Rúsia sta ta pirsigidu pamodi ses fé.
Dja ten txeu ténpu ki Tistimunhas di Jeová ka ta mete na asuntus di mundu. Odja vídiu Es mante firmi kantu es sufri opozison pa odja ma es ka mete na asuntus di mundu sikrê ku kel grandi pirsigison di Alimanha Nazi i di antigu Union Suviétika.

Favor, entra na jw.org pa sabe más sobri kuzê ki nu ta kridita na el. Kel-li ta inklui kel promésa di Bíblia di un futuru ki ka ta ben ten géra más. (Isaías 2:4; Jeremias 29:11) Pa bu sabe más, nu ta konvida-u pa bu pâpia ku nos.

Dónus di fotus, di skérda pa direita: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO ô Organizason di igrejas i relijion di Ukránia, ta inklui 15 igreja ki ta reprizenta relijion Ortodoksu, Igreja Katólika, Protestanti, kes relijion ivanjéliku i tanbê relijion di judeus i musulmanus.