Ki líder ki bu ta skodje? — Kuzê ki Bíblia ta fla?

Pesoas ta kustuma toma disizons inportanti i skodje kenha ki ta ser ses líder.

Kuzê ki Bíblia ta fla?

Kes líder di téra ka ta konsigi faze tudu kuza

Bíblia ta fla ma kes líder di téra ka ta konsigi faze tudu kuza.

• ‘Ka nhos kunfia na prínsipis nen na fidjus di ómi ki ka ta pode traze salvason. Se folgu ta sai, i el ta torna ba pa téra; na kel dia mê se pensamentus ta kaba.’ — Salmo 146:3, 4, nóta di rodapé.

Ti kes líder ki ta parse ma es é más midjór, ku ténpu es ta móre. Tanbê, es ka ta garanti ma kes algen ki ta ben dipôs di es ta kontinua ta faze tudu kes bon trabadju ki es faze. — Eclesiastes 2:18, 19.

Na verdadi, Bíblia ta fla ma Deus nunka ka faze ómi pa governa se kabésa.

• ‘Ómi é ka kapás di gia se kabésa.’ — Jeremias 10:23.

Ten algun algen ki pode ser un bon líder oji?

Un líder ki Deus skodje

Bíblia ta mostra ma Deus skodje Jizus Kristu, kel midjór líder ki ten i ki é di kunfiansa. (Salmo 2:6) Jizus é Rei di Reinu di Deus, ki é un govérnu ki ta governa téra la di séu. — Mateus 6:10.

Bu ta skodje Jizus pa ser bu líder? Bíblia ta mostra pamodi ki kel pergunta li é inportanti:

• ‘Nhos onra Fidju [Jizus Kristu], sinon Deus ta fika xatiadu i nhos ta móre na kaminhu, pamodi El ta xinti raiba faxi. Filís é tudu kes ki ta djobe proteson na El.’ — Salmo 2:12.

Gósi ki é ténpu di bu toma bu disizon. Profesia di Bíblia ta mostra ma Jizus kumesa ta governa na anu 1914 i ma ka ta dura Reinu di Deus ta ben fika na lugar di govérnus di ómi. — Daniel 2:44.

Pa bu sabe más sobri modi ki bu pode apoia Jizus, lé artigu “Disidi apoia Reinu di Deus gósi!”.