Pamodi ki pulítika ta dividi pesoas? — Kuzê ki Bíblia ta fla?

Na mundu interu txeu nason sta divididu pamodi pulítika. Di akordu ku un piskizaa ki fazedu na anu 2022, “más di metadi di adultus na 19 país fla ma sta txeu prubléma na ses país entri kes algen ki ta apoia partidu pulítiku diferenti.”

Dja bu repara ma pesoas na undi ki bu ta mora sta txeu divididu pamodi pulítika? Pamodi ki kel-li ta kontise? Ten algun soluson? Odja kuzê ki Bíblia ta fla.

Atitudis ki ta dividi pesoas

Bíblia dja flaba ma na ‘ténpu di fin’, ô na nos ténpu, txeu algen ta tinha kes atitudi ki ka ta dexaba es fika unidu ku kunpanheru.

• ‘Na ténpu di fin, kuzas ta fika konplikadu, difísil di aguenta. Pamodi ómis ta ba ama sô ses kabésa i es ka ta krê djobe pas ku kunpanheru’. — 2 Timóteo 3:1-3.

Enbóra txeu algen sta ta sforsa pa djuda govérnu ten bons rezultadu, kel-li ka sta ta kontise. Pesoas ki ten opinion diferenti di kunpanheru ta atxa difísil, ô inposível, trabadja djuntu pa rezolve prublémas. Kel-li ta prova kuzê ki Bíblia dja flaba ma ta kontiseba.

• ‘Ómi ta manda na ómi pa se disgrasa.’ — Eclesiastes 8:9.

Má, Bíblia ta da-nu un soluson, ki é un govérnu ki ten un líder ki ta pode kaba ku tudu prubléma ki ta poi algen ta sufri oji.

Un bon líder ki ta preokupa ku nos

Bíblia ta pâpia di un bon líder, ki ka ten otu sima el. Kel líder é Jizus Kristu. El ten puder, autoridadi i dizeju di poi tudu algen unidu i na pas ku kunpanheru.

• ‘Na se ténpu, justu ta ben bira txeu, i ta ben ten txeu pas’. — Salmos 72:7.

• ‘Tudu nason ta ben sirbi-l.’ — Salmos 72:11.

Jizus é kel midjór líder ki ten pamodi el ta preokupa ku pesoas i el krê djuda-s, prinsipalmenti kes ki ta tratadu ku injustisa.

• ‘El ta ben salva kes algen póbri ki ta sta ta txora ta pidi ajuda, i tanbê kes algen umildi i tudu kes ki ka ten algen pa djuda-s. El ta xinti péna di koitadu i di póbri, i el ta salva vida di algen póbri. El ta libra-s di abuzu i di violénsia’. — Salmos 72:12-14.

Prende más sobri Reinu di Deus, ki é kel govérnu na séu ki se líder é Jizus Kristu. Odja modi ki el pode djuda-nu i modi ki nu pode apoia-l.

• Odja vídiu Kuzê ki é Reinu di Deus?.

• Lé artigu “Reinu di Deus é un govérnu sen korupson”.