Jogus Olínpiku ta konsigi uni pesoas di verdadi? — Kuzê ki Bíblia ta fla?

Sta speradu ma uns 5 bilhon di algen ta odja atlétas di 206 país ta partisipa na Jogus Olínpiku di 2024. Thomas Bach ki é prizidenti di Kumison Olínpiku Internasional, fla: “Nu sta partisipa na un kuza ki ta traze pas i union na mundu. Pa spritu di Jogus Olínpikus djuda tudu algen vive na pas i fika unidu sima un sô povu, sikrê ku tudu nos diferénsa”.

Jogus Olínpiku ta konsigi kes bon rezultadu li? Ten algun speransa pa pas i union?

Jogus Olínpiku ta traze pas i union?

Jogus Olínpiku di es anu poi pesoas ta pensa na más di ki sô disportu. Dja el poi pesoas ta pâpia sobri kes prubléma ki ta kontise na sosiadadi i na pulítika ki ta dividi pesoas, sima direitus umanu, rasismu, diskriminason pamodi relijion i puzison na sosiadadi.

Kes konpitison sima Jogus Olínpiku, ki ta involve algen di txeu país, ta poi algen ta divirti. Má tanbê es ta mostra i es ta insentiva manera di pensa i di faze kuzas ki ta dividi algen envês di traze pas i union pa tudu ténpu.

Bíblia dja flaba di manera di ser di pesoas na nos ténpu i pamodi ses manera di ser é difísil pa pesoas sta unidu. (2 Timótiu 3:1-5) Pa bu prende más sobri kel profesia li, lé artigu “Bíblia dja flaba modi ki pesoas ta ben pensaba i konportaba na nos ténpu?”.

Kuzê ki ta ben traze pas i union di verdadi

Bíblia ta da-nu speransa ma ta ben ten pas i union na mundu interu. El ta promete ma tudu algen ta ben sta unidu dibaxu di kel govérnu na séu ki txoma “Reinu di Deus.” — Lukas 4:43; Mateus 6:10.

Jizus Kristu, ki é Rei di Reinu di Deus, ta ben traze pas na mundu interu. Bíblia ta fla:

• ‘Justu ta ben bira txeu, i ta ben ten txeu pas’. — Salmo 72:7.

• ‘El ta ben salva kes algen póbri ki ta sta ta txora ta pidi ajuda... El ta libra-s di abuzu i di violénsia’. — Salmo 72:12, 14.

Mésmu gósi, kes kuza ki Jizus inxina dja uni milhons di algen na 239 país. Tistimunhas di Jeová na mundu interu dja prende vive na pas, pamodi es ta imita izénplu di Jizus. Pa odja modi ki es ta konsigi, lé kel Sentinéla ku téma “Nu pode vense ódiu”.