Sientistas adianta kel Rilóji di Fin di Mundu — Kuzê ki Bíblia ta fla?

Na dia 24 di janeru di 2023, sientistas poi kel Rilóji di Fin di Mundua más pértu di meia-noti. Kel-li krê fla más pértu di fin di mundu.

• “Na térsa-fera, kel ‘Rilóji di Fin di Mundu’, ki ta reprizenta kes prigu pa mundu, txiga más pértu di meia-noti pamodi géra na Ukránia, kes prubléma pamodi armas nukliar i tanbê pamodi mudansas di klima.” — AFP International Text Wire.

• “Na térsa-fera sientistas fla ma kel ‘Rilóji di Fin di Mundu’ adiantadu pa 90 sugundu antis di meia-noti. Kel-li é kel ténpu más pértu di armajedon ki dja nu txiga.” — ABC News.

• “Un grupu di sientistas di país diferenti aviza ma vida di pesoas nunka ka tevi na prigu sima gósi.” — Jornal The Guardian.

Fin di pesoas i di nos planéta sta kuazi ta txiga? Nu meste xinti medu di kuzê ki sta ben kontise na futuru? Kuzê ki Bíblia ta fla?

Kuzê ki sta ben kontise

Di akordu ku Bíblia, ‘téra ta fika pa tudu ténpu’ i pesoas ‘ta ben vive na el pa tudu ténpu.’ (Eclesiastes 1:4; Salmo 37:29) Nton pesoas ka ta ben distrui téra i nen es ka ta ben bira nos planéta na un lugar ki nu ka ta konsigi vive na el más.

Má, Bíblia ta pâpia di un fin. Pur izénplu, el ta fla ma ‘mundu sta ta pasa’. — 1 João 2:17.

• Pa bu sabe kuzê ki Bíblia krê fla óras ki el ta pâpia di fin di mundu, lé artigu “Fin di mundu sta kuazi ta txiga? Bíblia ta fla ma mundu ta ben kaba?”.

• Pa bu sabe kuzê ki Bíblia ta fla sobri kes kuza ki sta pa ben kontise na mundu, lé artigu “Ki ténpu ki fin di mundu ta ben?”.

Kontinua ku un atitudi puzitivu

Bíblia pode djuda-nu mante un atitudi puzitivu, sikrê ku kes prubléma ki mundu sta ta pasa pa el. Modi ki el ta faze kel-li?

• Bíblia ta da-nu konsedjus ki ta djuda-nu na nos dia-dia. (2 Timóteo 3:16, 17) Pur izénplu, lé artigu “Modi ki bu pode kontrola bus preokupason” pa odja modi ki Bíblia pode djuda-u mante un atitudi puzitivu sikrê bu sta pasa pa prublémas.

• Bíblia ta da-nu un speransa pa futuru ki nu pode kunfia na el. (Romanus 15:4) El ta splika-nu kuzê ki nu pode spera ma ta kontise gósi i na futuru, i kel-li ta djuda-nu kontinua ku kunfiansa sikrê ku kes kuza ki sta kontise na mundu oji.

Pa bu prende más sobri Bíblia, nu ta konvida-u pa bu studa Bíblia di grasa ku ajuda di un algen.