Modi ki Deus ta kuida di kes algen surdu
Oji ten uns 70 milhon di surdu na mundu interu i txeu di es ta uza língua jestual pa kumunika ku otus algen. Ten más di 200 língua jestual. É tristi, pamodi txeu bês otus algen ta trata kes algen surdu mariadu, sima nu pode odja na kes komentáriu li:
“Na mundu interu, txeu bês direitu di kes algen surdu i di kes algen ki ten prubléma di obi é iginoradu.” — Asosiason nasional di surdus (Mérka).
“Kes surdu ki ta mora na kes país póbri, es é kes más póbri, pamodi es ten difikuldadi na bai skóla, na atxa trabadju i ten otus kuza.” — Federason mundial di surdus.
Kuzê ki Deus ta atxa di kes algen surdu? Kuzê ki Bíblia ta fla sobri es? I modi ki Tistimunhas di Jeová sta ta djuda kes algen surdu?
Kuzê ki Deus ta atxa di kes algen surdu
Bíblia ta fla ki Jeováa Deus ta kuida di kes surdu. El krê pa es tratadu dretu i ten kel instruson ki el ta da.
Testu di Bíblia: ‘Ka bu maldísua un surdu’. — Levítico 19:14.
Kuzê ki kel-li krê fla: Kel Lei ki Jeová da israelitas na pasadu ta protejeba direitus di kes algen surdu.
Testu di Bíblia: “Deus ta trata tudu algen igual”. — Atus 10:34.
Kuzê ki kel-li krê fla: Jeová ta preokupa ku tudu algen, ka ta inporta ses kultura, manera ki es kriadu, língua ki es ta pâpia, ô si es é surdu.
Testu di Bíblia: ‘Jizus kumesa ta viaja i ta prega kes notísia sábi di Reinu’. — Mateus 9:35.
Kuzê ki kel-li krê fla: Jizus ben téra pa inxina pesoas sobri Reinu di Deus i kuzê ki Reinu ta ben faze pa tudu algen, i kel-li ta inklui kes algen surdu tanbê. — Mateus 6:10.
Testu di Bíblia: Jizus ti mésmu “poi surdu ta obi i mudu ta pâpia.” — Markus 7:37.
Kuzê ki kel-li krê fla: Jizus mostra kuzê ki Reinu di Deus ta ben faze na futuru, óras ki kes algen surdu ta ben bira ta obi i ta pâpia. Un bês Jizus mostra bondadi kantu el uza jéstus pa pâpia ku un ómi ki éra surdu i mudu antis di el kura-l. — Markus 7:31-35.
Testu di Bíblia: ‘Obidu di kes algen surdu ta ben distapa.’ — Isaías 35:5.
Kuzê ki kel-li krê fla: Jeová promete ma kes surdu ta ben obi na futuru. — Isaías 29:18.
Modi ki Tistimunhas di Jeová sta ta djuda kes surdu?
Na mundu interu Tistimunhas di Jeová sta ta pâpia di mensajen di speransa ki Deus ta da pa kes surdu. Modi ki nu sta faze kel-li? Nu ta faze Bíblia ku vídius ki ta uzadu pa studa Bíblia na más di 100 língua jestual. Tanbê nu ta oferese studus di Bíblia i nu ta faze runions na língua jestual. Nu ta faze tudu kel-li di grasa pa djuda kes ki ten dizeju di prende sobri Deus. Pamodi? Pamodi Jizus da kel órdi li: “Nhos resebe di grasa, pur isu nhos da di grasa tanbê.” — Mateus 10:8.
Bu pode atxa tudu kes informason li na internet ô bu pode baxa-s na bu telemóvel, tablet ô konputador di kes manera li:
JW.ORG. Klika na sínblu di língua ki ta fika di riba na kalker pájina di jw.org pa bu skodje un língua jestual ki bu krê.
Aplikativu JW Library Sign Language. Instala es aplikativu di grasa na bu telemóvel, tablet ô konputador pa bu sisti ô pa bu baxa vídius na língua jestual.
Ki feraméntas i prugramas pa studa Bíblia ki nu ten?
Bíblia na língua jestual. Traduson di Mundu Novu na língua jestual di Mérka foi kel primeru Bíblia konplétu ki lansadu na língua jestual na mundu. I oji Traduson di Mundu Novu sta disponível interu ô alguns párti na txeu língua jestual, i kada anu sta ta omenta nunbru di língua. (Pa bu odja un lista di línguas jestual ô pa bu odja Bíblia na internet, djobe na kuadru “Traduson di Mundu Novu di Bíblia na língua jestual”.)
Odja vídiu ku téma A ‘Tradução do Novo Mundo’ em Língua Gestual Americana Foi Concluída, pa bu prende sobri kuzê ki sta involvidu na traduzi Bíblia na língua jestual.
Pa bu midjora bu leitura di Bíblia, instala aplikativu JW Library Sign Language. Kel aplikativu ta djuda-u skodje kapítlu i versíklu ki bu krê na un Bíblia di língua jestual.
Dmytro ku Vita é pai ku mai i es é surdu, má ses fidjus ta obi. Odja modi ki odja Bíblia na língua jestual tudu dia ta djuda ses família.
Vídius ki ta inxina sobri Bíblia. Tistimunhas di Jeová ta faze vídius na línguas jestual ki ta djuda pesoas intende i aplika konsedjus di Bíblia na dia-dia. Es ta djuda. . .
Un studu di Bíblia pesoal. Prende mensajen di Bíblia na língua jestual na bu rítimu ku ajuda di un algen. Pidi pa un Tistimunha di Jeová mostra-u modi ki un studu di Bíblia ta funsiona.
Jeson Senajonon ta mora na Filipinas. Odja modi ki nos prugrama di studa Bíblia djuda-l ten un amizadi fórti ku Jeová.
Mario Antúnez éra pastor na un igreja na Onduras. Odja modi ki el atxa respóstas di perguntas ki el tinha sobri Bíblia, sima el konta na artigu “N tinha más perguntas di ki respóstas”.
Runions i Prugramas spesial. Na mundu interu nu ten kongregasons i grupus na língua jestual, ki kes algen surdu ta sisti runion tudu simana pa prende i adora Deus. Tudu anu nu ta faze otus runion más grandi na língua jestual. Pa kes algen ki é surdu i ségu, un algen ta pega na ses mô pa faze sinal pa es pode intende runion ô prugrama. Tanbê nu ten publikasons na língua braili di grasa.
Djobe un kongregason más pértu di bo.
Sabe más sobri nos kongrésus i asenbleias ki ta fazedu tudu anu.
Sisti Komemorason di mórti di Jizus, ki é kel dia más inportanti di anu.
José Luis Ayala ta mora na Méxiku. El nase surdu i dipôs el bira ségu. Odja modi ki el djudadu bira un bon instrutor di Bíblia.
a Jeová é nómi di Deus. (Salmo 83:18) Odja artigu “Ken ki é Jeová?”