Kuzê ki Bíblia ta fla sobri ser veganu?

Na mundu interu ten txeu algen ki krê ser veganu.

• “Ser veganu é un manera di pensa i di vive undi ki pesoas ta faze tudu ki es pode pa es ivita prujudika animal ô uza-l pa kume, pa faze ropa ô pa kalker otu obijetivu.” — The Vegan Society.

Alguns pesoa ta bira veganu ka sô pamodi es sta preokupa ku animal, má tanbê pamodi es krê midjora vida na téra, midjora ses saúdi ô pamodi relijion.

• “Diferenti di maioria di kes diéta ki ta fazedu, pesoas ta atxa ma ser veganu é sima un krénsa, un disizon di midjora manera di konporta i un manera di kada pesoa muda mundu pa midjór.” — Britannica Academic.

Ser veganu é soluson pa prublémas di mundu? Kuzê ki Bíblia ta fla?

Kuzê ki nos Kriador ta atxa di umanus i di animal

Bíblia ta mostra ma nos Kriador, Jeová Deusa ta atxa ma umanus é más inportanti ki animal, i el da pesoas autoridadi pa manda na es. (Génesis 1:27, 28) Ku ténpu Deus dexa pesoas uza animal pa es kume. (Génesis 9:3) Má el ka ta aprova pa ningen maltrata animal. — Provérbios 12:10.

Di akordu ku Bíblia, kume karni é un disizon ki kada un di nos ta toma.b Pa Deus, disizon ki nu toma ka ta pô-nu ta ser un algen midjór. (1 Koríntius 8:8) Ninhun di nos ka debe kritika disizon ki otu algen toma sobri kuzê ki el skodje kume. — Romanus 14:3.

Kaminhu pa un futuru midjór

Bíblia ta mostra ma manera ki nu skodje vive ka ta rezolve prublémas di mundu. Pesoas ka ta pode rezolve txeu prubléma ki ten oji, sima prublémas di pulítika, na sosiadadi ô falta di dinheru. Bíblia ta fla:

• ‘Kuzê ki é tortu ka ta da pa bira-l rétu’. — Eclesiastes 1:15.

Nos Kriador ta ben rezolve tudu prubléma ki nu ta pasa pa el oji. Bíblia ta uza kel konparason li pa splika kuzê ki el ta ben faze.

• “N odja un séu novu i un téra novu, pamodi kel séu ki tinha antis i kel téra ki tinha antis dizaparse, i mar ka ta izistiba más.” — Apokalipse 21:1.

Deus ta ben troka govérnus di ómi, ô “kel séu ki tinha antis”, ku “un séu novu”, ki é se govérnu na séu. Se Reinu ta ben tra kel “téra ki tinha antis”, ki é kes algen mau, i el ta ben governa riba di “un téra novu”, ô kes algen ki ta seta Se autoridadi.

Sô dibaxu di govérnu di Deus ki umanus ta ben prende modi ki es ta vive na pas ku animal i ten ruspetu pa téra. — Isaías 11:6-9.