Animal ta bai pa séu?

Respósta di Bíblia

Bíblia ta inxina ma di tudu kriatura na téra, é sô alguns algen ki ta bai pa séu. (Apokalipse 14:1, 3) Es ta bai la pa ser rei i saserdóti djuntu ku Jizus. (Lukas 22:28-30; Apokalipse 5:9, 10) Maioria di algen ta ben resusitadu pa vive na un paraízu na téra. — Salmo 37:11, 29.

Bíblia ka ta fla ma animal ta bai pa séu, i pa bons motivu. Animal ka pode faze kes kuza ki Deus ta iziji pa es resebe “kel xamada pa séu”. (Ebreus 3:1) Kes kuza li ta inklui ten konhisimentu, mostra fé i obi ku kes mandamentu di Deus. (Mateus 19:17; Juan 3:16; 17:3) É sô algen ki kriadu ku speransa di vive pa tudu ténpu. — Jénezis 2:16, 17; 3:22, 23.

Kriaturas ki ta vive na téra, ten ki resusitadu pa es pode bai pa séu. (1 Koríntius 15:42) Bíblia ta pâpia di alguns resureison ki kontise. (1 Reis 17:17-24; 2 Reis 4:32-37; 13:20, 21; Lukas 7:11-15; 8:41, 42, 49-56; Juan 11:38-44; Atus 9:36-42; 20:7-12) Má na tudu es, é algen ki resusitadu, ka animal.

Animal ten alma?

Nau. Bíblia ta fla ma animal i algen é alma. (Números 31:28) Kantu kel primeru ómi, Adon, kriadu el ka dadu alma. Má el “bira un alma bibu.” (Jénezis 2:7, nóta di rodapé) Un alma é dôs kuza djuntadu: “pó di téra” i “folgu di vida”.

Alma pode móre?

Sin. Bíblia ta inxina ma alma pode móre. (Levítiku 21:11, nóta di rodapé; Ezequiel 18:20) Óras ki animal i algen móre, es ta volta pa pó di téra. (Eclesiastes 3:19, 20) Kel-li krê fla ma es ta dexa di izisti.a

Animal ta peka?

Nau. Peka krê fla pensa, xinti ô faze algun kuza ki é kóntra kes lei di Deus. Pa un kriatura peka, el meste ten kapasidadi di toma disizon. Má animal ka ten kel kapasidadi li. Normalmenti, es ta faze kuzas sen pensa duránti ses vida, ki ka ta dura pa tudu ténpu. (2 Pedru 2:12) Na fin di ses vida, es ta móre sikrê es ka peka.

Nu debe maltrata animal?

Nau. Deus da algen autoridadi pa manda na animal. Má el ka da-nu direitu di maltrata animal. (Jénezis 1:28; Salmo 8:6-8) Deus ta preokupa ku kada animal, ti ku kes pasu pikinoti. (Jonas 4:11; Mateus 10:29) Deus da kes algen ki ta adora-l órdi pa trata animal ku bondadi. — Ézudu 23:12; Deuteronómio 25:4; Provérbios 12:10.

Versiklus di Bíblia ki ta pâpia sobri animal

Jénezis 1:28: “Deus abênsua [primeru ómi ku primeru mudjer] i el fla-s: ‘Nhos ten fidju i nhos bira txeu. Nhos intxi téra i nhos manda na el. Nhos manda na pexi di mar, na kes animal ki ta bua na séu i na tudu animal ki ta mexe riba téra. ’”

Kuzê ki kel-li krê fla: Deus da algen autoridadi pa manda na animal.

Eclesiastes 3:19, 20: ‘Pamodi kel ki ta kontise ku algen ta kontise tanbê ku animal. Tudu es ten mésmu fin. Sima un ta móre é si ki kel otu ta móre tanbê, i tudu es ten mésmu spritu. Pur isu, ómi é ka más midjór ki animal. Tudu é vaidadi. Es tudu ta bai pa mésmu lugar. Es tudu ben di téra i es tudu ta volta pa téra.’

Kuzê ki kel-li krê fla: Óras ki algen i animal móre es tudu ta volta pa téra.

Provérbios 12:10: ‘Algen justu ta toma kónta di ses animal di kaza’.

Kuzê ki kel-li krê fla: Povu di Deus ta kuida dretu di ses animal. Kel-li ta inklui kes ki es ta kria na kaza.

Mateus 10:29: “Ka ta bendedu dôs pardal pa un muéda di poku valor? Má ninhun di es ka ta kai na txon sen nhos Pai da kónta.”

Kuzê ki kel-li krê fla: Deus ta odja kuzê ki ta kontise ku animal i el ta kuida di es, ti kes pasu pikinoti.

a Pa sabe más, odja lison 29 di livru Vive filís pa tudu ténpu!