Kantu Tistimunhas di Jeová ki ten na mundu interu?

Modi ki nhos ta konta nunbru di Tistimunhas di Jeová?

Ki ta konta na nunbru di Tistimunhas di Jeová é sô kes ki ta partisipa na pregason tudu mês. (Mateus 24:14) Kel-li ta inklui kes ki dja batiza i kes ki inda ka batiza, má ki sta kualifikadu pa partisipa na trabadju di pregason.

Un algen ten ki da dinheru pa bira un Tistimunha di Jeová?

Nau. É ka faze kontribuisons ki ta poi un algen ta kontadu na nunbru di Tistimunha di Jeová ô pa el ten kalker diziginason ô priviléjiu na nos organizason. (Atus 8:18-20) Txeu bês ka ta sabedu é kenha ki faze kontribuison. Kada Tistimunha di Jeová ta da se ténpu, se forsa i kes kuza ki el ten di livri vontadi i sima el ta pode pa djuda na nos trabadju na mundu interu. — 2 Koríntius 9:7.

Modi ki nhos ta sabe kantu algen ki sta partisipa na pregason?

Tudu mês, Tistimunhas di Jeová ta da un rilatóriu di ses trabadju di pregason na ses kongregason. Es ta da ses rilatóriu di livri vontadi.

Rilatórius di kongregasons ta djuntadu i total ta mandadu pa filial ki ta toma kónta di kes kongregason. Filial ta manda total di kada país ô tiritóriu pa nos sédi mundial.

Na fin di kada anu di sirvisu,a ta odjadu kal ki é nunbru más altu di publikador di kada país. Kes nunbru ta djuntadu pa odjadu nunbru di publikador na mundu interu. Rilatórius di kada país i tiritóriu ta podu na párti “Na mundu interu” na jw.org. Kes rilatóriu ta inkoraja-nu, sima es ta inkorajaba kes kriston na ténpu di apóstlus. — Atus 2:41; 4:4; 15:3.

Nhos ta konta kes algen ki ta bai runion má ki ka ta prega?

Enbóra es ka ta konta na nunbru di Tistimunhas di Jeová, nu ta resebe-s dretu na nos kongregason. Txeu di es ta sisti Komemorason di mórti di Kristu ki nu ta faze tudu anu. Pa nunbru di algen ki ta sisti kel runion li, ta da pa odja kantu algen ki ta sisti runions má ki ka ta prega. Na 2024, 21.119.442 algen sisti Komemorason.

Txeu algen ki ka ta sisti nos runion ta studa Bíblia di grasa na ses kaza ku Tistimunhas di Jeová. Na 2024, nu faze un média di 7.480.146 studu di Bíblia kada mês i alguns di kes studu li fazedu ku txeu algen omésmu ténpu.

Pamodi ki nunbru di Tistimunhas di Jeová ki nhos ta da é más poku ki kel ki govérnu ta da?

Óras ki govérnu ta faze resensiamentu, txeu bês es ta pergunta pesoas di ki relijion ki es ta fla ma es é. I é ku bazi na ses respósta ki es ta disidi nunbru di pesoas di kada relijion. Pur izénplu, ten un organizasonb na Mérka ki ta fla ma na ses piskiza es tenta diskubri si kes algen ki es entrivista ta atxaba ma es ta sigiba algun relijion. Tanbê es fla ma rezultadu di kes piskiza ten bazi sô na opinion di kes algen. Má, kes ki ta konta na nunbru di Tistimunhas di Jeová é kes algen ki ta faze trabadju di pregason i ki ta intrega un rilatóriu di ses trabadju. Nu ka ta konta kes algen ki ta fla sô na bóka ma es Tistimunha di Jeová.