SPLIKASON DI TESTUS DI BÍBLIA
Jeremias 29:11 — ‘N sabe dretu kuzê ki N sta pensa pa nhos’
‘Jeováa fla: “N sabe dretu kuzê ki N sta pensa pa nhos. N krê pa nhos ten pas envês di disgrasa. N krê da nhos un futuru i un speransa.”’ — Jeremias 29:11, Tradução do Novo Mundo.
Kuzê ki Jeremias 29:11 ta siginifika
Jeová Deus promete kes ki ta adora-l ma el staba ta pensa da-s un futuru di pas. Nbóra kes palavra li skrebedu pa kes algen di pasadu, ti inda es ta sirbi pa mostra kuzê ki Deus ta pensa. El é ‘kel Deus ki ta da speransa’. (Romanos 15:13) El poi kes promésa li na Bíblia asi ‘pa nu pode ten speransa’ i un futuru midjór. — Romanos 15:4.
Kuzê ki kes versíklu antis i dipôs di Jeremias 29:11 ta fla
Kes palavra li staba skrebedu na un karta ki mandadu pa kes israelita di Jiruzalen ki staba prézu na Babilónia.b (Jeremias 29:1) Deus fla ma es ta fikaba prézu pa txeu ténpu, pur isu es devia faze kaza, planta kumida i ranja família. (Jeremias 29:4-9) Má Deus fla-s: ‘Óras ki nhos faze 70 anu na Babilónia, N ta ben volta nha atenson pa nhos i N ta ben torna traze nhos pa [Jiruzalen].’ (Jeremias 29:10) Nton Deus garanti-s ma el ka ta skeseba di es i ma ses speransa di volta pa ses téra ta kontiseba mê. — Jeremias 31:16, 17.
Deus kunpri kel promésa ki el faze israelitas. Sima dja el flaba, un rei di Pérsia, ki txomaba Siru, distrui Babilónia. (Isaías 45:1, 2; Jeremias 51:30-32) Dipôs di kel-la, Siru dexa kes judeu volta pa ses téra. Dipôs di 70 anu prézu, es volta pa Jiruzalen. — 2 Crónicas 36:20-23; Esdras 3:1.
Na nos ténpu, kel promésa ki sta na Jeremias 29:11 ki kunpri, ta da kes ki ten speransa na Deus kunfiansa na se promésas, ki ta inkui speransa di un mundu di pas através di Reinu di Deus ki se Rei é Jizus Kristu. — Salmo 37:10, 11, 29; Isaías 55:11; Mateus 6:10.
Ideias mariadu sobri Jeremias 29:11
Ideia mariadu: Deus ten un planu pa kada algen.
Verdadi: Deus ta dexa pesoas skodje ki kaminhu ki es krê sigi. El fla kes palavra ki sta na Jeremias 29:11 pa tudu kes israelita ka sô pa un di es, i el sta ta pensaba kuzê ki el kreba pa es tudu, ki éra un futuru i pas. (Jeremias 29:4) Má Deus dexa kada un di kes israelita disidi si es ta traba pruvetu di Se promésa ô nau. (Deuteronómio 30:19, 20; Jeremias 29:32) Kes ki disidi obi ku Deus faze kel-la através di orason sinseru. — Jeremias 29:12, 13.
Ideia mariadu: Deus ta da rikéza pa kes ki ta adora-l.
Verdadi: Alguns traduson di Bíblia ta pasa ideia ma na Jeremias 29:11, Deus staba ta promete rikéza. Má na ebraiku kel ideia ta siginifika pas, saúdi i un vida dretu. Di akordu ku kes versíklu antis i dipôs, Deus promete kes israelita ki staba prézu pas i un vida dretu envês di rikéza. Es ta kontinuaba ta ser un povu i un dia es ta voltaba pa Jiruzalen. — Jeremias 29:4-10.
Lé Jeremias kapítlu 29 djuntu ku nótas di rodapé i referénsias.
b Un livru ta faze kel komentáriu li sobri Jeremias 29:11: “Kel-li é un di kes promésa más sábi ki nu ta atxa na Bíblia, ki ta mostra kel konpaxon di korason di Javé [Jeová] pa kes israelita ki staba prézu i kel-li da-s un bon motivu pa es ser puzitivu i ten speransa.” — Expositor’s Bible Commentary, volumi 7, pájina 360.