Jeremias 33:3 — ‘Txoma-m i N ta responde-u’

‘Txoma-m i N ta responde-u. N ta sta prontu pa konta-u kuzas grandi i ki ka ta intendedu. É kuzas ki bu ka sabe.’ — Jeremias 33:3, Traduson di Mundu Novu.

Kuzê ki Jeremias 33:3 ta siginifika

Ku kes palavra li, Deus ta konvida pesoas pa faze orason pa el. Si es seta kel konviti i es faze orason pa Deus, el ta mostra-s kuzê ki ta ben kontise na futuru.

‘Txoma-m i N ta responde-u.’ Kel palavra ‘txoma-m’ ka krê sô fla txoma ô grita nómi di Deus. Má na verdadi el krê fla faze orason pa Deus i pidi se ajuda i orientason. — Salmo 4:1; Jeremias 29:12.

Ta parse ma kel konviti li éra pa nason di Israel di ténpu antigu. Kel nason foi infiel pa Deus i trópas di Babilónia staba ta ataka-s. (Jeremias 32:1, 2) Jeováa konvida kes israelita pa volta pa el i es pode fazeba kel-la através di orason.

‘N ta… konta-u kuzas grandi i ki ka ta intendedu. É kuzas ki bu ka sabe.’ Kes kuza ki Deus promete mostra ‘Kuzas ki ka ta intendedu’ krê fla kes kuza ki un algen ka ta konsigi intende di el pa el. Kes palavra ‘ki ka ta intendedu’ tanbê pode ser traduzidu pa ‘kuzas sukundidu’.

Kuzê ki é kes ‘kuza sukundidu’ ki Deus ta ben mostraba? Kes kuza ki ta ben kontiseba na futuru, sima distruison di sidadi di Jiruzalen antigu, i tanbê óras ki sidadi konpodu i pesoas ba mora na el otu bês. (Jeremias 30:1-3; 33:4, 7, 8) Má, Deus promete ma kes algen ki ta adoraba el ka ta sérba distruídu. — Jeremias 32:36-38.

Kuzê ki kes versíklu antis i dipôs di Jeremias 33:3 ta fla

Proféta Jeremias resebe kel mensajen li di Jeová na anu 608 A.K., duránti désimu anu di govérnu di rei Zedekias. Jeremias dja flaba ma Jiruzalen ta ben sérba distruídu i ma Zedekias ta lebadu prézu. Dja ki rei ka gostaba di kel mensajen li, el manda prende Jeremias. — Jeremias 32:1-5; 33:1; 37:21.

É kes kuza li ki staba ta kontise kantu Deus faze kel konviti ki nu ta atxa na Jeremias 33:3. Infilismenti rei Zedekias i kel nason kontinua ta iginora kel konviti ki Deus faze-s i ta ser infiel. (Jeremias 7:26; 25:4) Es ka faze orason pa Deus ta pidi se orientason. Un anu dipôs, rei Zedekias perde se puder, Jiruzalen distruídu i txeu di kes algen ki fika ku vida lebadu prézu pa Babilónia. — Jeremias 39:1-7.

Kes palavra ki nu ta atxa na Jeremias 33:3 ta lenbra kes algen ki sta ta le-s oji ma Deus pode da “konhisimentu izatu di se vontadi” i mostra “kes kuza profundu” pa kes algen ki ta faze orason pa el i studa se Palavra, Bíblia. (Kolosensis 1:9; 1 Koríntius 2:10) Kes kuza profundu ta inklui kes promésa ki Deus faze ki ka ta dura ta ben kontise. — Apokalipse 21:3, 4.

Odja kel vídiu li pa bu sabe más sobri livru di Jeremias.