2 Koríntius 12:9 — “Nha grandi bondadi ta txiga-u”

“Nha grandi bondadi ta txiga-u, pamodi nha grandi puder sta ta bira perfeitu na frakéza.” — 2 Koríntius 12:9, Traduson di Mundu Novu.

Kuzê ki 2 Koríntius 12:9 ta siginifika

Na kel versíklu li, Deus promete ma el ta daba apóstlu Paulu kel forsa ki el mesteba pa el aguentaba se prublémas i pa el tinha bons rezultadu sikrê ku se limitasons.

“Nha grandi bondadi ta txiga-u”. Respósta di Deus pa kes orason ki Paulu faze, tanbê pode ser traduzidu pa “nha bondadi é tudu kel ki bu meste.” Kel-li krê fla ma grandi bondadi di Deus ta txigaba pa djudaba Paulu lida ku se prublémas. Di ki manera? Kes palavra ki traduzidu pa “grandi bondadi” ô “favor”, ta pâpia di un prezenti ki Deus ta da un algen ku amor sikrê el ka merese. Kes karta ki Paulu skrebe ta mostra ma grandi bondadi di Deus djuda-l txeu. Enbóra antis Paulu ta pirsigiba kristons, Deus da-l kel forsa ki el mesteba pa el mudaba di atitudi i pa el djudaba otus algen biraba kriston. (1 Koríntius 15:9, 10; 1 Timótiu 1:12-14) Paulu tinha serteza ma Deus djuda-l vense kalker prubléma ô dizafius ki el pasaba pa el.

“Pamodi nha grandi puder sta ta bira perfeitu na frakéza.” Jeováa lenbra Paulu ma Se puder inda é más klaru óras ki el ta uza-l pa djuda algen fraku i inperfeitu. (2 Koríntius 4:7; 12:8) Óras ki sérvus di Deus ta rekonhese ses limitason i es ta buska ajuda di Jeová, es ta dexa pa puder di Deus djuda-s. (Efézius 3:16; Filipensis 4:13) Di es manera, puder di Deus ta bira klaru na frakézas di ómis.

Kuzê ki kes versíklu antis i dipôs di 2 Koríntius 12:9 ta fla

Spritu santu poi Paulu ta skrebe un karta pa irmons na Korintu pa vólta di anu 55 D.K. Na fin di kel karta, Paulu splika ma el tinha autoridadi di un apóstlu. Paulu xinti ma el tinha ki fazeba kel-la, pamodi alguns algen ki ta atxaba ma es éra instrutor staba ta kritika-l, talvês pamodi se aparénsia ô pamodi se kapasidadi di pâpia. — 2 Koríntius 10:7-10; 11:5, 6, 13; 12:11.

Pa difende se kabésa, Paulu splika ma sô ku se forsa el ka ta konsigi kunpriba se diziginason di prega i aguentaba kes txeu dizafiu ki el pasa pa el. (2 Koríntius 6:4; 11:23-27; 12:12) Na kapítlu 12, el pâpia di “un spinhu na karni” ki talvês éra un prubléma ki ta poba el ta xintiba txeu dór i kasábi. (2 Koríntius 12:7) Enbóra Paulu ka fla kal ki éra se prublémas, el staba disididu na aguenta firmi ku ajuda di Deus.

Oji tanbê, sérvus di Deus ta pasa pa difikuldadis i pirsigison. Es ta xinti konsoladu di sabe ma puder di Deus pode djuda-s aguenta kalker prubléma ki es pode pasa pa el. Sima Paulu, ku kunfiansa es pode fla: “Óras ki N sta fraku, é la ki N ta sta xeiu di puder.” — 2 Koríntius 12:10.

Odja kel vídiu li pa bu sabe más sobri livru di 2 Koríntius.