Romanus 6:23 — “Pamodi pagamentu di pekadu é mórti, má don ki Deus da di grasa é vida itérnu”

“Pagamentu di pekadu é mórti, má prezenti ki Deus ta da é vida pa tudu ténpu através di Kristu Jizus, nos Sinhor.” — Romanus 6:23, Traduson di Mundu Novu.

“Pamodi pagamentu di pekadu é mórti, má don ki Deus da di grasa é vida itérnu na Kristu Jizus, nos Sinhor.” — Romanus 6:23, Almeida Revista e Atualizada.

Kuzê ki Romanus 6:23 ta siginifika

Ku kes palavra li, apóstlu Paulu splika ma nu ta móre pamodi nos é pekador. Má, Deus ta da tudu se sérvus fiel un speransa sábi, ki é vida pa tudu ténpu.

“Pagamentu di pekadu é mórti”. Tudu algen ta nase ku inperfeison, pur isu es ta peka.a (Salmo 51:5; Eclesiastes 7:20) Pamodi es ta nase ku pekadu, es ta bira bédju i es ta móre. — Romanus 5:12.

Pa djuda-nu intende kel-li, Paulu konpara pekadu ku un patron ki ta paga saláriu. Sima un trabadjador ta spera ma el ta pagadu saláriu pa se trabadju, nos tanbê nu ta spera ma nu ta móre pamodi nos é inperfeitu.

Má, Paulu splika tanbê ma óras ki un “algen móre se pekadu dja purduadu.” (Romanus 6:7) Óras ki un algen móre, el ta libertadu, ô el ta purduadu kalker pekadu ki el faze. Pur isu, nu ka ten ninhun motivu pa pensa ma kes algen ki dja móre ta kontinua ta sufri na algun lugar pamodi kes kuza mariadu ki es faze antis. Na verdadi, Bíblia ta mostra klaru ma kes ki dja móre ka ta konsigi pensa, aji, nen xinti nada. — Eclesiastes 9:5.

“Má prezenti ki Deus ta da é vida pa tudu ténpu através di Kristu Jizus”. Diferenti di kel “pagamentu” di pekadu, Deus ta da-nu prezenti di vida pa tudu ténpu. Kel palavra orijinal pa “prezenti” tanbê pode traduzidu pa “prezenti ki ka meresedu” ô “prezenti di grasa”. El sta ta pâpia di un kuza ki algen ka faze nada pa merese. Ka ten ninhun algen inperfeitu ki merese ganha salvason ô vida pa tudu ténpu. (Salmo 49:7, 8) Má di livri vontadi, Deus ta da kel prezenti ki ka ten présu, ki é vida pa tudu ténpu pa tudu kes ki mostra fé na Jizus. — Juan 3:16; Romanus 5:15, 18.

Kuzê ki kes versíklu antis i dipôs di Romanus 6:23 ta fla

Paulu skrebe kel karta li pa kes primeru disiplu di Jizus na Roma pa vólta di anu 56 D.J. Ta parse ma alguns di kes sigidor li na kel ténpu tinha ideias mariadu sobri mizerikórdia di Deus. Pamodi influénsia di filozofia gregu, talvês es pensa ma kantu más es peka, más es ta resebeba perdon di Deus. (Romanus 6:1) Otus talvês ta flaba ma es ka ta sérba kastigadu pamodi ses pekadu, dja ki es ka staba más dibaxu di Lei di Muizés. (Romanus 6:15) Na se karta, Paulu mostra kes sigidor di Jizus ma es ka ta resebeba mizerikórdia di Deus si es dexaba pekadu toma kónta di ses vida. — Romanus 6:12-14, 16.

Kes palavra di Paulu ta djuda kes algen ki ta adora Deus gósi, ten serteza ma enbóra es nase ku pekadu, simé es ten un speransa. Si es obi ku leis di Deus i es ka dexa ses dizeju pô-s ta faze kuzas mariadu, Deus ta promete da-s vida pa tudu ténpu. — Romanus 6:22.

Odja kel vídiu li ki ta mostra alguns informason sobri livru di Romanus.