Kes ki sufri un disgrasa sta ta resebe ajuda

Na anu di 2020 kontise monti dizastri na naturéza i koronavírus kumesa ta spadja na mundu interu. Modi ki Tistimunhas di Jeová sta ta djuda kes ki sufri kes disgrasa li?

Na anu di sirvisu di 2020,a Kumison di Kordenadoris di Grupu Enkaregadu di Óbra aprova pa uzadu uns 28 milhon di dóla (uns 2.800.000.000 skudu di Kabu Verdi) pa djuda kes ki sufri pamodi un disgrasa. Kel-la da pa djuda kes algen ki fika prujudikadu pamodi más di 200 disgrasa ki ta inklui koronavírus, txeu tenporal ku béntu fórti, txuba txeu dimás na Áfrika, falta di kumida na Venezuela i séka na Zinbábue. Kes kontribuison ki dadu djuda pa kunpra kumida, agu, ropa, tanbê material pa linpéza, pa ranja lugar pa mora, pa kuida di saúdi, pa konpo i pa torna faze kuzas. Nu ben odja alguns izénplu di trabadju ki fazedu pa djuda.

COVID-19. Na mundu interu, koronavírus prujudika saúdi di nos irmons ku irmans, manera ki es ta xinti i pô-s ku falta di dinheru. Pa djuda kes irmon, kriadu más di 800 Kumison di ajuda na ténpu di dizastri (DRC) na mundu interu. Kes irmon ki ta faze párti di kes kumison li ta sta sienti na kuzê ki nos irmons meste i es ta manda rilatóriu lógu pa djuda Kumison di Kordenadoris sabe modi ki es ta djuda kes irmon di midjór manera.

Sima anu ba ta pasa, kes Kumison di ajuda na ténpu di dizastri djuda txeu algen ten kumida, agu, kuzas pa sta linpu, i ramedi ki es ta meste. Na alguns lugar, kes Kumison di ajuda na ténpu di dizastri trabadja djuntu ku kes ansion di kel lugar pa irmons resebe ajuda ki govérnu ta da.

Kes algen ki é ka Tistimunha di Jeová ta odja trabadju ki nu ta faze pa djuda otus algen. Pur izénplu, Field Simwinga, ki é un autoridadi di Nakonde, na Zánbia, fla nos irmons: “Nu tene dívida ku nhos pamodi ajuda ki nhos da kes família ki sufri foi na óra sértu.”

Falta di kumida na Angola. Koronavírus afeta distribuison di kumida na Angola i présu di kumida subi txeu. Txeu di nos irmons ku irmans ta atxa ma sta kada bês más difísil kunpra kumida.

Filial di Brazil pididu pa manda kumida pa nos irmons na Angola. Pa uza kel kontribuison pa djuda di midjór manera, irmons faze un piskiza ku kuidadu sobri modi ki es ta kunpra i manda kumida, i kunpradu un monti kumida. Nton, pa kunpra i pa manda kada bólsa di ajuda gastadu sô uns 2 mil skudu i kada bólsa tinha kuazi 20 kilu di kumida sima arôs, fijon i óliu pa kuzinha. Ti gósi, dja mandadu 33 mil i 544 bólsa di kumida, ki pa tudu ta da 654 tonelada. Djuntadu ku kumida i kuzas ki kunpradu na Angola kes ajuda da más di 50 mil algen kumida!

Kuzê ki nos irmons atxa di kel ajuda li? Alexandre, ki ta mora na un párti ki ta fika izoladu na Angola, fla: “N ta odja ma kel-li é un próva ma Jeová ta ama-m i ma N ka sta mi sô. Organizason di Jeová ta da-m txeu valor!” Un mai ki ta kria ses fidju el sô, ki txoma Mariza, fla: “Jeová obi nha orason. N ta agradese ael i se organizason!”

Ajuda pa Zinbábue na ténpu di séka. Na anu di sirvisu di 2020, Zinbábue pasa pa un séka difísil dimás, milhons di algen pasa txeu fómi. Milharis di Tistimunhas di Jeová na Zinbábue ka tinha kumida ki ta txiga.

Kriadu sinku Kumison di ajuda na ténpu di dizastri pa djuda nos irmons ten kumida. Senténas di irmons djuda pa djunta kumida, karega kuzas ô es pista ses karu.b Na anu di sirvisu di 2020, uzadu 691.561 dóla (uns 69 mil kontu) pa djuda más di 22 mil i 700 algen ten kumida!

Na alguns kazu, kumida ki irmons tinha kaba justu na óra ki kel ajuda txiga. Kantu kel kumida txiga, nos irmons lova Jeová. Alguns kumesa ti ta kanta kántikus di Reinu.

Na un zóna, dôs irman ki é viúva sisti un runion di un organizason ki é ka di govérnu, ki staba ta organiza pa djuda ku kumida. Má kel runion kumesa ta bira kada bês más pa ladu di pulítika, nton kes irman disidi ka faze kuzê ki es staba ta pidi-s pa resebe kel ajuda. Timenti es staba ta sai di runion, kes algen faze-s trósa i es fla-s: “Ka nhos ben djobe kumida na nos más!” Má, sô dôs simana dipôs, nos irmons txiga na kel zóna la i es djuda nos irmans ku kumida. Kel-li kontise mutu antis di kel organizason ki es baba kumesa ta da pesoas kumida!

Ajuda na ténpu di dizastri na Zinbábue tanbê sta ta da bon tistimunhu. Pur izénplu, odja kuzê ki kontise ku Prisca, ki ta mora na un zóna pikinoti. Sikrê ku tudu kes difikuldadi ki séka traze, tudu kuarta-fera ku sésta-fera Prisca ta traba ténpu pa pregason, mésmu na ténpu di pripara txon pa símia. Kes algen na se zóna fika ta faze-l trósa i es ta flaba: “Bo ku bu família ta ben pasa fómi pamodi kel nhos pregason li.” Prisca ta respondeba es: “Jeová nunka ka ta bandona se sérvus.” Poku ténpu dipôs, el resebe ajuda di organizason di Jeová. Alguns vizinhu di Prisca, fika dimiradu ku kel-li i es fla-l: “Deus nunka ka bandona-u, nton nu krê prende más sobri el.” Gósi 7 di se vizinhus sta ta obi runion di kongregason ki ta dadu na rádiu.

Sima nu ta ba ta txiga más pértu di fin, dizastris na naturéza ta kontinua ta prujudika-nu. (Mateus 24:3, 7) Nu ta da txeu valor pa kes kontribuison ki nhos ta faze di manera diferenti sima kes ki nu ta atxa na site donate.jw.org. Es ta da ajuda ki irmons meste na ténpu sértu.