Ajuda na ténpu di dizastris na 2023 — “Nu ta odja amor di Jeová”

Bíblia dja flaba ma ‘nason ta ben labantaba kóntra nason’ i ma ta tinha dizastris duránti “fin di es mundu”. (Mateus 24:3, 7) Nu odja palavras di kel profesia li ta kunpri duránti anu di sirvisu di 2023.a Má, timenti staba ta kontise géra i dizastris na naturéza na kuazi 100 país, Tistimunhas di Jeová staba ta imita amor di Deus. Modi ki es faze kel-li?

Duránti anu di sirvisu di 2023, más di 200 dizastri na naturéza ô dizastris ki ómis ta faze afeta nos irmons ku irmans. Pa djuda kes irmon ki fika afetadu, Tistimunhas di Jeová gasta más di 10 milhon di dólab (más di 1 milhon di kontu na dinheru di Kabu Verdi). Kel dinheru li ta ben di kes kontribuison ki ta fazedu pa óbra na mundu interu. Alén di kel-li, txeu irmon ku irmans uza ses dinheru pa djuda kes irmon ki staba ta meste, ki ta mora na ses zóna. Nu ben odja modi ki uzadu bus kontribuison pa djuda kes irmon ki fika afetadu pamodi kes dizastri ki kontise na dôs país.

“Amor di verdadi ta izisti”

Na alguns zóna na Nijéria ta kustuma ten txeia fórti alguns bês pa anu. Má, kes txeia ki kontise na Nijéria na otubru di 2022, foi di kes más piór ki dja es pasa pa el na kes últimu 10 anu. Más di 676 mil ektar di txon fika distruídu (kel-li ta da más di 946 mil kanpu di futibol). Tanbê, más di 2 milhon di pesoas tevi ki dexa ses kaza. Filial di Nijéria aji faxi pa kria un Kumison di Ajuda pa da nos irmons ku irmans koraji i pa djuda-s mante ses fé fórti.

Kel-li é situason di nos irmons ku irmans

• 7.505 publikador tevi ki dexa ses kaza

• 860 kaza fika stragadu ô distruídu

• 90 Salon di Reinu i un Salon di Asenbleia intxi di agu

Modi ki uzadu kes kontribuison

Uzadu más di 250 mil dóla (uns 25 mil kontu di dinheru di Kabu Verdi) pa djuda kes ki sufri pamodi kel dizastri li. Kel dinheru li uzadu pa:

• Kunpra kumida sima arôs, fijon i masa

• Kunpra kuzas di kaza sima koltxon i redi di moskitu

• Konpo ô torna faze kes kaza ki fika stragadu

Kuzê ki nos irmons faze pa kes kontribuison uzadu dretu? Un di kes kuza ki es faze é djobe dretu si kada kaza meste sô konpodu ô si meste torna fazedu. I óras ki es ta odjaba ma un kaza meste torna fazedu, es ta uzaba un prujétu sinplis ki ta uzadu na kel zóna.

Nos irmons ku irmans ki resebe kel ajuda fika txeu gratu. Un irman fla: “Pamodi txeia nos vida fika di kabésa pa baxu. Nu perde tudu kes plantason ki nu tinha i nu fika sen kaza. Má, nu fika aliviadu pamodi na kel mésmu dia, nos irmons ku irmans ben djuda-nu i es da-nu un lugar suguru pa nu fika. Tanbê, filial manda-nu kumida. Nu fika dimiradu di odja modi ki kel testu di Juan 13:34, 35 kunpri na nos vida. Amor di verdadi ta izisti. Mi ku tudu nha família nu ta agradese di kurason pa tudu kel ajuda ki irmons da-nu na kel óra ki más nu staba ta meste.”

Otus algen di kel zóna tanbê da kónta di tudu kel trabadju ki nu faze. Un xéfi di un zóna na Sabagreia, na stadu di Bayelsa, fla: “Ten txeu organizason i igreja na mundu, má é sô Tistimunhas di Jeová ki faze kel-li. . . . [Nhos] organizason é un di kes midjór ki ten na mundu.”

“Nu ta odja amor di Jeová”

Na febreru di 2023, tevi más di 400 kazu di lugaris ki pega lumi i es faze txeu stragu na Xili. Más di 430 mil ektar di txon (kel-li ta da más di 602 mil kanpu di futibol) i otus párti txeu inportanti na Xili fika distruídu. Uns 8 mil algen tevi ki dexa ses kaza. Lógu dipôs ki kontise kel dizastri, filial kumesa ta organiza pa djuda kes algen ki fika afetadu.

Kel-li é situason di nos irmons ku irmans

• 222 publikador tevi ki dexa ses kaza

• 20 kaza fika distruídu

Modi ki uzadu kes kontribuison

Uzadu más di 200 mil dóla (uns 20 mil kontu di dinheru di Kabu Verdi) pa djuda. Kel dinheru li uzadu pa:

• Kunpra kumida i agu

• Kunpra konbustível, kuzas di faze linpéza i ramedi

• Konpo kes kaza ki fika distruídu

Un família fika txeu dizanimadu kantu ki es da kónta ma es perde tudu kel ki es tinha. Kel-li ta inkluiba ses kaza i ses nogósiu. Pamodi kel-li kel família fika sen trabadju. Na kes primeru dia foi txeu difísil pa kel família odja kel lugar undi ki ses kaza staba, sen nada. Má, timenti es ba ta odja ses kaza ta fazedu, es kumesa ta xinti más midjór. Tanbê, kel amor i karinhu di kes irmon ki bai djuda, da-s forsa pa es lida ku kel situason. Kel spiriénsia li toka kel família di tal manera, ki es disidi ba djuda konpo kaza di un otu irmon tanbê.

Txeu irmon ku irmans fika dimiradu ku tudu kel trabadju ki fazedu. Un irmon fla: “Kes Kumison di Ajuda, é un grandi prezenti di Jeová. Lógu kel otu dia dipôs ki kontise kel dizastri, dja es staba na kel lugar i es da-nu kes kuza ki nu staba ta meste. Nu ta fika inkorajadu óras ki nu ta lé sobri kes ajuda ki irmons ta da na otus párti di mundu. Má óras ki kel-li ta kontise ku bo, é txeu diferenti! Bu ta da más valor pa organizason di Jeová, óras ki bu ta odja modi ki irmons ta imita kes kualidadi di Jeová. I tanbê modi ki es ta preokupa pa nu ten kes kuza ki nu meste, pa nu kontinua ku un fé fórti i pa nu mante un atitudi puzitivu. Na situasons sima kes-li nu ta odja amor di Jeová!”

Sima kel mundu li ta ba ta txiga más pértu di fin, nu ta kontinua ta odja dizastris ta omenta. (Lukas 21:10, 11) Má, através di nos organizason, nu ta odja ma nos Rei Jizus, ki ta ama-nu txeu, ta sta ku nos “tudu dia, ti fin di es mundu.” (Mateus 28:20) Kes kontribuison ki bu ta faze di korason pa trabadju na mundu interu, na donate.jw.org i di otus manera, djuntu ku bu ténpu i bu forsa, ta mostra ma bu ta apoia Reinu i se Rei ki ta ama-nu txeu. Obrigadu pa kes kontribuison ki nhos ta faze di korason.