Juízis

3 Jeová dexa alguns nason fika na téra di Kanan, asi pa el odja si kes israelita ki ka partisipaba na ninhun di kes géra di Kanan ta obiba ku el. 2 (El faze kel-li, asi pa kes novu jerason di israelitas fika ta sabe kuzê ki é géra, dja ki nunka es ka pasaba pa kes kuza li antis.) 3 Kes-li é kes povu ki dexadu: kes sinku governanti di kes filisteu i tudu kes kananeu, kes sidóniu i kes eveu ki ta moraba na kes montanha di Líbanu, désdi monti Baal-Ermon ti Lebo-Amate.* 4 Jeová dexa kes nason kontinua na país pa el odja si kes israelita ta obiba ku kes mandamentu ki el daba ses gentis grandi através di Muizés. 5 Kes israelita ta viveba na meiu di kes kananeu, di kes itita, di kes amoreu, di kes perizeu, di kes eveu i di kes jebuzeu. 6 Es kaza ku kes mudjer di kes nason, i tanbê es dexa ses fidju-fémia kaza ku kes ómi di kes nason, i es kumesa ta adora ses deus.

7 Nton, kes israelita staba ta faze kes kuza ki Jeová ta atxaba ma éra mariadu. Es skese di Jeová, ses Deus, i es adora Baal* i kes pósti sagradu.* 8 Pur isu, Jeová fika txeu xatiadu ku Israel, i el intrega-s* na mô di Kusan-Rizatain, rei di Mezopotámia.* Kes israelita sirbi Kusan-Rizatain duránti 8 anu. 9 Kantu es pidi Jeová pa djuda-s, Jeová manda un salvador pa resgata-s. Kel algen li éra Otniel, fidju di Kenás, irmon más pikinoti di Kalebe. 10 Spritu di Jeová ben riba di el, i el bira juís di Israel. Kantu Otniel sai pa ba luta, el ganha Kusan-Rizatain, rei di Mezopotámia,* pamodi Jeová intrega-l na se mô. 11 Dipôs, tevi 40 anu di pas* na país. Nton Otniel, fidju di Kenás, móre.

12 I más un bês, kes israelita kumesa ta faze kes kuza ki Jeová ta atxaba ma éra mariadu. Pur isu, Jeová dexa pa Eglon, rei di Moabe, fika más fórti di ki Israel pamodi es staba ta faze kes kuza ki Jeová ta atxaba ma éra mariadu. 13 Alén di kel-li, el traze kes amonita i kes amalekita pa ataka Israel. Es luta kóntra Israel i es toma sidadi di palmera. 14 Israelitas sirbi Eglon, rei di Moabe, duránti 18 anu. 15 Nton, israelitas inplora Jeová pa djuda-s, i Jeová manda-s un salvador ki txomaba Eúde, fidju di Jera. Eúde éra un benjaminita ki ta uzaba mô skerda.* Ku ténpu, israelitas manda Eúde pa ba paga un taxa pa Eglon, rei di Moabe. 16 Nton, Eúde faze un spada ki ta kortaba pa tudu dôs ladu i ki tinha uns 40 sentímetru.* El mara-l na koxa direita, dibaxu di se ropa. 17 El intrega kel taxa pa Eglon, rei di Moabe. Eglon éra un ómi gordu dimás.

18 Dipôs ki Eúde intrega kel taxa, el bai se kaminhu djuntu ku kes ómi ki staba ta karega kel taxa. 19 Má kantu el txiga na kes imajen* na Jilgal, el volta i el fla: “N tene un mensajen partikular pa sinhor rei.” Rei fla: “Spera, ka bu fla inda.” I tudu ses sérvu sai di la. 20 Nton, Eúde txiga más pértu di rei timenti el staba el sô na un kuartu frésku na terasu. Eúde fla: “N tene un mensajen di Deus pa nho.” Pur isu, rei labanta di se tronu.* 21 Nton, Eúde puxa kel spada ki staba na se koxa direita, ku se mô skerda, i el finka-l na bariga di rei. 22 Kel spada interu entra djuntu ku kel kabu, i banha kubri kel spada pamodi Eúde ka tra kel spada di bariga di Eglon. I pupú kumesa ta sai. 23 Eúde sai pa varanda,* i el tranka kes pórta di kel kuartu na terasu. 24 Dipôs ki el bai se kaminhu, kes sérvu di rei volta i es odja ma kes pórta di kel kuartu na terasu staba tudu trankadu. Nton es fla: “El debe sta ta faze nisisidadi* na kel kuartu frésku na terasu.” 25 Es spera ti ki es fika preokupadu. Kantu es odja ma el ka staba ta abri kes pórta di kel kuartu na terasu, es panha txabi i es abri kes pórta. Nton, es atxa ses sinhor mortu na txon!*

26 Timenti kes sérvu di rei staba ta spera, Eúde skapa. El pasa na undi ki tinha kes imajen i el txiga san i salvu na Seirá. 27 Kantu el txiga, el toka buzina na kes zóna di Efrain ki ten montanha i kes israelita dixi di kes zóna di montanha. Eúde staba ta bai ses frenti. 28 Nton el fla-s: “Nhos sigi-m, pamodi Jeová dja intrega kes moabita, ki é nhos inimigu, na nhos mô.” Nton, es sigi-l i es toma kes lugar ki ta daba pa trabesa Jurdon ku pé, pa ka dexa kes moabita pasa, asi pa es ka fujiba. 29 Na kel ténpu, es mata uns 10 mil moabita. Tudu es éra ómis fórti i balenti. Ninhun di es ka skapa. 30 Na kel dia, kes moabita kai na mô di Israel i téra tevi pas duránti 80 anu.

31 Dipôs di Eúde, ben Sangar, fidju di Anate, ki mata 600 filisteu ku un vara* di pastora boi. El tanbê el salva Israel.