Juízis

1 Dipôs ki Juzué móre, kes israelita* pergunta Jeová: “Kal di nos ki debe subi primeru pa ba luta kóntra kes kananeu?” 2 Jeová responde: “Tribu di Judá ta subi. N ta intrega* kel téra li na ses mô.” 3 Nton, tribu di Judá fla ses irmon di tribu di Simion: “Nhos subi ku nos pa kel tiritóriu ki nu dadu* i nhos ba djuda-nu luta kóntra kes kananeu. Dipôs, nu ta bai ku nhos pa kel tiritóriu ki nhos dadu.” Nton, tribu di Simion bai ku tribu di Judá.

4 Kantu tribu di Judá subi, Jeová intrega kes kananeu i kes perizeu na ses mô, i es vense 10 mil ómi na Bezeki. 5 Es inkontra ku Adoni-Bezeki na Bezeki, es luta kóntra el la i es ganha kes kananeu i kes perizeu. 6 Kantu Adoni-Bezeki fuji, es pirsigi-l, es pega-l i es korta-l kes dedon di mô i kes dedon di pé. 7 Nton, Adoni-Bezeki fla: “N manda korta dedon di mô i di pé di 70 rei ki ta panha réstu di kumida dibaxu di nha méza. Sima N faze ku es, Deus faze ku mi.” Dipôs, es leba Adoni-Bezeki pa Jiruzalen i el móre la.

8 Alén di kel-li, kes ómi di Judá luta kóntra Jiruzalen i es toma-l. Es mata povu di sidadi ku spada i es poi lumi na sidadi. 9 Dipôs, kes ómi di Judá dixi pa ba luta kóntra kes kananeu ki ta moraba na kes zóna ki ten montanha, na Negebe i na Sefelá. 10 Nton, kes ómi di Judá ba luta kóntra kes kananeu ki ta moraba na Ebron (antis, es ta txomaba Ebron di Kiriate-Arba), i es mata Sezai, Aiman i Talmai.

11 Di la, es ba luta kóntra kes algen di Debir. (Antis, es ta txomaba Debir di Kiriate-Sefer.) 12 Nton, Kalebe fla: “Kel ómi ki ataka i toma Kiriate-Sefer, N ta da-l nha fidju-fémia Akza pa ser se mudjer.” 13 I Otniel, fidju di Kenás, irmon más novu di Kalebe, toma kel sidadi. Pur isu, Kalebe da-l se fidju-fémia Aksa pa ser se mudjer. 14 Na kaminhu pa kaza, Aksa insisti ku Otniel pa pidi se pai pa da-l un txon. Nton, Aksa dixi di buru* i Kalebe pergunta-l: “Kuzê ki bu krê?” 15 El fla-l: “Favor, da-m un benson, pamodi dja bu da-m un padás di txon na sul.* Da-m tanbê Gulote-Main.”* Nton, Kalebe da-l Gulote Altu i Gulote Baxu.

16 I kes disendenti di kel kineu, sogru di Muizés, sai di sidadi di palmera djuntu ku povu di Judá i es bai pa dizértu di Judá, na sul di Arade. Es bai pa la i es fika ta mora na meiu di povu. 17 Má, tribu di Judá bai djuntu ku ses irmon di tribu di Simion, i es ataka kes kananeu ki ta moraba na Zefate i es distrui kel sidadi. É pamodi kel-li ki es poi kel sidadi nómi di Ormá.* 18 Nton, Judá toma Gaza i se tiritóriu, Askalon i se tiritóriu, i Ekron i se tiritóriu. 19 Jeová staba ku kes ómi di Judá i es toma kes zóna ki ten montanha, má es ka konsigi tra kes algen di vali, pamodi es tinha karu di géra ku foisi di féru na róda.* 20 Nton Kalebe dadu Ebron, sima Muizés dja prometeba, i el tra kes três fidju di Anaki di la.

21 Má, tribu di Benjamin ka kóre ku kes jebuzeu ki ta moraba na Jiruzalen. Pur isu, kes jebuzeu kontinua ta mora djuntu ku kes benjaminita na Jiruzalen ti dia di oji.

22 Má, kes disendenti di Juzé subi pa ba luta kóntra Betel i Jeová staba ku es. 23 Kes disendenti di Juzé manda spion pa Betel (antis, es ta txomaba kel sidadi di Lus), 24 i kes spion odja un ómi ta sai di sidadi. Nton, es fla-l: “Favor, mostra-nu modi ki nu ta entra na sidadi i nu ta trata-u ku bondadi.”* 25 Nton, kel ómi mostra-s modi ki es ta entraba na sidadi. Es ataka kel sidadi i es mata kes algen di la ku spada, má es dexa kel ómi i tudu se família bibu. 26 Kel ómi bai pa téra di kes itita, el faze un sidadi i el pô-l nómi di Lus, i é si ki kel sidadi ta txomadu ti dia di oji.

27 Tribu di Manasés ka toma Bete-Sion i kes vila pértu di la,* nen Tanaki i kes vila pértu di la, nen Dor i kes vila pértu di la, nen Ibleon i kes vila pértu di la, nen Mejidu i kes vila pértu di la. Kes kananeu kontinua ta mora na kel téra i es ka krê saíba di la. 28 Kantu israelitas bira más fórti, es poi kes kananeu ta faze trabadju forsadu. Má, es ka kóre ku tudu es.

29 Tribu di Efrain tanbê ka kóre ku kes kananeu ki ta moraba na Jezer. Kes kananeu kontinua ta mora na Jezer djuntu ku kes efraimita.

30 Tribu di Zebulon ka kóre ku kes algen di Kitron, nen ku kes algen di Nalol. Kes kananeu kontinua ta mora djuntu ku es i es poi kes kananeu ta faze trabadju forsadu.

31 Tribu di Azer ka kóre ku kes algen di Akô, di Sidon, di Alabe, di Akzibe, di Elba, di Afiki i nen ku kes algen di Reobe. 32 Pur isu, kes azerita kontinua ta mora djuntu ku kes kananeu ki ta moraba na kel téra, pamodi es ka kóre ku es.

33 Tribu di Naftali ka kóre ku kes algen di Bete-Semes nen ku kes algen di Bete-Anate, má es kontinua ta mora djuntu ku kes kananeu ki ta viveba na kel téra. Es poi kes algen di Bete-Semes i di Bete-Anate ta faze trabadju forsadu pa es.

34 Kes amoreu ka dexa tribu di Dan dixi pa mora na vali. Pur isu, tribu di Dan foi obrigadu vive na montanha. 35 Kes amoreu nega sai di montanha di Eres, na Aijalon i na Salbin. Má, kantu kes disendenti di Juzé bira fórti,* es poi kes amoreu ta faze trabadju forsadu. 36 Tiritóriu di kes amoreu ta kumesaba na subida di Akrabin i na Sela, i el ta baba di la pa riba.