Sugundu livru di Reis

8 Elizeu fla mai di kel mininu ki el resusita:* “Labanta abo ku bu família, i ba mora sima stranjeru na kalker lugar ki bu ta pode, pamodi Jeová fla ma ta ben ten un fómi na país, ki ta ben dura 7 anu.” 2 Nton, kel mudjer labanta i el faze sima kel ómi di Deus verdaderu fla-l. El bai ku se família i el fika ta mora na téra di filisteus duránti 7 anu.

3 Dipôs di 7 anu, kel mudjer volta di téra di kes filisteu i el ba pidi rei pa torna da-l se kaza i se txon. 4 Rei staba ta pâpia ku Jeazi, kel ajudanti di ómi di Deus verdaderu, i el fla: “Favor, konta-m tudu kes kuza grandi ki Elizeu dja faze.” 5 Kantu el staba ta konta rei modi ki Elizeu resusita un algen ki móre, txiga kel mudjer ki se fidju resusitadu i el pidi rei pa da-l se kaza i se txon. Kel óra, Jeazi fla: “Sinhor rei, é kel mudjer li, i kel-li é se fidju ki Elizeu resusita.” 6 Nton, rei pergunta kel mudjer modi ki kuzas kontise, i el konta-l. Dipôs, rei txoma un funsionáriu di palásiu i el fla-l: “Da-l otu bês tudu kes kuza ki é di sel i paga-l valor di tudu kel ki se txon da, désdi kel dia ki el sai di país ti gósi.”

7 Elizeu bai pa Damasku kantu Ben-Adade, rei di Síria, staba duenti. Pur isu, es manda fla rei: “Kel ómi di Deus verdaderu sta li.” 8 Nton rei fla Azael: “Ba inkontra ku kel ómi di Deus verdaderu i leba-l un prezenti. Fla-l pa el pergunta Jeová si N ta rekupera di nha duénsa.” 9 Azael ba inkontra ku Elizeu i el leba-l un prezenti. El leba-l tudu tipu di bons kuza di Damasku, na 40 kamelu. El txiga, el fika se dianti i el fla-l: “Bu fidju, Ben-Adade, rei di Síria, manda-m pergunta sinhor: ‘N ta rekupera di kel duénsa li?’” 10 Elizeu responde-l: “Bai i bu fla-l: ‘Nho ta midjora.’ Má Jeová mostra-m ma el ta ben móre.” 11 Elizeu fika ta djobe Azael déntu róstu, ti ki Azael xinti vergónha. Nton, kel ómi di Deus verdaderu kumesa ta txora. 12 Azael pergunta-l: “Pamodi ki nho sta ta txora?” El responde-l: “Pamodi N sabe ma bu ta ben traze povu di Israel txeu sufrimentu. Bu ta ben poi lumi na kes lugar di proteson, bu ta ben mata kes ómi más fórti ku spada, bu ta ben korta kes mininu padás-padás i bu ta ben ratxa bariga di kes mudjer grávida.” 13 Azael fla-l: “Modi ki sérvu di nho, ki é ka nada sima un katxor, ta faze un kuza di kel-li?” Má Elizeu responde-l: “Jeová mostra-m ma bu ta ser rei di Síria.”

14 Nton, el dexa Elizeu i el volta pa se sinhor. Kantu el txiga, rei pergunta-l: “Kuzê ki Elizeu fla-u?” El responde-l: “El fla-m ma nho ta midjora.” 15 Má na kel otu dia, Azael panha un kubérta, el mete-l déntu di agu i el kalka-l* riba di róstu di rei ti ki el móre. I Azael bira rei na se lugar.

16 Na kintu anu di govérnu di Jeoron, fidju di Akabi, rei di Israel, timenti Jeozafá éra rei di Judá, Jeoron, fidju di Jeozafá, rei di Judá, bira rei. 17 El tinha 32 anu kantu el bira rei i el governa duránti 8 anu na Jiruzalen. 18 El faze kes mésmu pekadu ki kes rei di Israel faze, kes mésmu pekadu ki família di Akabi faze, pamodi el kaza ku fidju-fémia di Akabi. El faze kes kuza ki Jeová ta atxaba ma éra mariadu. 19 Má Jeová ka krê distruíba Judá, pamodi se sérvu Davidi, dja ki el prometeba Davidi ma el ta daba el ku ses fidju un lánpida* pa tudu ténpu.

20 Na ténpu di Jeoron, Edon rabela kóntra Judá i el skodje se própi rei. 21 Pur isu, Jeoron bai pa Zair ku tudu ses karu di géra. Di noti, el ataka i el vense kes edomita ki serka-l ael i kes xéfi di karu di géra. Nton, kes trópa fuji pa ses ténda. 22 Má, Edon kontinua ta rabela kóntra Judá ti dia di oji. I Libna tanbê rabela na kel ténpu.

23 Kes otu kuza ki kontise na vida di Jeoron i tudu kes kuza ki el faze, sta skrebedu na livru di stória di ténpu di kes rei di Judá. 24 Dipôs, Jeoron ba diskansa djuntu ku ses gentis grandi i el interadu djuntu ku ses gentis grandi na Sidadi di Davidi. I se fidju Akazias, bira rei na se lugar.

25 Na désimu sugundu anu di govérnu di Jeoron, fidju di Akabi, rei di Israel, Akazias, fidju di Jeoron, rei di Judá, bira rei. 26 Akazias tinha 22 anu kantu el bira rei i el governa duránti un anu na Jiruzalen. Se mai txomaba Atalia, néta* di Onri, rei di Israel. 27 Akazias faze kes mésmu pekadu ki família di Akabi faze. El faze kes kuza ki Jeová ta atxaba ma éra mariadu, sima família di Akabi, pamodi se pai kaza ku un mudjer di família di Akabi. 28 Un dia, Akazias i Jeoron, fidju di Akabi, ba luta kóntra Azael, rei di Síria, na Ramote-Jiliade. Má kes trópa di Síria da Jeoron pankada. 29 Pur isu, rei Jeoron volta pa Jesriel pa ba rekupera di kel pankada ki trópas di Síria da-l na Ramá, kantu el luta kóntra Azael, rei di Síria. I Akazias, fidju di Jeoron, rei di Judá, bai pa Jesriel pa ba vizita Jeoron, fidju di Akabi, pamodi el panha pankada.*