Salmu
Pa diretor di múzika. Un múzika di Davidi.
41 Filís é kel algen ki ta mostra konpaxon pa algen póbri.
Jeová ta salva-l na dia di disgrasa.
2 Jeová ta ben proteje-l i el ta ben mante-l bibu.
Algen na téra ta fla ma el é filís.
Nunka el ka ta ben intrega-l na mô* di ses inimigu.
3 Jeová ta ben djuda-l óras ki el sta duenti na kama.
El ta ben kuida di el duránti se duénsa.*
4 N fla: “Ó Jeová, ten péna di mi.
Kura-m,* pamodi N peka kóntra bo.”
5 Má nhas inimigu sta ta pâpia mal di mi i ta pergunta:
“Ki dia ki el ta móre i ta skesedu di se nómi?”
6 Si un di nhas inimigu ben vizita-m, el ta pâpia mintira.*
El ta djobe kes kuza mariadu pa pâpia di mi.
Dipôs, el ta sai pa el ba konta otus algen.
7 Tudu kes ki ta odia-m sta ta kuxixa ku kunpanheru.
Es sta ta faze planu pa prujudika-m, es sta fla:
8 “Un kuza gravi dja kontise ku el.
Gósi ki el sta na kama, el ka ta labanta más.”
9 Ti kel ómi ki staba na pas ku mi, ki N ta kunfiaba na el,
Kel ki ta kumeba nha pon, bira* kóntra mi.
10 Má, ó Jeová, ten péna di mi i labanta-m,
Asi pa N da-s kel ki es merese.
11 É si ki N ta sabe ma bu sta kontenti ku mi:
Óras ki nhas inimigu ka konsigi vense-m i fika kontenti.
12 Má bu ta apoia-m pamodi nha lialdadi.
Bu ta dexa-m fika na bu prezénsa pa tudu ténpu.
13 Pa Jeová, kel Deus di Israel, lovadu
Pa tudu ténpu.*
Amén i Amén.