Salmu
Pa diretor di múzika. Pa toka na ton di múzika di “Ka bu distrui”. Salmu di Davidi. Mikton.*
58 Nhos ta pode pâpia di justisa si nhos sta kaladu?
Ó fidjus di ómi, nhos ta pode julga ku justisa?
2 Má na nhos korason, nhos ta faze planu pa faze injustisa,
I nhos mô sta ta faze violénsia na país.
3 Kes mau disvia désdi ki es nase.
Es é rebéldi i es ta konta mintira désdi bariga di ses mai.
4 Ses palavra é sima venénu di kóbra.
Es é surdu sima kóbra ki ta tapa obidu.
5 Kóbra ka ta obi vós di un fitiseru,
Sikrê el faze kel midjór feitisu.
6 Ó Deus, kebra denti di kes algen mau!
Ó Jeová, kebra kexada di kes lion li!*
7 Pa es dizaparse sima agu ki ta kóre i ta bai.
Pa Deus arma se arku* i pô-s ta kai ku se flexa.
8 Pa es ser sima un karakol ki sta kuazi ta móre,*
Sima un mininu ki nase mortu i ki nunka ka ta ben odja sol.
9 Antis di nhos panéla xinti kentura di pé di spinhu,
Deus ta ben leba kes ramu verdi i kes ramu ki sta ku lumi, sima na un tenporal.
10 Algen justu ta ben fika kontenti pamodi el odja vingansa.
Se pé ta ben fika xeiu di sangi di kes algen mau.
11 Nton, kes ómi ta ben fla: “Di serteza ten un rekonpénsa pa kes algen ki é justu.
Ten un Deus ki ta faze justisa na téra.”