Salmu
Pa diretor di múzika. Pa toka na ton di múzika “Líriu di rekordason”. Mikton.* Salmu di Davidi pa inxina. El ta pâpia di kantu el luta kóntra Aran-Narain i Aran-Zobá, i Joabe volta i el mata 12 mil edomita na vali di Sal.
60 Ó Deus, bu nega-nu, bu pô-nu ta perde géra.
Bu staba xatiadu ku nos, má gósi seta-nu otu bês!
2 Bu poi téra ta treme, bu ratxa-l.
Konpo ses ratxadura, pamodi el sta kuazi ta kai.
3 Bu poi bu povu ta sufri.
Bu pô-nu ta bebe vinhu i nu fika ta da di banda.
4 Da* un sinal pa kes ki ten grandi ruspetu pa bo
Pa es fuji i pa es disvia di flexa. (Selá)
5 Pa kes ki bu ta ama libradu,
Salva-nu ku bu mô direita i responde-nu.
6 Deus santu pâpia.* El fla:
“Ku alegria, N ta ben dividi Sikén pa ken ki N krê,
N ta ben midi vali* di Sukote pa N da nha povu.
7 Jiliade é di meu i Manasés tanbê,
I Efrain é kapaseti* di nha kabésa.
Judá é nha vara ki N ta uza pa N governa.
8 Moabe é kel basia ki N ta laba na el.
N ta ben bota nha sandália riba di Edon.
N ta ben kanta vitória pamodi N ta ben vense Filístia.”
9 Ken ki ta ben leba-m pa kel sidadi ki sta serkadu?*
Ken ki ta ben gia-m ti Edon?
10 Ó Deus, é ka bo mê ki nega-nu?
Nos Deus ka sta kunpanha nos trópa más.
11 Djuda-nu na nos frónta,
Pamodi ka bale péna spera pa salvason di ómi.
12 Deus ta ben da-nu forsa
I el ta ben piza nos inimigu.