Salmu
Maskil* di Azafe.
74 Ó Deus, pamodi ki bu nega-nu pa tudu ténpu?
Pamodi ki bu sta xatiadu ku ribanhu ki bu ta pastora?
2 Lenbra di kel povu* ki dja ten txeu ténpu ki bu skodje,
Di kel tribu ki bu resgata pa ser bu eransa.
Lenbra di monti Sion, undi bu ta mora.
3 Bai pa kel lugar ki distruídu tudu.
Inimigu distrui tudu kuza ki ten na lugar santu.
4 Bus inimigu kanta vitória déntu di bu ténplu.*
La, es poi ses sinal di vitória.
5 Es éra sima kes ómi ki ta uza matxadu pa abri kaminhu na meiu di florésta.
6 Es kebra tudu kes dikorason di ténplu ku matxadu i ku vara di féru.
7 Es poi lumi na ténplu.
Es dizonra bu kaza ki ta leba bu nómi i es bota-l na txon.
8 Bus inimigu i ses disendenti fla na korason:
“Nu ta ben kema tudu kes lugar undi Deus ta adoradu.”*
9 Dja ka ten ninhun sinal pa nu odja,
Dja ka ten ninhun proféta,
I ninhun di nos ka sabe ti ki ténpu kel-li ta dura.
10 Ó Deus, ti ki ténpu ki bu inimigu ta kontinua ta insulta-u?
Pur akazu, bu inimigu ta kontinua ta trata bu nómi sen ruspetu pa tudu ténpu?
11 Pamodi ki bu ka ta uza bu mô direita?
Tra-l di petu* i kaba ku es.
12 Nha Deus, bu ta salva bu sérvu na tudu párti di téra,
Bo é nha Rei désdi ténpu antigu.
13 Bu uza bu forsa pa bu poi mar ta fika brabu.
Bu kebra kabésa di kes monstru di mar.
14 Bu pila kes kabésa di Leviatan.*
Bu da-l pa el ser kumida pa povu, pa kes algen ki ta mora na kes lugar dizértu.
15 Bu abri txon pa fonti i korenti di agu kóre.
Bu seka kes riu ki sénpri ta koreba agu.
16 Dia i noti é di bo.
Bu faze lus i sol.
17 É bo ki disidi tamanhu di kes diferenti párti di téra.
Bu faze veron i invérnu.
18 Ó Jeová, lenbra modi ki bu inimigu insulta-u,
Modi ki un povu sen juís ta trata bu nómi sen ruspetu.
19 Nos é sima un ponba rola. Ka bu intrega-nu na mô di nos inimigu pamodi es é sima animal brabu.
Nunka ka bu skese di bu povu ki sta ta sufri.
20 Lenbra di kel kontratu ki bu faze ku nos,
Pamodi kes lugar sukuru di téra sta xeiu di pesoas violéntu.
21 Ka bu dexa kes algen ki sta frontadu bai ses kaminhu diziludidu.
Pa kes algen koitadu i póbri lova bu nómi.
22 Ó Deus, labanta i difende bu kazu.
Lenbra ma kes algen ki ka ten juís ta pasa dia interu ta insulta-u.
23 Ka bu skese di kuzê ki bus inimigu ta fla.
Gritu di kes algen ki ta dizafia-u sta sénpri ta subi pa bo.