Salmu
Pa diretor di múzika. Pa toka na ton di múzika “Ka bu distrui”. Salmu di Azafe. Kántiku.
75 Ó Deus, nu ta agradese-u, nu ta agradese-u.
Bu nómi sta pértu di nos,*
I pesoas ta pâpia di kes kuza grandi ki bu faze.
2 Bu ta fla: “Óras ki N marka un ténpu pa julga,
N ta julga ku justisa.
3 Kantu téra i tudu algen ki ta mora na el kumesa ta treme,*
É mi ki mante ses pilar firmi.” (Selá)
4 N ta fla kes algen orgulhozu: “Ka nhos ingaba”,
I kes algen mau: “Ka nhos ingaba di nhos puder.*
5 Ka nhos ingaba tantu si di nhos puder
Nen ka nhos pâpia ku orgulhu.
6 Pamodi ónra di ómi ka ta ben
Nen di lésti, nen di oésti, nen di sul.
7 Pamodi Deus é Juís.
El ta rabaxa un i el ta engrandese kel otu.
8 Jeová tene un kópu di vinhu na mô.
Kel vinhu tene skuma i el é fórti.*
Di serteza el ta ben baza-l,
I tudu kes algen mau di téra ta ben bebe-l ti últimu góta.”*
9 Má ami, N ta ben pâpia di kes kuza li pa tudu ténpu.
N ta ben kanta lovor* pa Deus di Jakó.
10 Pamodi el ta fla: “N ta ben kaba ku tudu puder di kes algen mau,
Má puder di kes algen justu ta ben bira más txeu.”